ޓީޗަރުންގެ ގާބިލްކަން އިތުރުކުރަން އެކި ސަރަހައްދުތަކުގައި ސެންޓަރުތަކެއް އަޅަނީ

ޓީޗަރުންގެ ގާބިލްކަން އިތުރު ކުރަން ރާއްޖޭގެ އެކި ސަރަހައްދުތަކުގައި ސެންޓަރުތަކެއް އަޅަން ނިންމާފައިވާ ކަމަށް އެޑިޔުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވެއްޖެ އެވެ.

ތައުލީމީ ދާއިރާގައި ކުރިއަށް ރާވާފައި ހުރި ކަންކަމާ ގުޅޭ ގޮތުން ދައުލަތުގެ މީޑިއާ، ޕީއެސްއެމް މެދުވެރިކޮށް މިނިސްޓަރު ވިދާޅުވީ އެންމެ އިސްކަންދެއްވާ ކަންކަމުގެ ތެރޭގައި ޓީޗަރުންގެ ފަންނީ ގާބިލުކަން އިތުރު ކުރުން ހިމެނޭ ކަމަށެވެ.

އެކަމަށް ހާއްސަކޮށް، ރާއްޖޭގެ އެކި ސަރަހައްދުތަކުގައި އެޑިއުކޭޝަން ސެންޓާ ފޯ އެކްސެލެންސްގެ ނަމުގައި ސެންޓަރުތަކެއް އެޅުން ހިމެނޭ ކަމަށް އިސްމާއިލް ވިދާޅުވި އެވެ.

"ޓީޗަރުންނަށް ބޭނުންވާ ޕްރޮފެޝަނަލް ޑިވެލޮޕްމަންޓް، ޕްރިންސިޕަލުންނަށް ބޭނުންވާ ޕްރޮފެޝަނަލް ޑިވެލޮޕްމަންޓް، އަދި ސްކޫލު އިވެލުއޭޝަންގެ މަސައްކަތް މިއަށް ވުރެ ހަރުދަނާވެގެން ދާނެ،" މިނިސްޓަރު ވިދާޅުވި އެވެ.

މިނިސްޓަރު ވިދާޅުވި ގޮތުގައި ދަރިވަރުންގެ ތައުލީމީ ރެކޯޑު ބަލަހައްޓާ ސިސްޓަމް، މީމިސްގެ ބަދަލުގައި އާ ސިސްޓަމެއް ތައާރަފްކުރުމުގެ މަސައްކަތް އަންނަނީ ކުރަމުންނެވެ. އެ ސިސްޓަމް މެދުވެރިކޮށް، މިނިސްޓްރީއަށް ބޭނުންވާ މައުލޫމާތާއި ދަރިވަރުންގެ ރެކޯޑުތައް މިހާރަށް ވުރެ ރަނގަޅަށް ބެލެހެއްޓި، ގޮތް ނިންމުމަށް ޓީޗަރުންގެ މައުލޫމާތު ވެސް އޭގައި ހިމަނާނެ ކަމަށް ވިދާޅުވި އެވެ.

މައްސަލައެއް ދިމާވެއްޖެ ހާލަތެއްގައި ވެސް ނުވަތަ އެހެން ބޭނުންތަކަށް އިދާރާއަކަށް މައުލޫމާތު ހިއްސާ ކުރެވޭ ގޮތަށް ފަރުމާކުރާ އާ ސިސްޓަމުން ގޮތް ނިންމާނީ ހެކި ހޯދައިގެން ކަމަށް މިނިސްޓަރު ވިދާޅުވި އެވެ.

ރައީސް ޑރ. މުހައްމަދު މުއިއްޒުގެ ރިޔާސީ ވައުދުތަކުގެ ތެރޭގައި ހިމެނޭ، ދިވެހި ޓީޗަރުން އިތުރު ކުރުމުގެ ޕްރޮގްރާމް މިދިޔަ މަހު ވަނީ ފަށައިފަ އެވެ.

މިނިސްޓަރު ވިދާޅުވީ އެ ޕްރޮގްރާމްގެ ދަށުން ކޮންމެ އަހަރަކު މަދުވެގެން 150 ޓީޗަރުން ތަމްރީނު ކުރުމަކީ އަމާޒެއް ކަމަށެވެ.

ރާއްޖޭގެ 20 އަތޮޅަށް 2،000 އަށް ވުރެ ގިނަ ޓީޗަރުން މިހާރު ވެސް ބޭނުންވެ އެވެ. މިނިސްޓްރީން އަންނަނީ މިހާރު އޭލެވެލް ކިޔަވާ ކުދިންގެ ތެރެއިން ޓީޗިން އިން ކުރިއަށް ދާން ބޭނުންވާ 140 އަށް ވުރެ ގިނަ ކުދިންނަށް މާސްޓާސް އަށް ކިޔެވޭނެ ސްކޮލާޝިޕްތަކެއް ހަމަޖައްސައިދީފަ އެވެ.

އެ ކުދިންނަށް ކޮންމެ މަހަކު 1،500ރ. ގެ އެލަވެންސެއް ވެސް ލިބޭނެ އެވެ.

ޓީޗިން ދާއިރާ އަށް ދިވެހިން އިތުރު ކުރަން އަތޮޅުތަކަށް މިނިސްޓްރީގެ ޓީމުތަކުން ދަތުރުކޮށް ކުރި މަސައްކަތުން ޑިގްރީ ކޯސްތަކުގައި މި އަހަރު 640 މީހުން ބައިވެރިވެފައިވެ އެވެ.