ސަސް އެކަޑަމީގެ ދެ ޓީމެއް ތައިލެންޑްގެ ޖޫނިއާ މުބާރާތެއްގައި ވާދަކުރަނީ

ސުޕަ ޔުނައިޓެޑް ސްޕޯޓްސް އެކަޑަމީގެ ދެ ޓީމެއް، ތައިލެންޑްގައި ބާއްވާ އިންޓަނޭޝަނަލް މުބާރާތެއްގައި ވާދަކުރަން ނިންމައިފި އެވެ.

ތައިލެންޑްގެ އެންމެ ވަރުގަދަ އެއް ކްލަބް ޗިއަންގްމާއީން އެ ސިޓީގައި ބާއްވާ "ޗިއަންގްމާއީ އިންޓަނޭޝަނަލް ފުޓްބޯލް ފެސްޓިވަލް" އޮންނާނީ ޑިސެމްބަރު 4-12 އަށެވެ.

ޖުލައި މަހު މެލޭޝިއާގައި ބޭއްވި ލަލީލީގާ ޔޫތު މުބާރާތުގެ 16 އަހަރުންދަށުގެ ބައިގައި ވާދަކޮށް ސަސްގެ އެކެޑަމީ ޓީމުން ވަނީ ތިންވަނަ ހޯދައިފަ އެވެ.

ތައިލެންޑް މުބާރާތުގައި ސަސްގެ 12 އަހަރުންދަށުގެ ޓީމާއި 14 އަހަރުންދަށުގެ ޓީމަކުން އެ މުބާރާތުގައި ވާދަ ކުރާނެ އެވެ.

ސަސް އެކަޑަމީގެ ހެޑް ކޯޗު ފަރީދު މުހައްމަދު ބުނީ ލަލީގާގެ ޔޫތު މުބާރާތަށް ފަހު، ސަސްގެ އެކަޑަމީ އާއި ޗިއަންގްމާއީއާ ދެމެދު ރަނގަޅު ގުޅުމެއް އުފެދިފައިވާ ކަމަށެވެ.

ލަލީގާ ޔޫތު މުބާރާތުގެ ސެމީ ފައިނަލުގައި ސަސްގެ އެކަޑަމީ ޓީމު ބަލިވީ ޗިއަންގްމާއީ ޓީމު އަތުންނެވެ.

"އެ މުބާރާތަށް ފަހު ޗަންގްމާއީ އާ އަޅުގަނޑުމެންނާ ރަނގަޅު ގުޅުމެއް އުފެދިފަ. އެ މުބާރާތުގައި [ލަލީގާ ޔޫތު މުބާރާތުގައ] އަޅުގަނޑުމެންގެ ޕާފޯމަންސް ފެނުނީމަ ޗިއަންގްމާއީގެ އޮފިޝަލުން ވެސް ވަރަށް އިމްޕްރެސް ވެފައި. އަޅުގަނޑުމެންގެ ގާތުން އެދުނު ތިމަންނަމެން ބޭނުމޭ ސަސްގެ އެކަޑަމީ ތައިލެންޑްގެ މުބާރަތަށް އަންނަން،" ފަރީދު ބުންޏެވެ.

ސަސްގެ އެކަޑަމީގެ 14 އަހަރުންދަށުގެ ޓީމު ތިބި ގިނަ ކުޅުންތެރިނަކީ 2022 ގައި ބޭއްވި އެފްއޭއެމް 12 އަހަރުންދަށުގެ ޔޫތު ލީގު ޗެމްޕިއަންކަން ހޯދި ޓީމުގެ ކުޅުންތެރިންނެވެ.

އެ ކުޅުންތެރިން ހިމެނުނު ޓީމުން ވަނީ މިދިޔަ އަހަރު އިންޓަ ސްކޫލް 13 އަހަރުންދަށުގެ މުބާރާތުގެ ޗެމްޕިއަންކަން ވެސް ހޯދާފަ އެވެ.

ފަރީދު ބުނީ، ސަސްގައި އޮތް 14 އަހަރުންދަށުގެ އެ ޓީމާ މެދު އޭނާ ބޮޑު އުއްމީދެއް އެބައޮތް ކަމަށެވެ.

"އުއްމީދަކީ އިންޓަނޭޝަނަލް އެކަޑަމީ މުބާރާތެއްގެ ތަށި ރާއްޖެ ގެނައުން،" ފާރީދު ބުންޏެވެ.