އެއް އަހަރު ތެރޭ ފެނުނީ އުއްމީދެއް، އަމާޒެއް ނެތް ސަރުކާރެއް: އިބޫ

ރައީސް ޑރ. މުހައްމަދު މުއިއްޒުގެ ސަރުކާރުގެ އެއް އަހަރު ފެނުނީ އެއްވެސް އުއްމީދެއް، އަމާޒެއް ނެތް ސަރުކާރެއްގެ ގޮތަށް ކަމަަށް ކުރީގެ ރައީސް އިބްރާހިމް މުހައްމަދު ސޯލިހު (އިބޫ) ވިދާޅުވެއްޖެ އެވެ.

ރާއްޖެ ޓީވީއަށް ދެއްވި އިންޓަވިއުއެއްގައި އިބޫ ވިދާޅުވީ މި ސަރުކާރަށް މިއަދު އަހަރެއް ފުރޭއިރު ރައްޔިތުން ވައްޓާލާފައި ވަނީ މާޔޫސްކަމާއި ބިރުވެރިކަމެއްގެ ތެރެއަށް ކަމަށެވެ.

އިބޫ ވިދާޅުވި ގޮތުގައި ރައީސް މުއިއްޒު ވެރިކަމަށް ވަޑައިގެން، އެމަނިކުފާނު އެންމެ ފުރަތަމަ މަސައްކަތް ފެއްޓެވީ ނޫސްވެރިކަމާ ދެކޮޅަށެވެ. އަހަރަށް ވީއިރު އެމަނިކުފާނު ވަނީ ސަރުކާރުގެ ބާރުގެ ދަށަށް ނޫސްވެރިކަން ގެންދިއުމަށް ގާނޫނީ ގޮތުން މަސައްކަތް ފައްޓަވައިފައި ކަމަށް ވެސް ވިދާޅުވި އެވެ.

އިބޫ އިޝާރާތް ކުރެއްވީ ނޫސްވެރިންނާއި މީޑިއާތައް ޖޫރިމަނާކޮށް އަދި މީޑިއާތަކުގެ ލައިސަންސް ބާތިލް ކުރެވޭ ގޮތަށް ތުޅާދޫ ދާއިރާގެ އަމިއްލަ މެމްބަރު އަބްދުލް ހަންނާން އަބޫބަކުރު މަޖިލީހަށް ހުށަހެޅުއްވި ބިލަށެވެ.

"އޭގައި [ބިލުގައި] މިއޮތީ އުފައްދަވާ ނޫސްވެރިކަމާ ބެހޭ ކޮމިޓީގެ ދަށުން މެޖޯރިޓީ ރައީސް އައްޔަންކުރައްވާ ބޭފުޅުން، ހަތް ބޭފުޅުންގެ ތެރެއިން ހަތަރު ބޭފުޅުން އެއީ ރައީސް އައްޔަންކުރައްވާ ބޭފުޅުންގެ ގޮތުގައި ތިބެގެން މުޅި މީޑިއާ ކޮންޓްރޯލްކުރުމުގެ މަސައްކަތް ފަށާފައި،" ރާއްޖެ ޓީވީގެ "ފަށާއިރު" ޕްރޮގްރާމުގައި އިބޫ ވިދާޅުވި އެވެ.

އެމަނިކުފާނު ވިދާޅުވި ގޮތުގައި މީޑިއާތައް ހިންގަންވާ ގޮތުގެ ބާރު ދެނީ އެ ކޮމިޝަނަށެވެ.

އަމިއްލަ މެމްބަރަކު ހުށަހެޅުއްވިޔަސް އެއީ ސަރުކާރުން ގެންނަ ބަދަލެއް ކަމަށް ދޭހަވާ މޭރުމުން އިބޫ ވިދާޅުވީ ކޮމިޝަނަށް ދީފައިވާ ބާރުގެ ތެރޭގައި މީޑިއާއެއްގެ މައްސަލަ ބަލާ ނަމަ، އެ މައްސަލަ ބަލައި މުއްދަތުގައި އެ މީޑިއާއެއް ސަސްޕެންޑްކުރެވޭ ކަމަށެވެ.

"މިއީ ޑިމޮކްރަސީއެއްގައި އެޅޭނެ އެންމެ ނުރައްކާތެރި އެއް ފިޔަވަޅު،" ކަންބޮޑުވުން ފާޅުކުރައްވައި އިބޫ ވިދާޅުވި އެވެ.

