ރާއްޖޭގެ ޓޫރިޒަމް ކުރިއަރުވާނީ ތިމާވެށި ރައްކާތެރިކޮށްގެން: ފައިސަލް

ދެމެހެއްޓެނިވި ގޮތެއްގައި ރާއްޖޭގެ ޓޫރިޒަމް ޕްރޮމޯޓް ކުރާއިރު ތިމާވެށި ރައްކާތެރި ކުރުމަށް ކުރިއެރުވުމަށް މަސައްކަތް ކުރާނެ ކަމަށް ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވެއްޖެ އެވެ.

ދުނިޔޭގެ ޓޫރިޒަމް ދާއިރާގައި ބާއްވާ އެންމެ ބޮޑު ފެއާ، ވޯލްޑް ޓްރެވެލް މާކެޓް (ޑަބްލިއުޓީއެމް) ގައި ބައިވެރިވެވަޑައިގަތުމަށް އިނގިރޭސިވިލާތުގައި ހުންނެވި ފައިސަލް ވަނީ ކޮމަންވެލްތުގެ "ސަސްޓެއިނަބަލް އެންޑް ރިޖެނެރޭޓިވް ޓޫރިޒަމް" ބައްދަލުވުމުގައި ރާއްޖެ ތަމްސީލު ކުރައްވައިފަ އެވެ.

ރިޖެނެރޭޓިވް ޓޫރިޒަމަކީ ތިމާވެށްޓާއި ލޯކަލް ކޮމިއުނިޓީތަކަށް ލިބޭ ގެއްލުން އެންމެ ކުޑަކުރެވޭނެ ގޮތަކަށް އެކަން ކުރުމެވެ.

ޓޫރިޒަމް މިނިސްޓްރީން ބުނި ގޮތުގައި އެ ބައްދަލުވުމުގައި ފައިސަލް ވަނީ ތިމާވެށި ހިމާޔަތްކުރުމަށް އަވަސް ފިޔަވަޅުތަކެއް އެެޅުމަށް ގޮވާލައްވައިފަ އެވެ. އަދި ގުދުރަތީ ވަސީލަތްތައް ރައްކާތެރިކުރުމަކީ އިހްތިޔާރެއް ނޫން ކަމަށާއި އެއީ އަންނަން އޮތް ޖީލުތަކަށް ކޮންމެހެން ކޮށްދޭން ޖެހޭ ކަމެއް ކަމަށް ފައިސަލް ވިދާޅުވި އެވެ.

އެ ބައްދަލުވުމަށް ފަހު ކުރެއްވި ޕޯސްޓެއްގައި ފައިސަލް ވިދާޅުވީ އެންމެން އެކުގައި ޓޫރިޒަމް ކުރިއަރުވާ އިރު، ތިމާވެށި ހިމާޔަތް ކުރުމަށް މަސައްކަތް ކުރުމާ އެކު މުޖުތަމައުގެ ކުރިއެރުމަށް މަސައްކަތް ކުރަންޖެހޭ ކަމަށެވެ.

ފައިސަލް ވަނީ ކޮމަންވެލްތުގައި ދެމެހެއްޓެނިވި ގޮތެއްގައި ކަންކަން ކުރިއެރުވުމަށް ކުރާ މަސައްކަތަށް ރާއްޖެއިން ފުރިހަމަ އެއްބާރުލުން ދޭނެ ކަމަށް ވެސް ވިދާޅުވެފަ އެވެ.

ޑަބްލިއުޓީއެމް ފެއާއަކީ ޓޫރިޒަމް ދާއިރާގެ ފަރާތްތައް ބައްދަލުކޮށް، ވިޔަފާރީގެ ގުޅުންތައް ބަދަހި ކުރުމުގެ ފުރުސަތު ލިބޭ ފެއާ އެކެވެ. ބޭރުގެ އެކި ޓްރެވެލް އެޖެންސީތަކާ ގުޅުން ބަދަހިކޮށް ބީޓުބީ ބައްދަލުވުންތައް ކުރިއަށް ގެންދަން ވެސް ފުރުސަތު ލިބެ އެވެ.

ފައިސަލް ކުރިން ވިދާޅުވި ގޮތުގައި މި ފެއާގައި އައްޑޫގެ ޓޫރިޒަމް ޕްރޮމޯޓް ކުރުމަށް މަސައްކަތް ކުރާނެ އެވެ.