ސްޕާއެއްގައި ހަށިވިއްކަން އުޅުނު ފަސް މީހަކު އަތުލައިގެންފި

މާލޭ ހިންގަމުންދިޔަ ސްޕާއެއް ކޯޓު އަމުރެއްގެ ދަށުން ފާސްކޮށް، ފަސް މީހަކު ހައްޔަރުކޮށްފި އެވެ.

ފުލުހުން ބުނީ ހެންވޭރު ގެއެއްގައި ހިންގާ ސަރާ ސެލޫން އެންޑް ސްޕާ ބަލައި ފާސްކުރީ އެ ތަނުގައި ހަށިވިއްކާ ކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން ހިންގި އޮޕަރޭޝަނެއްގައި ކަމަށެވެ.

އެ މައްސަލާގައި ހައްޔަރުކޮށްފައިވަނީ ދިވެހި ފިރިހެނަކާއި ތައިލެންޑްގެ ހަތަރު އަންހެނުންނެވެ. އެއީ:

- ގއ. ކަނޑުހުޅުދޫ، މުހައްމަދު އިމްރާން، 42 އަހަރު

- ސަލިނީ ޔަމްޑީ، 30 އަހަރު

- ޗަޔަނިޓް ޕިލާ، 30 އަހަރު

- ވިލައިޕޯން ކޮޓްވޮންގް، 24 އަހަރު

- ތިޕްސުދާ ސަންގްހަމް، 33 އަހަރު

އެ ފަސް މީހުންގެ ބަންދާ މެދު ގޮތެއް ނިންމަން ކްރިމިނަލް ކޯޓަށް ހާޒިރު ކުރުމުން، ތިޕްސުދާ ސަންގްހަމް 15 ދުވަހަށް އަދި ދެންތިބި ހަތަރު މީހުން ހަތް ދުވަހަށް ބަންދުކުރުމަށް ވަނީ އަމުރު ކޮށްފައިވާ ކަމަށް ޕޮލިހުން ބުންޏެވެ.

މާލޭގައި ޕްރޮފެޝަނަލް މަސާޖުކުރާ ކަމަށް ބުނެ ގިނަ އަދަދަކަށް މަސާޖު ޕާލާތައް ހިންގި ނަމަވެސް އެއީ ފުޅާ ދާއިރާއެއްގައި ހަށިވިއްކާ ތަންތަން ކަމުގެ ތުހުމަތު އެތައް ބަޔަކު ކުރެ އެވެ. އަދި އެކަންކުރާ ބިދޭސީން ދަނީ އެ މީހުންގެ ފޮޓޯ އާއި ނަމްބަރު ވެސް ޖަހައިގެން ސޯޝަލް މީޑިއާގައި އިޝްތިހާރު ކުރަމުންނެވެ.

އެފަދަ ސްޕާތައް ހުއްޓުވުމަށް ދޭތެރެ ދޭތެރެއިން އޮޕަރޭޝަންތައް ހިންގަ އެވެ. ނަމަވެސް ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ފަށާފައިވާ މަސައްކަތުގެ ތެރެއިން، ބިދޭސީން ދިރިއުޅޭ ތަންތަން ފާސް ކުރުމާއި ގަވާއިދާ ހިލާފަށް އުޅޭ ބިދޭސީން ހޯދުމުގެ ހާއްސަ އޮޕަރޭޝަނެއް މިހާރު ދަނީ ކުރިއަށެވެ.

އެގޮތުން މިދިޔަ މަހު ދެވަނަ ދުވަހު ހިންގި އޮޕަރޭޝަނެއްގައި ވެސް ވަނީ ފުޅާ ދާއިރާއެއްގައި ހަށިވިއްކަމުންދިޔަ ހަ މީހަކު ހައްޔަރުކޮށްފަ އެވެ. އަދި މިދިޔަ މަހުގެ 15 ވަނަ ދުވަހު ހިންގި އޮޕަރޭޝަނެއްގައި ވަނީ ހަތް މީހަކު ހައްޔަރުކޮށްފަ އެވެ.

ގަވާއިދާ ހިލާފަށް އުޅޭ ބިދޭސީން ހޯދައި، އެ މީހުން ރާއްޖެއިން ފޮނުވާލަން ކުރިއަށް ގެންދާ އޮޕަރޭޝަނުގައި މިހާތަނަށް 4،000 އަށް ވުރެ ގިނަ ބިދޭސީން ޑީޕޯޓްކޮށްފައިވެ އެވެ. މިހާރު ވެސް އެ އޮޕަރޭޝަން ކުރިއަށް ގެންދާއިރު، ބައެއް ބިދޭސީން ވަނީ ފިލަން ބައެއް ރަށްރަށަށް ވެސް ގޮސްފަ އެވެ.