އާ ދާއިރާތަކުން ރާއްޖޭގެ އިގްތިސާދު ފުޅާކުރަން އުއްމީދެއް

މި ސަރުކާރުގެ އެއް އަހަރުގެ ތެރޭގައި، އިގްތިސާދާ ގުޅޭ މުހިއްމު ގިނަ މަޝްރޫއުތައް ފެށީ އިކޮނޮމިކް މިނިސްޓްރީގެ ތެރެއިންނެވެ. އިގްތިސާދު އޮތް ހާލަތުން އަރައިގަންނަން ޕްލޭންތައް އެކުލަވާލައި ބިޔަ މަޝްރޫއުތަކަށް ވަނީ އަމާޒު ހިފައިފަ އެވެ. އެންމެ މުހިއްމު ކަމަކަށް އޮތީ އާ ދާއިރާތަކުން އިގްތިސާދު ފުޅާކޮށް، އާމްދަނީ އިތުރުކުރުމެވެ.

އިކޮނޮމިކް މިނިސްޓަރު ސައީދު "މިހާރު"އަށް ދެއްވި ހާއްސަ އިންޓަވިއުއެއްގައި ވިދާޅުވީ ޑިޖިޓަލް އިގްތިސާދެއް އުފެއްދުމާއި އިގްތިސާދަށް މަންފާތަކެއް ވަންނަ، އަދި ޖީޑީޕީއަށް ހެޔޮ ބަދަލެއް ފެންނާނެ ވަރުގެ މާލީ ދާއިރާއެއް ފުޅާ ކުރުމުގެ ވައުދަށް ބޭނުންވާ މުހިއްމު މަސައްކަތްތަކެއް ވޭތުވެދިޔަ އަހަރެއްހާ ދުވަހުގެ ތެރޭގައި ކުރެވުނު ކަމަށެވެ.

އެންމެ މުހިއްމު މަސައްކަތަކީ، މިނިސްޓަރު ދެކެވަޑައިގަންނަވާ ގޮތުގައި، ޒަމާނުއްސުރެ އިގްތިސާދު ޓޫރިޒަމަށް ބަރޯސާވެފައި އޮތް ވަރު ކުޑަ ކުރަން އެހެން ދާއިރާތަކުން އިގްތިސާދީ ހަރަކާތްތައް އިތުރުކުރަން ފެށުނު މަސައްކަތްތަކެވެ.

ޓޫރިޒަމަކީ ރާއްޖެއަށް މުހިއްމު ދާއިރާއެއް ކަން ފާހަގަކުރައްވައި މިނިސްޓަރު ވިދާޅުވީ، އެ ދާއިރާގެ އިތުރުން ވެސް އެހެން ކަންކަން ކުރެވެން އެބަ ހުރި ކަމަށެވެ.

އާ ސަރުކާރުގެ ފިސްކަލް ސްޓްރެޓެޖީ ސިޔާސަތު ވެސް އެކުލަވައިލީ، އެކަން ވިސްނުމުގައި ބަހައްޓައިގެންނެވެ. އެކަން ލިޔެވި، އެކަމުގެ މަސައްކަތް ސީރިއަސްކޮށް މިހާރު ވަނީ ފެށިފަ އެވެ.

"2025، 2026 އަދި 2027 ގެ ފިސްކަލް ސްޓްރެޓެޖީގައި ހުންނާނެ އިންޓަނޭޝަނަލް ބަންކަރިން، ޑިޖިޓަލް އިކޮނޮމީ އަދި ފައިނޭންޝަލް އިކޮނޮމީން ނަފާވެރިކަން ވެސް އިތުރު ކުރާނެ ވާހަކަ ނުވަތަ އެ އާމްދަނީ ހޯދަން ފަށާނެ ވާހަކަ. މިއީ އުންމީދަކީ،" އޭނާ ވިދާޅުވި އެވެ.

ހަ މަސް ތެރޭ އިހަވަންދިއްޕޮޅު ބަނދަރު ހަދަން ފަށަނީ

އުތުރުގައި ބަނދަރެއް ހަދަން ވޭތުވެދިޔަ 10 އަހަރު ތެރޭގައި ވެސް ވާހަކަ ދެކެވި، ޕްލޭންތައް ހެދުނެވެ.

އެކަމަކު މި އަހަރަކީ ކޮންމެވެސް ސިފައެއްގައި އެކަން ފެށުނު އަހަރެވެ. އޮފް ޝޯ ބަންކަރިން ފެށީ މިދިޔަ ސެޕްޓެމްބަރު މަހު އެވެ. އެއާ އެކު އިންޓަނޭޝަނަލް ހުރިހާ ބޯޓުތަކަށް ވެސް މިހާރު ރާއްޖޭގައި އެ ހިދުމަތް ދޭ ކަން އެނގޭނެ އެވެ.

ދުނިޔޭގައި ވެސް ބަންކަރިން ހިދުމަތް ފުޅާދާއިރާއެއްގައި ކުރާ ވިޓޯލްއާ އެކު އެސްޓީއޯ އިން އޮފް ޝޯ ބަންކަރިން ފެށީ ދެ ބޯޓާ އެކު އެވެ. އެެއީ 3،258 ޓަނުގެ އެމްޓީ މެރިން އޭންޖަލް އާއި 3،929 ޓަނުގެ އެމްޓީ މެރިން ބެލާ އެވެ.

ބަންކަރިން ހިދުމަތް ފެށި އިރު، އެކަމަށް ބޭނުންވާ ބަނދަރާއި އެހެން ހިދުމަތްތައް ފެށުމަށްޓަކައި ވެސް އިކޮނޮމިކް މިނިސްޓްރީން މިހާރު ވަނީ މުހިއްމު މަސައްކަތްތަކެއް ފަށައިފަ އެވެ.

