އީސީން މެންބަރުން ވަކިކުރަނީ ރީރެޖިސްޓްރޭޝަން އޮޅުވާލުމާއި ޑޭޓާބޭސް ވިއްކުން ފަދަ ބޮޑެތި ތުހުމަތާ އެކު

މިދިޔަ އަހަރު ބޭއްވި ރިޔާސީ އިންތިހާބުގެ ރީރެޖިސްޓްރޭޝަން އޮޅުވާލުމާއި އިންތިހާބުގެ ޑޭޓާބޭސް އިން އެޕްލިކޭޝަން ހަދައިގެން އެ ވިއްކުން ފަދަ ބޮޑެތި ތުހުމަތުތަކެއް، އިލެކްޝަންސް ކޮމިޝަނުން ވަކިކުރާ ތިން މެންބަރުންނަށް ކޮށްފި އެވެ.

އިލެކްޝަންސް ކޮމިޝަނުން ވަކިކުރަން ކޮމިޓީން ނިންމާފައިވަނީ އެ ކޮމިޝަންގެ ނައިބު ރައީސް އަލީ ނަޝާތާއި މެންބަރު މުހައްމަދު އާސިފާއި މެންބަރު ޑރ. މުހައްމަދު ޒާހިރެވެ.

މި ތިން ބޭފުޅުންގެ އިތުރުން އެންޓިކޮރަޕްޝަން ކޮމިޝަނުން ވަކިކުރާ މެންބަރުންގެ މައްސަލަ މަޖިލީހުގެ މިނިވަން މުއައްސަސާތަކުގެ ކޮމިޓީން ކުރިއަށް ގެންގޮސްފައިވަނީ ސިއްރުކޮށްގެންނެވެ. މެންބަރުން ވަކިކުރަން އިއްޔެ ފާސްކުރިއިރު، އެ ބޭފުޅުންނަށް ތުހުމަތުކުރެވޭ މައްސަލައާ ގުޅޭ ތަފްސީލެއް ހާމައެއް ނުކުރެ އެވެ.

އެކަމަކު މި ތިން ބޭފުޅުން ވަކިކުރުމުގެ މައްސަލަ ކޮމިޓީން ފާސްކުރި ގޮތުގެ ރިޕޯޓު ވަނީ މިއަދުގެ މަޖިލިސް ތަޅުމުގައި އިއްވައިފަ އެވެ. ރިޕޯޓުގައިވާ ގޮތުން، ނަޝާތާއި އާސިފާއި ޒާހިރަށް 19 ތުހުމަތެއް ކޮށްފައިވެ އެވެ.

ރިޕޯޓުގައިވާ ތުހުމަތުކޮށްފައިވާ ގޮތުގައި، ފަހުގެ ރިޔާސީ އިންތިހާބުގައި އީސީގެ ޑޭޓާބޭސްއިން މައުލޫމާތު ނަގައިގެން ނަޝާތު އެޕްލިކޭޝަންތައް ހަދައި، އެ އެޕްލިކޭޝަންތައް ވިއްކައި ބައެއް ސިޔާސީ ޕާޓީތަކަށް ދީފައިވެ އެވެ. އަދި، ރިޔާސީ އިންތިހާބު ވަކި ޕާޓީއަކަށް ކާމިޔާބުކޮށްދިނުމަށް މި ތިން ބޭފުޅުން މަސައްކަތް ކޮށްފައިވާ ކަމަށް ވެސް ރިޕޯޓުގައި ތުހުމަތުކޮށްފައިވެ އެވެ.

ރިޔާސީ އިންތިހާބުގެ ދުވަސްވަރު ރީރެޖިސްޓްރޭޝަން އޮޅުވާލުމުގެ ބޮޑެތި ތުހުމަތުތަކެއް ކުރިޔަސް، އެކަން އޭރު އެ ކޮމިޝަނުން ވަނީ ދޮގުކޮށްފަ އެވެ.

މީގެ ކުރިން ވެސް ރިޔާސީ އިންތިހާބުގެ ރީރެޖިސްޓްރޭޝަންގައި މަކަރުހަދައި އޮޅުވާލުމުގެ އަމަލުތަކެއް ހިންގާފައިވާ ކަމަށާއި އީސީގައި ހުރި ދިވެހި ރައްޔިތުންގެ މައުލޫމާތު ވިއްކައިގެން ވެސް ނަޝާތާއި އާސިފް އަދި ޒާހިރު ނަފާ ހޯދާފައިވާ ކަމަށް ކަމަށް ރިޕޯޓުގައި ބުނެފައިވެ އެވެ.

