ޖަލު އޮފިސަރުންގެ މައްސަލަ: ތިން ވަނަ މީހާ ވެސް އިއުތިރާފުން ރުޖޫއަވެއްޖެ

މާފުށީ ޖަލަށް ވަގަށް ފޯނާއި މަސްތުވާތަކެތި ވައްދައިގެން ކަރެކްޝަނަލް ސާވިސްގެ އޮފިސަރުންތަކެއް ގިނަ އަދަދެއްގެ ފައިސާ ހޯދިކަމުގެ ތުހުމަތުގައި ދައުލަތުން ދައުވާކުރާ މައްސަލާގައި އިއުތިރާފްގެ އެއްބަސްވުން ހެދި އޮފިސަރަކު އެއްބަސްވުން އަނބުރާ ގެންގޮސްފި އެވެ.

މިދިޔަ ޖޫން މަހު ފުލުހުން ހިންގި އޮޕަރޭޝަނެއްގައި، ޖަލަށް ވަގަށް ތަކެތި ވައްދައިގެން 70 މިލިއަނަށް ވުރެ ގިނަ ރުފިޔާ ހޯދިކަމުގެ ތުހުމަތުގައި ކަރެކްޝަންސްގެ 18 މީހަކު ހައްޔަރުކުރި ނަމަވެސް ދައުލަތުން އެ މައްސަލާގައި ދައުވާކުރަނީ ފަސް މީހެއްގެ މައްޗަށެވެ.

އެއީ ރ. އުނގޫފާރު އައިވަރީހައުސް، ޖިނާހް އަބްދުއްރަހީމާއި ނ. ލަންދޫ ކާމިނީގޭ އަލީ އަސްފާގާއި ކ. މާފުށީ ބީޗްހައުސް އަލީ ޝަހީމާއި ގއ. ވިލިނގިލީ ކުއްޅަވައްގޭ މުހައްމަދު ފަތުހު ފަތުހުﷲ އާއި ހދ. ނޭކުރެންދޫ ތަރާނާގޭ އަލީ ނާޒިމްގެ މައްޗަށެވެ.

އެ މީހުންގެ މައްޗަށް ކުރަނީ ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ދައުވާ އާއި ނުހައްގު މުއްސަނދިކަން ހޯދުމުގެ ދައުވާ އެވެ. އަދި ޖިނާހާއި ޝަހީމްގެ މައްޗަށް މަނީ ލޯންޑްރިންގެ އިތުރު ދައުވާއެއް ވެސް ކުރެ އެވެ.

އޭގެ ތެރެއިން އަސްފާގާއި ނާޒިމާއި ފަތޫހުއާ އެކު ދައުލަތުން އޮތީ އިއުތިރާފްގެ އެއްބަސްވުމެއް ކުރިން ހަދައިފަ އެވެ. އެ އެއްބަސްވުން އޮތްގޮތުން އެ މީހުން ކޯޓުގައި ކުށަށް އެއްބަސްވުމުން އެ މީހުންގެ މައްޗަށް ލުއި އަދަބުތަކެއް ދޭން ދައުލަތުން އެދޭނެ އެވެ. ނަމަވެސް، އިއުތިރާފު އެއްބަސްވުމުން އަސްފާގާއި ނާޒިމް ވަނީ ރުޖޫއަވެ، ދައުވާތަކަށް އިންކާރުކޮށްފަ އެވެ.

މި މައްސަލާގައި މިއަދު އޮތް އަޑުއެހުމުގައި ފަތޫހު ވެސް ވަނީ އިއުތިރާފު އެއްބަސްވުމުން ރުޖޫއަވާކަން ހާމަކޮށްފަ އެވެ. އަދި ދައުވާތަކަށް ވަނީ އިންކާރުކޮށްފަ އެވެ.

އެއްބަސްވުން އަނބުރާ ގެންދާނަމަ، އިތުރު ދައުވާތަކެއް ހިމަނައިގެން އެ މީހުންގެ މައްޗަށް ފަހުން ދައުވާކުރަން ދައުލަތުން ބޭނުންވެ. މައްސަލަ ބައްލަވާ ގާޒީ އިސްމާއިލް ޝަފީއު ފަތޫހުގެ ބައި އަލުން ތަހުގީގު ކުރުމަށްފަހު ހުށަހެޅޭ ގޮތަށް އަނބުރާ ފޮނުވާލަން ނިންމާ ކަމަށެވެ.

ފަތޫހުގެ ވަކީލް ނޫރުއްސަލާމް އަބޫބަކުރު ވަނީ އޭނާގެ އަބުރު ގެއްލޭ ގޮތަށް ދައުލަތުގެ އިދާރާތަކުން މީޑިއާތަކުގައި ދައްކާ ވާހަކަތަކާ ގުޅޭ ގޮތުން ވެސް ކަންބޮޑުވުން ފާޅުކުރައްވައިފަ އެވެ. ނޫރު ވިދާޅުވީ ކުށް ސާބިތު ނުވެ އަދި ކޯޓަށް މައްސަލަ ވެސް ހުށަނާޅަނީސް ކުށްވެރިއެއްގެ ގޮތަށް ސިފަކޮށް ފަތޫހުގެ އެތައް ހައްގުތަކެއް ގެއްލޭ ގޮތަށް ދައުލަތުގެ އިދާރާތަކުން އަމަލުކުރަމުންދާ ކަމަށެވެ.

މީގެކުރިން ފަތޫހުގެ ފަރާތުން ވަނީ އަޑުއެހުންތައް ސިއްރުކުރަން ވެސް އެދިފަ އެވެ. ވަކީލް ވިދާޅުވީ ދައުލަތުގެ މުއައްސަސާއެއްގެ މުވައްޒަފުންތަކެއްގެ މައްޗަށް ކޮރަޕްޝަންގެ ތުހުމަތުކޮށް ހިންގާ ޝަރީއަތެއް އާންމުކޮށް ހުޅުވާލުމުން މުޖްތަމައުގެ އާންމު އަހްލާގީ މިންގަނޑަށް ނޭދެވޭ އަސަރުކުރާ ކަމަށެވެ.

މީގެ އިތުރުން ތުހުމަތު ކުރެވޭ މީހުންނަކީ ކުށްވެރިން ކަމަށް ދޭހަވާ ގޮތަށް މުޖްތަމައުއަށް ގަބޫލު ކުރެވޭނެ ކަމަށް ވެސް އޭނާ ވިދާޅުވި އެވެ. ނަމަވެސް ދައުލަތުން ބުނީ އެ ޝަރީއަތް ހިނގާ ގޮތް އާންމުންނަށް އެނގެން ޖެހޭނެ ކަމަށާއި އަދި ސިއްރު ކުރަންޖެހޭ އެއްވެސް ސަބަބެއް ނެތް ކަމަށް ދައުލަތުން ބުންޏެވެ. ގާޒީ ޝަފީއު ވެސް ނިންމެވީ އެ މައްސަލަ ސިއްރު ކުރަންޖެހޭ ސަބަބެއް ނެތް ކަމަށެވެ.