ހިޔާ ފްލެޓެއްގައި ރަހީނުކުރި މީހަކު ސަލާމަތްކޮށް، 12 މީހުން ހިފަހައްޓައިފި

ހުޅުމާލެ ފޭސް ދޭއްގެ ހިޔާ ފްލެޓެއްގައި ރަހީނުކޮގެން ގެންގުޅުނު މީހަކު ސަލާމަތްކޮށް، 12 މީހަކު ހިފަހައްޓައިފި އެވެ.

"މިހާރު" އަށް އެނގިފައިވާ ގޮތުގައި މި ހާދިސާ ހިނގީ އެޗް9 ޓަވަރުގެ އެޕާޓްމަންޓެއްގެ ތެރޭގަ އެވެ. ރަހީނުކުރި މީހާ ސަލާމަތްކޮށް، އެތަނުގައި ފުލުހުން އަންނަނީ ހަރަކާތްތެރިވަމުންނެވެ.

އެ ފްލެޓުގައި ތިބި 12 މީހަކު އެ މައްސަލައާ ގުޅިގެން ހިފަހައްޓައި، ހައްޔަރުކުރުމަށް މަސައްކަތް ކުރަމުން އަންނަ ކަން އެނގިފައިވެ އެވެ.

އެކަމާ ގުޅިގެން ފުލުހުންގެ މީޑިއާ އޮފިޝަލަކު ވިދާޅުވީ އެފަދަ ހާދިސާއެއް ރިޕޯޓުކޮށްގެން ފުލުހުން ހަރަކާތްތެރިވަމުން އަންނަ ކަމަށެވެ. އެކަމަކު ތަފްސީލު އަދި ނުލިބޭ ކަމަށް ވިދާޅުވި އެވެ.

އެހެންވެ، އެ މީހާ ރަހީނުކުރި ސަބަބެއް އަދި ހޭދަވި ދުވަހެއް ވެސް އަދި ސާފެއް ނުވެ އެވެ.

ހިޔާ ފްލެޓުގައި މީހުން ރަހީނުކުރާ މައްސަލަތައް މިފަހުން ވަރަށް ބޮޑުވެފައިވާއިރު މީހުންނަށް އޮޅުވާލައިގެން ފްލެޓަށް ގެންގޮސް ރަހީނުކޮށް ފޭރެމުންދާ މައްސަލަތައް ވެސް ވަނީ އެތަނުގައި އިތުރުވެފަ އެވެ.