ތިން ބޭފުޅުންނަށް ވަނީ ވަކި ސިޔާސީ ޕާޓީއެއް އުވާލުމުގެ މަގްސަދުގައި ވަގުފޯމު ހެދުމާއި އެ ޕާޓީއަށް 3،000 މެންބަރުން ހަމަވިޔަނުދޭން މަސައްކަތް ކޮށްފައިވާ ކަމަށް ވެސް ތުހުމަތުތަކުގެ ތެރޭގައިވެ އެވެ.

އިތުރު ބައެއް ތުހުމަތުތައް:

- ވަކި ސިޔާސީ ޕާޓީއެއް އުފައްދަން ހުށަހެޅި ސޮއި ލިސްޓު ރައީސް އޮފީހަށް ފޮނުވައި، ޕާޓީ އުފައްދަން ހުރަސް އެޅުން

- ގާތް ގުޅުން އޮންނަ ވިޔަފާރިތަކުން މުދާ ހޯދުމާއި ވިޔަފާރިކުރާ ބަޔަކާ ގުޅިގެން ވަކި ކުންފުންޏަކުން ކޮމްޕިއުޓަ ސިސްޓަމްތަކެއް ހޯދައި ބޮޑު މަންފާއެއް ހޯދުން

- ކޮރަޕްޝަނަކީ މައްސަލައެއް ނޫން ކަމަށާއި ވޯޓު ވިއްކުމަކީ މައްސަލައެއް ނޫން ކަމަށް ބުނެ ވާހަަކަދެއްކުން

- މުވައްޒަފުންނާ ބޭއަދަބީކޮށް ވާހަކަދެއްކުމާއި ވަޒީފާގެ ބިރު ދެއްކުމާއި ބިޑް ކޮމިޓީން ވަކި ގޮތަކަށް އަމަލުނުކޮށްފި ނަމަ ވަކި ކުރާނެ ކަމުގެ ބިރު ދެއްކުން

- ކޮމިޝަނަށް ހާޒިރުނުވާ ދުވަސްތަކުގައި ވެސް ހާޒިރުވީ ކަމަށް ގަސްތުގައި ނުބައި ގަޑިޖެއްސެވުން

- މުވައްޒަފުންގެ މެދުގައި ކޮމިޝަންގެ ރައީސްގެ އަގުވައްޓާލަން ކަނޑައެޅިގެން މަސައްކަތް ކޮށްފައިވުން

- ސިޔާސީ އެކި ފަރާތްތަކާ ގާތް ގުޅުން ބާއްވައި ކުރީގެ ރައީސް އޮފީހުގެ މުވައްޒަފަކާ ގިނަގިނައިން ނަޝާތު ބައްދަލުކުރެއްވުން

މި ތިން ބޭފުޅުންނަށް މިފަދަ ތުހުމަތުތަކެއް ކުރެވުނުއިރު، އޭރު ވެރިކަމުގައި އޮތް އެމްޑީޕީ ބައިބައިވުމަށް ފަހު ޑިމޮކްރެޓްސް ޕާޓީ އުފައްދަން ކުރި މަސައްކަތަށް ހުރަސް އެޅުމުގެ ތުހުމަތު ކުރެވި އިލެކްޝަންސް ކޮމިޝަންގެ މެންބަރުންގެ ތެރޭގައި މިދިޔަ އަހަރު ބޮޑެތި މައްސަލަތަކެއް ވެސް ޖެހުނެވެ. އެ މައްސަލަގަނޑުތެރޭގައި އެ ކޮމިޝަންގެ ރައީސް ކަމުގައި ހުންނެވި ފުއާދު ތައުފީގުގެ އިތުބާރު ނެތް ކަމުގެ މައްސަލައެއް ވެސް ފާސްކުރި އެވެ.

މި ތިން ބޭފުޅުން ވަކިކުރަން މިނިވަން މުއައްސަސާތަކުގެ ކޮމިޓީން ފާސްކޮށްފައި ވާއިރު، މަޖިލީހުން ގޮތެއް ނިންމުމަށް މިއަދުގެ ވޯޓު ގަޑީގައި ވޯޓަށް އަހާނެ އެވެ.