ކެފޭ ޑި މާލެއަށް ގެއްލުން ދިނީ ގުރޫޕްތަކުގެ މެދުގައި ޖެހުނު މައްސަލައެއްގެ ބަދަލު ހިފަން: ޕޮލިސް

ހެލްމެޓް އަޅައި، މޫނު ނިވާކޮށްގެން ނުރައްކާތެރި ހަތިޔާރާ އެކު "ކެފޭ ޑި މާލެ" އަށް ވަދެ އެތަނުގެ ތަކެއްޗާއި އިމާރާތަށް ގެއްލުން ދިނީ، ގްރޫޕްތަކުގެ މެދުގައި ޖެހުނު މައްސަލައެއްގައި ބަދަލު ހިފުމުގެ ގޮތުން ކަމަށް ފުލުހުން މިއަދު ބުނެފި އެވެ.

ފުލުހުން ބޭއްވި ނޫސްވެރިންގެ ބައްދަލުވުމުގައި ގޭންގް ކްރައިމް އެންފޯސްމަންޓް ޑިޕާޓްމެންޓްގެ ހެޑް، ސުޕްރިންޓެންޑެންޓް އޮފް ޕޮލިސް އާރިފް ވިދާޅުވީ މިދިޔަ މަހުގެ 24 ވަނަ ދުވަހު އެ ކެފޭއަށް ގެއްލުން ދިނީ ދުރާލާ ރާވައިގެން ކަން ތަހުގީގަށް އެނގިފައިވާ ކަމަށެވެ.

ކެފޭގެ ކޭޝް ކައުންޓަރުގެ ސޭފްޓީ ބިއްލޫރިގަނޑު ތަޅާލައި، ހެދިކާ ޑިސްޕްލޭ ކުރަން ބަހައްޓާފައި ހުރި ޝޯކޭސްގެ ބިއްލޫރިތައް ތަޅާލައި ބޭނުން ނުކުރެވޭ ވަރަށް ވަނީ ހަލާކުކޮށްފަ އެވެ. މީގެ އިތުރުން ކެފޭގައި ބޭނުންކުރާ އެހެނިހެން ތަކެއްޗަށް ވެސް ގެއްލުންދީފައިވާ ކަމަށް އާރިފް ވިދާޅުވި އެވެ.

"އެ މީހުން ލައިގެން ތިބި އަންނައުނުތަކުގެ މަތިން އިތުރު އަންނައުނު ލައިގެން އަދި އެ މީހުން މޫނު ނިވާކުރުމުގެ ގޮތުން އެ މީހުން ތިބީ ސާޖިކަލް މާސްކު ވެސް އަޅައިގެން ކަމަށް ފާހަގަވި،" އޭނާ ވިދާޅުވި އެވެ.

އާރިފް ވިދާޅުވީ ކެފޭއަށް ގެއްލުން ދިނީ މަރުތޭލަކުން ކަމަށެވެ. ހަމަލާ ދިން އިރު ލައިގެން ތިބި އަންނައުނާއި ހެލްމެޓު، މާލޭގައި ހަދަމުން އަންނަ އިމާރާތެއްގެ ތެރެއަށް އެއްލާލާފައި ހުއްޓައި ހޯދާފައިވާ ކަމަށް ވެސް އޭނާ ވިދާޅުވި އެވެ.

އޭނާ ވިދާޅުވި ގޮތުގައި އެ ހަމަލާ ދިނީ ގޭންގްތަކުގެ މެދުގައި އޮތް ހިޔާލު ތަފާތުވުންތަކުގެ ތެރެއިންނެވެ. އެއީ މަސްތުވާތަކެއްޗާ ގުޅުން ހުރި މައްސަލަތަކެއް ކަމަށް އޭނާ ވިދާޅުވި އެވެ.

"އެއީ މާލެ އާއި ހުޅުމާލޭގައި ޖިނާއީ ކުށްކުރާ ގުރޫޕްތަކުގެ މެދުގައި ސިލްސިލާކޮށް ހިންގަމުން އަންނަ ހަމަނުޖެހުންތަކާ ގުޅިގެން ބަދަލު ހިފުމުގެ ރޫހުގައި ހިންގާފައިވާ އަމަލެއް ކަން ވަނީ ދެނެގަނެވިފައި،" އާރިފް ވިދާޅުވި އެވެ.

އެ ތަނަށް ގެއްލުން ދޭން އަމަލީ ގޮތުން ބައިވެރިވީ ދެ މީހެކެވެ. އެ މީހުންނަށް އެހީތެރިވާން އެހެން މީހަކު ކުރީބައިގައި އެ ތަނަށް ގޮސް ވީޑިއޯ ކޮށްފައިވާ ކަމަށް ފުލުހުން ބުންޏެވެ.

އެ މައްސަލައިގެ ތުހުމަތުގައި މިހާތަނަށް ތިން މީހަކު ވަނީ ހައްޔަރުކޮށްފަ އެވެ. ފުލުހުން ބުނި ގޮތުގައި އެ އެންމެންނަކީ ވެސް ކުށުގެ ރެކޯޑު އޮންނަ މީހުންނެވެ.