މޮރިޝަސްގެ އިދިކޮޅު ލީޑަރަށް ބޮޑު ކާމިޔާބީއެއް

މޮރިޝަސްގެ އާންމު އިންތިހާބުގައި އާދަޔާ ހިލާފް ބޮޑު ކާމިޔާބީއަކާ އެކު އެ ގައުމުގެ އިދިކޮޅު ލީޑަރު ނަވީން ރަމްގޫލަމް ތިން ވަނަ ފަހަރަށް ބޮޑުވަޒީރު ކަމުގެ މަގާމު ހޯއްދަވައި މަގާމުގެ ހުވާކުރައްވައިފި އެވެ.

އާދީއްތަ ދުވަހު ނެގި ވޯޓުގައި ރަމްގޫލަމްގެ އެލަޔަންސް އޮފް ޗޭންޖް ކޯލިޝަނުން ވަނީ މޮރިޝަސްގެ ގާނޫނު ހަދާ މަޖިލީހުގެ 66 ގޮނޑީގެ ތެރެއިން 60 ގޮނޑި ކާމިޔާބުކޮށްފަ އެވެ.

މި ބޮޑު ކާމިޔާބީއާ އެކު، 77 އަހަރުގެ ރަމްގޫލަމް 10 އަހަރަށް ފަހު އެނބުރި ވަޑައިގެން ވިދާޅުވީ "މިއީ އާދަޔާ ހިލާފް" ކާމިޔާބީއެއް ކަމަށެވެ.

"އަޅުގަނޑުގެ އަމާޒަކީ މޮރިޝަސް އަކީ ދިރިއުޅެން ރަނގަޅު ތަނެއްކަން ކަށަވަރުކުރުން،" ފަސް އަހަރުގެ ދައުރަކަށް އިންތިހާބުވި ރަމްގޫލަމް ވިދާޅުވި އެވެ.

މީގެ ކުރިން ދެ ފަހަރަށް ބޮޑުވަޒީރުކަން ކުރައްވާފައިވާ ރަމްގޫލަމް އަށް ވޯޓުގެ 62.6 ޕަސެންޓް ލިބިވަޑައިގަތް އިރު އޭނާއާ ވާދަކުރެއްވި އުމުރުން 62 އަހަރުގެ ބޮޑުވަޒީރު ޕްރަވިންދް ޖަގްނައުތުގެ އިއްތިހާދަށް ލިބުނީ 27.8 ޕަސެންޓް ވޯޓެވެ.

ޖުގްނައުތާއި ރަމްގޫލަމް އަކީ ވެސް 1968 ވަނަ އަހަރު މޮރިޝަސް އަށް އިނގިރޭސިވިލާތުގެ އަތްދަށުން މިނިވަންކަން ލިބުނު ފަހުން އެ ގައުމުގައި ވެރިކަންކުރާ ބާރުގަދަ ދަރިކޮޅުގެ ބޭފުޅުންނެވެ.

މީގެ ކުރިން ޑޮކްޓަރުކަމާއި ގާނޫނީ ވަކީލުކަން ވެސް ކުރެއްވި ރަމްގޫލަމް ވަނީ 1995 ވަނަ އަހަރުން ފެށިގެން 2000 ވަނަ އަހަރާ ހަމައަށް އަދި 2005 އިން 2014 އަށް ބޮޑުވަޒީރުކަން ކުރައްވައިފަ އެވެ. އޭނާއަކީ މޮރިޝަސް އަށް މިނިވަންކަން ހޯދައިދިން ސީވޫސަގުރް ރަމްގޫލަމްގެ ދަރިކަލުންނެވެ.

އެފްރިކާގެ އެހެން ގައުމުތަކާ އަޅާބަލާއިރު އިގްތިސާދީ އަދި ސިޔާސީ ހަމަޖެހުން ބޮޑު ގައުމެއްގެ ގޮތުގައި ބެލެވޭ އިންޑިޔާ ކަނޑުގެ މި ޖަޒީރާގެ އިންތިހާބުތަކުގައި ގިނަފަހަރަށް މުޅި މަޖިލީސް އެއްކޮށް ކަހަލަ ގޮތަކަށް ލިބެނީ އިންތިހާބު ކާމިޔާބުވާ ކޯލިޝަނަކަށެވެ.

މޮރިޝަސްގައި ބޮލަކަށް ޖެހޭ އާމްދަނީ ގާތްގަނޑަކަށް 10،000 ޑޮލަރަށް އަރާއިރު، ވޯލްޑް ބޭންކުގެ 2022 ވަނަ އަހަރުގެ ތަފާސް ހިސާބުތައް ދައްކާ ގޮތުން، ހިންގުން ގޯސްވެ، ކޮރަޕްޝަން އިތުރުވެ އަދި އިގްތިސާދު ޑައިވާސިފައި ނުކުރެވުމުގެ ބިރު އެ ގައުމަށް އެބަ އޮތެވެ. -- އޭއެފްޕީ