އަނަންތު އަންބާނީ މަކުނުދޫއަށް: ގަތީ މުސަޅަކާއި ކުކުޅެއް

އިންޑިއާގެ މަހުޖަނު މުކޭޝް އަމްބާނީގެ ހަގު ފިރިހެން ދަރިފުޅު އަނަންތު އަންބާނީ ރާއްޖެ އައިސް، ހދ. މަކުނުދޫއަށް ގޮސްފި އެވެ.

ހދ. އަތޮޅު މަކުނުދޫގެ ބޮޑު ފަޅު ތެރޭ އޮންނަ ސޮނެވާ ސީކްރެޓްގައި އަންނަތު އާއި އޭނާގެ އަންހެނުން ރާދިކާ މާޗެންޓް ގެންދަނީ ޗުއްޓީ ހޭދަކުރަމުންނެވެ.

އޭނާ މިއަދު ކުއްލި ގޮތަކަށް މަކުނުދޫއަށް ދިޔައީ ޖެޓްސްކީއެއްގަ އެވެ. އަދި ރަށު ތެރެއަށް އެރުމަށް ފަހު ދިމާވި މީހުން ގާތު އެންމެ ފުރަތަމަ ވެސް އޭނާ އޮޅުންފިލުވީ ކުކުޅާއި މުސަޅެއް ލިބޭނެ ތަނެކެވެ.

އެ ރަށުން ވާހަކަ ދެއްކި މީހަކު ކިޔައިދިން ގޮތުގައި މުސަޅާއި ކުކުޅު ގެންގުޅޭ ގެއަކަށް އަނަންތު ގޮސް 400 ރުފިޔާ އަށް މުސަޅަކާއި ކުކުޅެއް ގަތެވެ.

އެ ރަށުގައި ދޫނި ގެންގުޅޭ ގެއެއް ހޯދައި، އެގެއަށް ވެސް އޭނާ ދިޔަ އެވެ. ނަމަވެސް، އެ ގޭގައި އެ ވަގުތު މީހަކު ނޫޅޭތީ އަނަންތު އަނބުރާ ދިޔައީ އެވެ. އަނަންތު މަކުނުދޫއިން ފައިބައިގެން ޖެޓްސްކީގައި އަނބުރާ ދިޔައިރު އޭނާގެ ބޮޑީގާޑުންނާއި ރިސޯޓްގެ މުވައްޒަފުންނާ އެކު ލޯންޗެއް އައިސް އެރަށުގައި އޮތެވެ.

އޭނާ މަކުނުދޫއަށް ދިޔައީ ޖެޓްސްކީގަައި އެކަންޏެވެ. ނަމަވެސް ފަހަތުން އެހެން ޖެޓްސްކީއެއްގައި ބޮޑީގާޑެއް ވެސް ދިޔަ އެވެ.

އަނަންތު އަންބާނީއަކީ ޖަނަވާރުން ގެންގުޅުމަށް ވަރަށް ލޯބިކުރާ މީހެކެވެ. އޭނާއަކީ އިންޑިއާގެ އަދި މުޅި ދުނިޔޭގައި ވެސް ހުންނަ އެންމެ ބޮޑު އެނިމަލް ޝެލްޓާގެ ވެރިޔާ އެވެ. އެތަނުގައި ގިނަ އަދަދެއްގެ އެތާއި އެހެން ވެސް ޖަނަވާރުން، އޭގެ ވެށި ނުގެއްލޭ ގޮތަށް ގެންގުޅެ އެވެ.

އެ ތަނަކީ އަނަންތު ހިލޭ ސާބާހަށް ކުރާ މަސައްކަތުގެ ތެރެއިން ހަދާފައިވާ ތަނެކެވެ. ޖަނަވާރުން ބެލެހެއްޓުމަށް ގިނަ އަދަދެއްގެ މުވައްޒަފުން ވެސް އޭނާ ގެންގުޅެ އެވެ.

އަނަންތު އަންބާނީ ޗުއްޓީ ހޭދަކުރަމުންދާ ސޮނެވާ ސީކްރެޓަކީ ރާއްޖޭގެ އެންމެ ހުޅަނގަށް އޮތް މަކުނުދޫ ރައްޔިތުން ޕިކްނިކަށް ގޮސް އުޅުނު ދިއްޕަރަފުށީގައި ސޮނޭވާ އިން ތަރައްގީކުރި ރިސޯޓެކެވެ. އެއީ އެންމެ ބޮޑަށް ޕްރައިވެސީ ލިބޭ އެންމެ އެކަހެރި ރިސޯޓްގެ ގޮތުގައި ތަރައްގީ ކޮށްފައިވާ ތަނެކެވެ.