ހޮސްޕިޓަލްތަކަށް "ރެންސަމްވެއާ" ހަމަލާތަކެއް؛ ސަމާލުވާން އެދެފި

ހޮސްޕިޓަލްތަކަށް ރެންސަމްވެއާ ހަމަލާތަކެއް ދޭތީ އެކަމަށް ސަމާލުވުމަށް ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) އާއި 50 ގައުމަކުން އިއްޔެ އދ.ގައި ކަންބޮޑުވުން ފާޅުކޮށް އެކަން ސަމާލުކަމަށް ގެނެސްފި އެވެ.

ރެންސަމްވެއާ އަކީ ޑިޖިޓަލް ބްލެކްމެއިލްގެ ބާވަތެކެވެ. މީގެ ހަމަލާތަކުގައި ހެކަރުން އަމިއްލަ ފަރުދުންނާއި ކުންފުނިތައް ނުވަތަ މުއައްސަސާތަކުގެ ޑޭޓާ އެންކްރިޕްޓްކޮށް، ހެކަރުން ބޭނުންވާ އަދަދަކަށް ފައިސާ ދިނުމުން ނޫނީ އެ މައުލޫމާތަށް އަލުން އެކްސެސް ނުވެވޭ ގޮތް ހަދަ އެވެ.

ހޮސްޕިޓަލްތަކަށް ދޭ މިފަދަ ހަމަލާތަކަކީ އެތައް ބައެއްގެ ފުރާނަޔާ ގުޅޭ މައްސަލައެއް ކަމަށް، އެމެރިކާގެ އިސްނެގުމަށް އދ.ގައި ބޭއްވި ބައްދަލުވުމުގައި ޑަބްލިއުއެޗްއޯގެ ވެރިޔާ ޓެޑްރޯސް އަދަނޮމް ގެބްރިޔޭސުސް ވިދާޅުވި އެވެ.

"ސާވޭތަކުން ދައްކާ ގޮތުގައި ސިއްހީ ދާއިރާއަށް ދޭ ހަމަލާތަކުގެ ބޮޑުކަމާއި ހަމަލާ ދިނުމުގެ އަދަދު ވެސް ދަނީ އިތުރުވަމުން" ކަމަށާއި އެކަމާ ދެކޮޅަށް ބައިނަލްއަގުވާމީ އެއްބާރުލުން މުހިންމު ކަމަށް ޓެޑްރޮސް ވިދާޅުވި އެވެ.

ރެންސަމްވެއާ ފަދަ ސައިބަ ކްރައިމްގެ ސަބަބުން ބައިނަލްއަގްވާމީ ސަލާމަތަށް ވަރަށް ބޮޑު ނުރައްކަލެއް ކުރިމަތިވެފައިވާ ކަމަށާއި އެއީ އެފަދަ ކަމެއްގެ ގޮތުގައި ސަލާމަތީ މަޖިލީހުން ބެލުމަށް އޭނާ ގޮވާލެއްވި އެވެ.

ދެކުނު ކޮރެއާ، ޔޫކްރެއިން، ޖަޕާން، އާޖެންޓީނާ، ފްރާންސް، ޖަރުމަނު އަދި އިނގިރޭސިވިލާތް ހިމެނޭ ގޮތަށް 50 އަށް ވުރެ ގިނަ ގައުމުތަކުން ގުޅިގެން ނެރުނު ބަޔާނުގައި ވެސް ވަނީ މި އިންޒާރު ދީފަ އެވެ.

އެ ބަޔާނުގައި ވަނީ ރެންސަމްވެއާ ހަމަލާތައް ދިނުމުގައި ޒިންމާވާ ފަރާތްތަކަށް "އެނގިހުރެ" އެކަން ކުރުމަށް ދޫކޮށްލައިގެން ތިބޭ ގައުމުތައް ކުށްވެރިކޮށްފަ އެވެ.

އެމެރިކާގެ ޑެޕިއުޓީ ނޭޝަނަލް ސެކިއުރިޓީ އެޑްވައިޒަރު އޭން ނިއުބާ ދެއްވި ބަޔާނެއްގައި ބުނެފައިވަނީ މި ހަމަލާތަކުގެ ސަބަބުން އާންމުންގެ ސަލާމަތަށް ސީދާ ނުރައްކާ ކުރިމަތިވެ، މުހިންމު ސިއްހީ ހިދުމަތްތައް ލަސްވެ، އިގްތިސާދީ ގޮތުން ބޮޑެތި ގެއްލުންތަކެއް ލިބި، ބައިނަލްއަގުވާމީ ސުލްހަ އާއި ސަލާމަތަށް ނުރައްކާވެދާނެ ކަމަށެވެ.

މި ބައްދަލުވުމުގައި ނިއުބާގާ ސީދާ ރަޝިޔާގެ ނަން ފާހަގަކުރައްވައި ވިދާޅުވީ، "ބައެއް ގައުމުތަކުން - ހާއްސަކޮށް ރަޝިއާ - އިން ރެންސަމްވެއާ ހަމަލާތައް ދޭ މީހުންނަށް އެ ފުރުސަތު ދީ، އެ މީހުންނަށް އެއްވެސް އަދަބެއް ނުދޭ" ކަމަށެވެ. ފްރާންސާއި ދެކުނު ކޮރެއާ އިން ވަނީ މި އަމަލުތައް އުތުރު ކޮރެއާ އިން ވެސް ހިންގާ ކަމަށް ތުހުމަތުކޮށްފަ އެވެ.

ސަލާމަތީ މަޖިލީހަކީ ސައިބަ ކްރައިމް އަށް ހައްލެއް ގެނައުމަށް އެންމެ އެކަށީގެންވާ ފޯރަމެއް ނޫން ކަމަށް ބުނެ ރަޝިއާއިން ވަނީ ދިފާއުގައި ވާހަކަ ދައްކައިފަ އެވެ. -- އޭއެފްޕީ