ރިޔާސީ ކޮމިޝަންތައް ހަދައި ސިޔާސީ މީހުން ފަހައި ދުވާ މަންޒަރު ނުފެންނާނެ: ރައީސް

ވެރިކަން ބަދަލުވުމާ އެކު ކުރީގެ ސަރުކާރުތަކުން ކަން ކޮށްފައިވާ ގޮތަށް، ރިޔާސީ ކޮމިޝަންތައް ހަދައި ސިޔާސީ ވާދަވެރިން ފަހަތުން ދުވެ، ހައްޔަރުކޮށް ޖަލަށްލާ މަންޒަރު މި ސަރުކާރުގައި ނުފެންނާނެ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.

ޖުމްހޫރީ ދުވަހުގެ ޖަލްސާގައި ރައީސް ވިދާޅުވީ ކެމްޕެއިން ތެރޭގައި ވެސް އެމަނިކުފާނު ފާހަގަކުރެއްވި ގޮތަށް ބަދަލު ހިފުމުގެ ރޫހު މި ގައުމުން ނައްތާލައްވާފައިވާ ކަމަށެވެ.

އެމަނިކުފާނުގެ ވާދަވެރިއަކަށް ވީތީ ހައްޔަރުކޮށް، ޖަލަށްލަމުން އަންނަ މަންޒަރު މި ސަރުކާރުގެ މިހާތަނަށް ފެނިފައި ނޯންނާނެ ކަމަށާއި ކުރިއަށް އޮތްތަނުގައި ވެސް ނުފެންނާނެ ކަމަށް ރައީސް ވިދާޅުވި އެވެ.

"ސިޔާސީ މީހަކަށްވީތީ އަޅުގަނޑުގެ ވާދަވެރިޔާ، އެއީ ސިޔާސީ ވާދަވެރިއަކަށް ވީތީ ގެންގޮސް ހިފައި ހައްޔަރުކޮށް ޖަލަށްލާ ތަނެއް ނުފެންނާނެ. ކުރިއަށް އޮތް ތަނުގައި ވެސް ނުފެންނާނެ،" ދަރުބާރުގޭގައި ރޭ ބޭއްވި ޖަލްސާގައި ރައީސް ވިދާޅުވި އެވެ.

މިދިޔަ ސަރުކާރުތަކަށް އިޝާރާތް ކުރައްވައި ރައީސް ވިދާޅުވީ އެކި ގޮތް ގޮތުން ސިޔާސީ މީހުން ފްރޭމްކޮށް، އަނިޔާވެރިކަމާ އެކު އެ މީހުން ޖަލަށް ގެންގޮސް އަނިޔާކޮށްފައިވާ ކަމަށެވެ. ގާތް ތިމާގެ މީހުންނާއި ރައްޓެހިން ހިމެނޭ ގޮތަށް އެ މީހުންނަކީ ސިޔާސީ މީހެއް ނަމަ، އެ މީހުން ސިޔާސީ މައިދާނުން އެއް ފަރާތް ކުރުމަށް އެކި ގޮތްގޮތުން ފްރޭމްކުރަމުން ދިޔަ ކަމަށް އެމަނިކުފާނު ވިދާޅުވި އެވެ.

ރައީސް ވިދާޅުވީ މި ސަރުކާރު ހަވާލުވުމާ އެކު އެ ހުރިހާ ކަމެއް ނިމިފައިވާ ކަމަށެވެ.

"އެއީ ތިމާގެ މީހެއް ވިޔަސް ރައްޓެއްސެއް ވިޔަސް ކޮންމެ މީހެއް ވިޔަސް ސިޔާސީ މީހެއް ވިއްޔާ ދުރަށްލާ އެއްކައިރި ކުރުމުގެ ޒަމާން މި ގައުމުން އިރާދަކުރެއްވިއްޔާ ތާއަބަދަށް މި ވެރިކަން ފެށުނު ދުވަހުން ފެށިގެން އެ ވަނީ ގޮސްފައި. އިރާދަކުރެއްވިއްޔާ އެކަމެއް ދެން މިރާއްޖެ އަކު ނުފެންނާނެ،" ރައީސް ވިދާޅުވި އެވެ.

