ތޮއްޑޫގެ އެކަޑަމީ މުބާރާތުގެ ޗެމްޕިއަންކަން ވެސް ސަސް އިން ހޯދައިފި

ފފއއ. ތޮއްޑޫގެ ރިދަން އެކަޑަމީން ބޭއްވި 16 އަހަރުންދަށުގެ މުބާރާތުގެ ޗެމްޕިއަންކަން ސުޕަ ޔުނައިޓެޑް ސްޕޯޓްސް އެކަޑަމީން ހޯދައިފި އެވެ.

ހޮނިހިރު ދުވަހު ހަވީރު ކުޅުނު ފައިނަލު މެޗު، ސަސްގެ އެކަޑަމީން ކާމިޔާބު ކުރީ ބީޖީ ސްޕޯޓްސް އެކަޑަމީގެ މައްޗަށް 3-0 މޮޅުވެގެންނެވެ.

ސަސްގެ އައިދާން ވަނީ ދެ ލަނޑު ޖަހައިފަ އެވެ. އަނެއް ލަނޑު ޖެހީ ޝަޔާން އެވެ. މުބާރާތުގެ މޮޅު ކުޅުންތެރިޔާގެ މަގާމު ވެސް ހޯދީ ޝަޔާން އެވެ.

އެންމެ މޮޅު ގޯލް ކީޕަރަކަށް ހޮވުނީ ބީޖީ އެކަޑަމީގެ މުހައްމަދު ޝިބާން އެވެ. އެންމެ މޮޅު ޑިފެންޑަރަކަށް ހޮވުނީ ސަސްގެ އަލީ ހައިޒުމް ހަސަން އެވެ. އެންމެ މޮޅު މިޑްފީލްޑަރަކަށް ހޮވުނީ ބީޖީގެ އިބްރާހިމް އަޔާން އެވެ. އެންމެ މޮޅު ފޯވާޑަކަށް ހޮވުނީ އާޖީލަކަށް އެކަޑަމީގެ އާއިދު މުހައްމަދެވެ.

އެންމެ ގިނަ ގޯލް ޖެހި ކުޅުންތެރިޔާގެ އެވޯޑް ހޯދީ ސަސްގެ އާކިފް ބިން މުހައްމަދެވެ. އޭނާ ވަނީ ފަސް ގޯލް ޖަހައިފަ އެވެ.

ސަސްގެ 16 އަހަރުންދަށުގެ މި ޓީމުން ވަނީ، ސެޕްޓެމްބަރު މަހު މެލޭޝިއާގައި ބޭއްވި ލަލީގާ ޔޫތު މުބާރާތުން ތިންވަނަ ހޯދައިފަ އެވެ.

ސޮކަ ވެޓަރަންސުން މި މަހު ބޭއްވި 14 އަހަރުންދަށުގެ އެކަޑަމީ މުބާރާތުގެ ޗެމްޕިއަންކަން ވެސް ހޯދީ ސަސްއިންނެވެ.

ތޮއްޑޫ ރިދަން ސްޕޯޓްސް އެކަޑަމީން ބޭއްވި މުބާރާތުގައި ހަ އެކަޑަމީއަކުން ވާދަކުރި އެވެ. އެއީ ރިދަން އެކަޑަމީ ޓީމުގެ އިތުރުން ސަސް އާއި ބީޖީ އާއި އާޖީލަކަށް އެކަޑަމީ މާފުށީ ނިއު ސްޓާ އެކަޑަމީގެ ޓީމެވެ.