ބުޅާ ފެސިލިޓީއަށް ބައެއް ސާމާނު ހޯދަނީ

މާލޭ ސަރަހައްދުގެ މަގުތަކުގައި އުޅޭ ބުޅާތައް ބަލަހައްޓަން ސަރުކާރުން ހެދި "އޮޅު ހިޔާ" އަށް ބޭނުންވާ ބައެއް އިކުއިޕްމެންޓްސް އާއި މެޓީރިއަލްސް ހޯދުމަށް މާލޭ ސިޓީ ކައުންސިލުން އިއުލާނުކޮށްފި އެވެ.

ކައުންސިލުން ބުނީ ހުޅުމާލޭ 2 ގައި ހަދާފައިވާ ބުޅާ ފެސިލިޓީއަށް ބޭނުންވާ އެ ސާމާނު ސަޕްލައި ކޮށްދޭން ބޭނުންވާ ފަރާތްތަކުން ބީލަން ހުށަހެޅުމުގެ ފުރުސަތު މިހާރު ހުޅުވާލާފައިވާ ކަމަށެވެ. އެކަމަށް ޝައުގުވެރިވާ ފަރާތްތަކުން އަންނަ މަހުގެ ހަތަރު ވަނަ ދުވަހުގެ 10:00 އަށް އަންދާސީ ހިސާބު ހުށަހަޅަން ޖެހޭ ކަމަށް އިއުލާނުގައިވެ އެވެ.

އެ އިއުލާނާ ގުޅޭ އިތުރު މައުލޫމާތު ބޭނުން ނަމަ، އަންނަ މަހުގެ 2 ގެ މެންދުރު 12:00 ގެ ކުރިން މެއިލް ކުރުމަށް ވެސް ކައުންސިލުގެ އިއުލާނުގައިވެ އެވެ.

އިއުލާނުގައިވާ ގޮތުން ބުޅާ ފެސިލިޓީއަށް ހޯދަނީ އިންޖެކްޝަނާއި ޔުރިނަރީ ކެތީޓާ އާއި މާސްކާއި އަންގި ފަދަ ސާޖަރީތަކަށް ބޭނުންވާ ސާމާނެވެ.

އިއުލާނުގައި ބުނީ އެކަމަށް އެދި ހުށަހެޅޭނީ ރާއްޖޭގައި ރަޖިސްޓްރީކޮށްފައިވާ ދިވެހި ކުންފުންޏާއި ޕާޓްނާ ނުވަތަ އަމިއްލަ ވިޔަފާރިތަކަށެވެ.

ހުޅުމާލޭ 2 ގައި ގާތްގަނޑަކަށް 5،000 އަކަފޫޓުގެ ބޮޑު ބިމެއްގައި ހަދާފައިވާ ބުޅާ ފެސިލިޓީ ހުޅުވީ މިމަހުގެ 10 ގަ އެވެ. އެތަނަށް އަދި ބުޅާތައް ގެންދަން ނުފަށަ އެވެ.

އެކަމަކު މީގެ ދެ ހަފްތާ ކުރިން ވަނީ ބުޅަލަށް ބޭނުންވާ ކާނާ ސަޕްލައި ކޮށްދޭނެ ބަޔަކު ހޯދަން ވެސް އިއުލާނުކޮށްފަ އެވެ. އަދި ހުޅުވުމުގެ ކުރިން ވަނީ ޑޮކްޓަރަކާއި ނަރުހުން ހޯދަން ވެސް އިއުލާނުކޮށްފަ އެވެ.

މިތަނަކީ މާލެ ސަރަހައްދުގެ ޕާކުތަކާއި މަގުމައްޗާއި އާންމުން ތަންތަނުގައި އުޅޭ ބުޅާތައް ގިނަވެ، އެ ބުޅާތަކަށް ލިބެމުންދާ އަނިޔާތަކާއި ބުޅަލުން ޖެހޭ ބަލިތަކުން ސަލާމަތްކޮށް، ބުޅާތަކަށް ދިރިއުޅެވޭނެ ރައްކާތެރި މާހައުލެއް ހޯދައިދިނުމަށް ހުޅުވި ތަނެކެވެ.

މިތަނުގައި ބުޅާތައް ކަރަންޓީނު ކުރެވޭ ސަރަހައްދަކާއި ކްލިނިކަކާއި ލެބޯޓްރީއެއް ވެސް ހުންނާނެ އެވެ. ފާމަސީއަކާއި އެ އެއްޗިއްސަށް ދުވެ އުޅެވޭ ސަރަހައްދެއް ވެސް ހަދާފައިވެ އެވެ.