މީޑިއާތައް ކޮންޓްރޯލް ކުރުމަކީ ގަބޫލުކުރާ ހަމައެއް ނޫން: ރައީސް

ސަރުކާރުން މީޑިއާތައް ކޮންޓްރޯލް ކުރުމަކީ އެމަނިކުފާނު ގަބޫލުފުޅު ކުރައްވާ ކަމެއް ނޫން ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

މޯލްޑިވްސް މީޑިއާ ކައުންސިލް (އެމްއެމްސީ) އާއި މޯލްޑިވްސް ބްރޯޑްކާސްޓިން ކޮމިޝަން (އެމްބީސީ) އުވާލުމަށްފަހު ސަރުކާރަށް ކޮންޓްރޯލް ލިބޭ ގޮތަށް މީޑިއާ ކޮމިޝަނެއް އުފެއްދުމަށް ތުޅާދޫ ދާއިރާގެ މެމްބަރު އަބްދުލްހަންނާނު އަބޫބަކުރު ވަނީ މިއަދު މަޖިލީހަށް ބިލެއް ހުށަހަޅުއްވައިފަ އެވެ.

އެ ބިލް އޮތީ ނޫސްވެރިންނާއި މީޑިއާތައް ޖޫރިމަނާކޮށް އަދި އެ ތަންތަނުގެ ލައިސެންސް ހިފެހެއްޓުމުގެ ބާރު މީޑިއާ ކޮމިޝަނަށް ލިބޭ ގޮތަށެވެ. ނަމަވެސް، އެއީ ނޫސްތަކާއި ޓީވީތަކުގައި "ތަޅު އެޅުވުން" ކަމަށް ސިފަކޮށް، ނޫސްވެރިން ދަނީ ކަންބޮޑުވުން ފާޅުކުރަމުންނެވެ.

އެކަމާ ގުޅިގެން ރައީސް މުއިއްޒު އެކްސްގައި ކުރެއްވި ޕޯސްޓުގައި ވިދާޅުވީ ނޫސްތަކާއި މީޑިއާތައް ކޮންޓްރޯލް ކުރުމަކީ އެ މަނިކުފާނު ގަބޫލުފުޅު ކުރައްވާ ހަމައެއް ނޫން ކަމަށެވެ. އަދި އިސްލާމްދީނާއި ރާއްޖޭގެ ގާނޫނު އަސާސީއާ ހިލާފު ނުވާހާ ހިނދެއްގައި ރާއްޖޭގެ ކޮންމެ ސަރަހައްދެއްގައި ހުރި ކޮންމެ ދިވެއްސަކަށް ވެސް އަމިއްލަ މިނިވަންކަމާއެކު އެ މީހަކު ބޭނުން ކަމެއް ކުރުމުގެ ހައްގު އޮންނާނެ ކަމަށް އެމަނިކުފާނު ވިދާޅުވި އެވެ.

އެ ބިލް ހުށަހެޅުއްވީ އަމިއްލަ މެމްބަރެއް ވިޔަސް، އެ ބިލަށް ތާއީދު ކުރުމާ ގުޅޭގޮތުން ސަރުކާރު ހިންގާ ޕާޓީ ކަމަށްވާ ޕީއެންސީން އަދި ވަކި ގޮތެއް ނުނިންމަ އެވެ.

ޕީއެންސީގެ ޕީޖީ ލީޑަރު، އިނގުރައިދޫ ދާއިރާގެ މެމްބަރު އިބްރާހިމް ފަލާހު ވިދާޅުވީ އެ ބިލާ މެދު ގޮތެއް ނިންމާނީ ޕާލަމެންޓަރީ ގްރޫޕްގައިި މަޝްވަރާ ކުރުމަށް ފަހު ކަމަށެވެ.

މީޑިއާ ކޮމިޝަންގެ ބިލް ހުށަހެޅުއްވި މެމްބަރު ހަންނާން "މިހާރު"އަށް ވިދާޅުވީ އެ ބިލް ހުށަހެޅުއްވީ އެއްވެސް ޕާޓީއެއްގެ ތާއީދާއެކު ނޫން ކަމަށެވެ. އަދި ނޫސްވެރިންނާއި މީޑިއާތަކުގެ ކަންބޮޑުވުންތައް ހުއްޓަސް، އެ ބިލް އަނބުރާ ގެނައުމުގެ ވިސްނުމެއް ނެތް ކަމަށް އޭނާ ވިދާޅުވެފައިވެ އެވެ.

ސުލޫކީ މިންގަނޑާ ހިލާފު ވެއްޖެނަމަ 5،000ރ. އާއި 50،000ރ. އާ ދެމެދުގެ އަދަދަކުން މީޑިއާތައް ޖޫރިމަނާކޮށް، އަދި ވަކިވަކި ނޫސްވެރިން ވެސް 5،000ރ. އާއި 10،000ރ. އާ ދެމެދުގެ އަދަދަކުން ޖޫރިމަނާ ކުރުމުގެ ބާރު އެ ބިލް އޮތްގޮތުން ކޮމިޝަނަށް ލިބެ އެވެ. އަދި ނޫސްތަކުގެ ލައިސަންސް ބާތިލް ކުރެވެ އެވެ.