ގުޅިފަޅުގެ އެންމެ ފުން ސަރަހައްދު ވަރަށް އަވަހަށް ހިއްކަން ފަށާނެ: މިނިސްޓަރު

ގުޅިފަޅުގައި ނުހިއްކާ އޮތް ބައި ވަރަށް އަވަހަށް ހިއްކަން ފަށާނެ ކަމަށް ހައުސިން މިނިސްޓަރު ޑރ. އަލީ ހައިދަރު ރޭ ވިދާޅުވެއްޖެ އެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ގުޅިފަޅުން މާލޭ މީހުންނަށް ގޯތި ދީ ރަޖިސްޓްރީ ވެސް ހަވާލުކޮށްފައި ވަނިކޮށް މި ސަރުކާރުން އެތަނުގެ ލޭންޑް ޔޫސް ޕްލޭން ބަދަލުކޮށް ގޯތި ލިބޭ ތަންތަން ވަނީ އަލުން ކަނޑައަޅައިފަ އެވެ.

ޕީއެސްއެމްގެ "ރާއްޖެ މިއަދު" ޕްރޮގްރާމްގައި މިނިސްޓަރު ވިދާޅުވީ ވަރަށް އަވަހަށް ގުޅިފަޅު ބިން ހިއްކަން ފެށޭނެ ކަމަށާއި މީހުންނަށް ލިބުނު ގޯތިތައް ހަވާލުކުރެވޭނީ އެތަން ހިއްކާ ނިމުމުން ކަމަށެވެ.

"އަދި ނެތް ގުޅިފަޅުން ގޯތިތައް ހަވާލުކުރެވޭކަށް. އެކަމަކު މިހާރު އެ ހުރީ ގޯތި ލިބޭނެ ތަން ކަނޑައަޅައި ގުރުއަތުލާ ނިންމާފައި. ގުޅިފަޅުގައި ވެސް އެބަ އޮތް ހިއްކަން ޖެހޭ ސަރަހައްދެއް، އެންމެ ފުން ސަރަހައްދު. އެ މަސައްކަތް ވަރަށް އަވަހަށް ފެށިގެންދާނެ،" ހައިދަރު ވިދާޅުވި އެވެ.

ކުރީ ސަރުކާރުން ނެދަލެންޑްސްގެ ބޮސްކާލިސް ކުންފުންޏާ ހަވާލުކޮށްގެން ގުޅިފަޅުން ވަނީ 150 ހެކްޓަރުގެ ބިން ހިއްކައިފަ އެވެ. އެ މަސައްކަތް ނިމުނީ މި އަހަރު އެވެ. ނަމަވެސް، ރައީސް ޑރ. މުހައްމަދު މުއިއްޒު ވަނީ ގުޅިފަޅުން އަދި އިތުރު 85 ހެކްޓަރުގެ ބިން ހިއްކަން ނިންމަވައިފަ އެވެ.

އެމްޓީސީސީއާ ހަވާލުކޮށްގެން ގުޅިފަޅުން އިތުރަށް ހިއްކަން ނިންމާފައިވާ 85 ހެކްޓަރުގެ ބިން ހިއްކުން ލަސްވަނީ އެކަމަށް ބޭނުންވާ ފައިސާ ހަމަނުޖެހޭތީ ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް ވަނީ މިދިޔަ މަހު ވިދާޅުވެފައި އެވެ.

ލޭންޑް ޔޫސް ޕްލޭނަށް ގެނައި ބަދަލާ އެކު، ގުޅިފަޅުން އިތުރު 3،520 ގޯތި ދޫކުރަން ވަނީ ނިންމައިފަ އެވެ. ހުޅުމާލެ އާއި ގުޅިފަޅު އަދި ގިރާވަރުފަޅު ހިމެނޭ ގޮތަށް މާލޭ މީހުންނަށް މި ސަރަހައްދުން 9،000 އަށް ވުރެ ގޯތި ދޫކުރަން ކުރީގެ ސަރުކާރުން އޮތީ ނިންމައިފަ އެވެ.