ރައީސް ވިދާޅުވީ ސިޔާސީ ބޭނުމަށް ރިޔާސީ ކޮމިޝަން ހަދައިގެން ނުބެލިޔަސް ރައްޔިތުންގެ މުދަލުން ވައްކަންކުރުމާއި ގައުމުގެ މުދަލަށް ނުހައްގުން އަރާފައިވާ ނަމަ، އެ އޮންނަ އުސޫލުގެ ދަށުން އެމީހެއްގެ މައްސަލަ ބެލުމުގެ ޒިންމާ އޮންނަ މުއައްސަސާތަކެއް އެބަހުރި ކަމަށެވެ.

"މި ސަރުކާރަކުން ނުފެންނާނެ ރިޔާސީ ކޮމިޝަންތައް ހަދައިގެން ކުރީގެ މީހުން ކުރަމުންދިޔަ ކަންކަމަށް ސިޔާސީ ގޮތުން ވަނަން ތަނެއް. އެހެނެއް ނޫން. ވައްކަން ކޮށްފައި ހުރިއްޔާ، ގައުމުގެ މުދާ ނުހައްގުން ހޯދާފައި ހުރިއްޔާ ބަލާނަން. ރައްޔިތުންގެ މުދަލަށް އަރައިގެންފައި ހުރިއްޔާ ބަލާން،" އެމަނިކުފާނު ވިދާޅުވި އެވެ.

ރައީސް ވިދާޅުވި ގޮތުގައި ސިޔާސީ ގޮތުން އެކަކު އަނެކަކަށް ޖައްސާލައި އަނިޔާ ދިނުމާއި ބަދަލު ހިފުމުގެ ރޫހު ގެންގުޅުމަކީ ރައްޔިތުން އެދޭ ކަމެއް ނޫނެވެ.

"މިނިވަން މުއައްސަސާތައް އެބަހުރި. ދުސްތޫރީ ނިޒާމު އެބަ އޮތް، ޝަރުއީ ނިޒާމު އެބަ އޮތް. ކުރީގައި ފެނުނު ގޮތަށް ކޮމިޝަންތައް ހަދައިގެން ސިޔަސީ ގޮތުން މީހުންގެ ފަހަތުން ދުވެ، ގައުމުގެ ހަމަޖެހުން ނަގާލައި ބަދަލު ހިފުމުގެ ރޫހު ގެނައުމަކީ ރައްޔިތުން އެދޭ ގޮތެއް ނޫން."

ރައީސް ވިދާޅުވި ގޮތުގައި އެމަނިކުފާނު ވެރިކަން ކުރައްވަމުން ގެންދަވަނީ ރައްޔިތުން އެދޭ ގޮތަށް ރައްޔިތުންގެ ފަޅީގައި ހުންނަވައިގެންނެވެ. އެ އިމުން ބޭރުވެވަޑައިގެން، ކުރިން ކަންކަން ކުރައްވާފައިވާ ގޮތަށް މި ސަރުކާރުގެ ކަންކަން ކުރިއަށް ނުގެންދަވާނެ ކަމަށް ވިދާޅުވި އެވެ.

ރިޔާސީ ކޮމިޝަންތައް ހަދައި ސިޔާސީ މީހުންގެ ފަހަތުން ނުދާނެ ކަމަށް ރައީސް ވިދާޅުވި އިރު، މިދިޔަ ސަރުކާރުގައި ވެސް ރިޔާސީ ދެ ކޮމިޝަނެއް ހަދައި، އޭގެ ކުރީގެ ވެރިކަމުގެ މައްސަލަތައް ބެލި އެވެ. އެކަމަކު ފަސް އަހަރު ނިމުނު އިރު، ނަތީޖާ އެއް ނުނެރެވެ އެވެ. އޭގެ ކުރީގެ ވެރިކަންތަކުގައި ވެސް އެކި ނަން ނަމުގައި ރިޔާސީ ކޮމިޝަން ހަދައި މައްސަލަތައް ބެލި އެވެ.