މަޖިލީހަށް މިހާރު ހުށަހަޅާފައި އޮތް ބިލަށް އިބޫ ފާޑުވިދާޅުވި އިރު އެމަނިކުފާނުގެ ވެރިކަމުގައި ވެސް ނޫސްވެރިންގެ ކަންބޮޑުވުން އޮތް، ހެއްކާ ބެހޭ ބިލް އެމްޑީޕީގެ އަޣުލަބިއްޔަތު އޮތް މަޖިލީހުން ފާސްކޮށް، ތަސްދީގު ކުރެއްވި އެވެ.

އެ ގާނޫނުގެ 136 ވަނަ މާއްދާގައިވާ ގޮތުން ޓެރަރިޒަމާއި ގައުމީ ސަލާމަތާ ގުޅުން ހުރި މައްސަލަތަކުގައި ނޫސްވެރިންނަށް، މަސްދަރު ހާމަކުރަން ކޯޓަށް މަޖުބޫރު ކުރެވޭނެ އެވެ. މި މާއްދާ އިސްލާހުކުރަން ތަކުރާރުކޮށް ނޫސްވެރިން އެދެމުން ދިޔަ ނަމަވެސް އެ ބަދަލެއް ނުގެނެ އެވެ.

މަސްވެރިކަމާ ގުޅޭ ގޮތުން، އިބޫ ވިދާޅުވީ މިދިޔަ އެއް އަހަރަކީ ރާއްޖޭގެ ތާރީހުގައި ވެސް މަސްވެރިން އެންމެ ހާލުގައި އުޅުނު ދުވަސްވަރު ކަމަށެވެ. މަސްވެރިންނަށްވީ ވައުދުތައް ވެސް މިހާތަނަށް ފުއްދައިދެވިފައި ނުވާ ކަމަށް ވިދާޅުވި އެވެ.

"20ރ. އަށް ވުރެ ބޮޑު އަގުގައި މަސް ގަންނާނަމޭ. އަދި 48 ގަޑިއިރުގެ ތެރޭގައި އޭގެ އަގު މަސްވެރިންނަށް ލިބޭނެ ކަމާއި އަދި ޑޮލަރުން ފައިސާ މަސްވެރިންނަށް ދޭނެ ކަމަށް ވި ވައުދު. އެކަމަކު 16ރ. އަށް މަސް ގަނެފައި އެ ފައިސާ ނުދެވިގެން އެ އުޅެނީ،" އިބޫ ވިދާޅުވި އެވެ.

އެމަނިކުފާނު ވިދާޅުވީ ޓޫރިޒަމް ދާއިރާ އާއި ޓެކްސީ ޑްރައިވަރުންގެ ހާލަކީ ވެސް އެއީ ކަމަށާއި މިއަދު ރައްޔިތުން ސިއްހީ ފަރުވާ އަށް ސަލާން ޖަހަން ޖެހިފައިވާ ހާލަތަށް ހިނގައްޖެ ކަަމަށެވެ.

އެފަދަ ސަބަބުތަކާ ހުރެ ސަރުކާރުގެ ސިޔާސަތުތައް އޮތީ ނާއުއްމީދީކޮށް ކަމަށް ވިދާޅުވި އެވެ.

"މިހެން ގޮސް މުޅި ސަރުކާރުގެ ސިޔާސަތުގެ އަމާޒު ހުރި ގޮތުން އަޅުގަނޑު ދަންނަވާނީ ނާއުއްމީދު، އެއްވެސް ކަހަލަ، ވީ ވައުދާ ހިލާފު، އެތައް ދޮގުތަކެއްގެ މައްޗަށް ބިނާވެގެން ކުރިއަށްދާ ސަރުކާރެކޭ މިއީ،" އިބޫ ވިދާޅުވި އެވެ.

އެމަނިކުފާނު ވިދާޅުވި ގޮތުގައި އެ ގޮތަށް ސިޔާސަތުތައް ބައްޓަންކޮށްގެން ކުރިއަށްދާ ނަމަ، މި ސަރުކާރުގެ ސަބަބުން ރައްޔިތުންނަށް ކުރިމަތިވާނީ ވަރަށް ދަތި އުނދަގޫ ދުވަސްތަކެކެވެ.