ގުޅިފަޅު ގޯތިތަކުގެ ގުރުއަތާ މެދު ޝަކުވާއަށް ހުޅުވާލައިފި

ގުޅިފަޅުގެ ގޯތިތައް އެތަނުގެ އާ ލޭންޑް ޔޫސް ޕްލޭނާ އެއްގޮތަށް ބަދަލުކުރުމަށް، ގޯތި ލިބުނު މީހުންގެ މެދުގައި އަލުން ގުރުނަގާފައިވާއިރު އެ ކަމާ ގުޅޭ ގޮތުން ޝަކުވާއެއް އޮތް ނަމަ ހުށަހަޅަން ހުޅުވާލައިފި އެވެ.

ގުޅިފަޅާއި ގިރާވަޅު ފަޅުން ގޯތި ލިބުނު މީހުންނަށް ކުރީ ސަރުކާރުން އޮތީ ގޯތި ލިބޭ ތަން ކަނޑައަޅައި ގޯތީގެ ރަޖިސްޓްރީ ވެސް ހަވާލުކޮށްފަ އެވެ. އެކަމަކު މި ސަރުކާރުން ގުޅިފަޅުގެ ލޭންޑް ޔޫސް ޕްލޭން އެއްކޮށް ބަދަލުކުރުމުން ގޯތި ދޫކުރާ ސަރަހައްދުތަކަށް ވެސް ބަދަލުތަކެއް ވަނީ އައިސްފަ އެވެ.

ހައުސިން މިނިސްޓްރީން ކުރި އިއުލާނުގައި ވަނީ ފޯމު ނަމްބަރާއި ލޮޓް ނަމްބަރާއި އެ ގޯތިތަކުގެ ބޮޑު މިނުގެ ތަފްސީލު ހިމެނޭ ލިސްޓެއް މިއަދު އާންމުކޮށްފަ އެވެ. އެ ލިސްޓާ ގުޅިގެން އެއްވެސް ޝަކުވާއެއް އޮތް ނަމަ، އަންނަ މަހުގެ 7 ވަނަ ދުވަހުގެ މެންދުރު 2:00 ގެ ކުރިން ހިޔާވެހި ޕޯޓަލް މެދުވެރިކޮށް ޝަކުވާ ހުށަހެޅުމަށް ވަނީ ހުޅުވާލައިފަ އެވެ.

ގުޅިފަޅުން މިހާރު ދޫކުރަން ނިންމާފައި ވަނީ 3،520 ގޯއްޗެވެ. މީގެ ތެރޭގައި ގިރާވަޅު ފަޅުން ލިބުނު ގޯތި ގުޅިފަޅަށް ބަދަލުކުރަން ލިބުނު ފުރުސަތުގައި އެ ގޯތި ބަދަލުކުރި މީހުން ވެސް ހިމެނެ އެވެ.

ގުޅީފަޅުން ދޫކުރާ ގޯތިތަކުގެ ތަފްސީލުތައް:

- 1،250 އަކަފޫޓުގެ 669 ގޯތި

- 1،650 އަކަފޫޓުގެ 1،234 ގޯތި

- 2،050 އަކަފޫޓުގެ 916 ގޯތި

- 2،450 އަކަފޫޓުގެ 473 ގޯތި

- 2،850 އަކަފޫޓުގެ 158 ގޯތި

- 3،250 އަކަފޫޓުގެ 49 ގޯތި

- 3،650 އަކަފޫޓުގެ 21 ގޯތި

ގުޅިފަޅުން 150 ހެކްޓަރުގެ ބިން ހިއްކަން ނެދަލެންޑްސްގެ ބޮސްކާލިސް ކުންފުންޏާ ހަވާލުކުރީ ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި 2019 ވަނަ އަހަރު އެވެ. އެ މަސައްކަތް އެއްކޮށް ނިމުނީ މި އަހަރު އެވެ. އެކަމަކު ގުޅިފަޅުން އިތުރު 85 ހެކްޓަރުގެ ބިން ހިއްކަން ރައީސް ޑރ. މުހައްމަދު މުއިއްޒު ވަނީ ނިންމަވައިފަ އެވެ.

އެކަމަކު ބިން އިތުރަށް ހިއްކުމަށް ފައިސާ އަދިވެސް ހަމަނުޖެހެ އެވެ. އެމްޓީސީސީއާ އެކު އެމްއޯޔޫއެއްގައި ސޮއިކޮށް، އެކަމަށް ފައިނޭންސް ހޯދުމުގެ މަސައްކަތް ކުރަމުން އަންނަ ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވިދާޅުވެ އެވެ.