"އަޅުގަނޑުމެން ގަބޫލު ކުރަން ހޯރަފުށި ހިސާބުގައި ބިން ހިއްކައިގެން ބަނދަރު ހަދަން ޖެހޭ ކަން. ކެޕިޓަލް އޭޝިއާ ފަންޑުން 100 މިލިއަން ޑޮލަރުގެ ކޮމިޓްމެންޓެއް ދެއްވާފައި. ކުރިއަށް އޮތް ހަ މަސް ތެރޭ އިހަވަންދިއްޕޮޅު ފަށާނެ،" އޭނާ ވިދާޅުވި އެވެ.

ސައީދު ވިދާޅުވީ ބިން ހިއްކަން ފަށައި، އެ ސަރަހައްދުގެ ބަނދަރަށް ބޭނުންވާ މުހިއްމު އިމާރާތްތައް ވެސް ހަދަން ފަށާނެ ކަމަށެވެ. އެއާ އެކު އިންޓަނޭޝަނަލް ފިއުލް ޓާމިނަލެއް ހަދާނެ އެވެ.

އިސްލާމިކް ފައިނޭންސިންއަށް ހާއްސަ ހަބެއް

އިކޮނޮމިކް މިނިސްޓްރީން ވަނީ ރާއްޖޭގައި ފައިނޭންޝަލް ސެކްޓާއެއް އުފެއްދުމަށް އެކަން މިހާރު ވެސް ފުޅާ ދާއިރާއެއްގައި ކުރަމުން އަންނަ ގައުމުތަކަށް ގޮސް ތަޖުރިބާ ހޯދައިފަ އެވެ. އެ މީހުންގެ ތަޖުރިބާއާ އެކު އެކަމަށް ބޭނުންވާ ޒަމާނީ ގާނޫނެއް އެކުލަވާލުމުގެ މަސައްކަތް ވެސް އަންނަނީ ކުރަމުންނެވެ. އެ ބިލް ޑްރާފްޓު ކުރެވި، މިހާރު ވަނީ އެޓާނީ ޖެނެރަލް އޮފީހަށް ފޮނުވައިފަ އެވެ.

"ވަރަށް ޓެކްނިކަލް ޒަމާނީ ބިލެއް. އިރާދަކުރެއްވިޔާ އެ ބިލް ގާނޫނަކަށް ވެގެން އަންނަ އިރު ސަރަހައްދީ ގައުމުތަކާ ހަމަ އެއްވަރެއްގެ، އެއް ހަމައެއްގެ ގާނޫނެއް ރާއްޖޭގައި ވެސް އޮންނާނެ،" އޭނާ ވިދާޅުވި އެވެ.

ސައީދު ވިދާޅުވި ގޮތުގައި ގަތަރާއި ދުބާއީގެ ފައިނޭންޝަލް ސެންޓަރާ އެކު ހާއްސަ އެއްބަސްވުންތަކެއްގައި ވަރަށް އަވަހަށް ސޮއި ކުރާނެ އެވެ. އެއާ އެކު ލަންޑަންގެ ބައެއް ބޭންކްތަކުގެ އެހީތެރިކަން ވެސް އެކަމުގައި ހޯދާނެ ކަމަށް އޭނާ ވިދާޅުވި އެވެ.

މިނިސްޓަރު ވިދާޅުވީ، ފައިނޭންޝަލް ސެންޓަރެއް ގާއިމްކުރާ އިރު އެކަމުގައި އިސްލާމިކް ފައިނޭންސިންއަށް ހާއްސަވެ، ފުޅާކުރެވޭނެ ޑިމާންޑެއް އެބަ އޮތް ކަމަށެވެ. އެހެންވެ، އެ ދާއިރާ ކުރިއަރުވަން ވިސްނުން ހުރީ އެގޮތަށް ކަމަށް އޭނާ ވިދާޅުވި އެވެ.

އިސްލާމިކް ފައިނޭންސިންގެ އިތުރުން، މެރިޓައިމް ފައިނޭންސިން އާއި ޝިޕް ރަޖިސްޓްރޭޝަންސް ފަދަ މާލީ ހިދުމަތްތައް ތައާރަފްކޮށް ކުރިއެރުންތައް ހޯދިދާނެ ކަމަށް އޭނާ ގަބޫލުކުރައްވަ އެވެ.

ފައިނޭންޝަލް ސެންޓަރުގެ އިތުރުން އެއާޕޯޓް އިކޮނޮމިކް ޒޯނާއި އެގްރިކަލްޗަރަލް ޒޯންގެ ވެސް އަމަލީ މަސައްކަތް އަންނަ އަހަރު ފެށުމަށް ސައީދު ގެންދަވަނީ މަސައްކަތްތައް ކުރައްވަމުންނެވެ.

މިނިސްޓަރު ވިދާޅުވި ގޮތުގައި އެ ބިޔަ މަޝްރޫއުތަކުގެ ބޭނުމަކީ ރާއްޖޭގެ އިގްތިސާދު ފުޅާކޮށް، އާމްދަނީ އިތުރު ކުރުމެވެ. އެއާ އެކު 2028 ވަނަ އަހަރު އަންނަންވާ އިރަށް ރާއްޖޭގެ އުފެއްދުންތެރިކަން 10 ބިލިއަން ޑޮލަރަށް އެރުވުމުގެ މުހިއްމު މަސައްކަތް ކާމިޔާބު ކުރެވޭނެ ކަމުގެ ފުރިހަމަ އުންމީދު އޮތް ކަމަށް އޭނާ ވިދާޅުވި އެވެ.