ޕާޓީތަކަށް ދޭ ފައިސާ މަދުކުރުމުގެ ބިލް މުޅި މަޖިލީހުގެ ކޮމިޓީއަށް

ސިޔާސީ ޕާޓީތަކަށް ދައުލަތުގެ ބަޖެޓުން ދޭ ފައިސާ މަދުކުރަން ސަރުކާރުގެ ފަރާތުން ގާނޫނަށް ހުށަހަޅާފައިވާ އިސްލާހު ބަލައިގަނެ، ރައްޔިތުންގެ މަޖިލީހުގެ މުޅި މަޖިލީހުގެ ކޮމިޓީއަށް ފޮނުވައިފި އެވެ.

މި ބިލު މަޖިލީހަށް ބަލައިގަނެ މުޅި މަޖިލިސް ކޮމިޓީއަށް ފޮނުވާފައިވަނީ 60 މެންބަރުންގެ ވޯޓުންނެވެ. އެ ބިލާ ދެކޮޅަށް ފަސް މެންބަރުން ވޯޓު ދެއްވި އެވެ.

ދިއްދޫ ދާއިރާގެ ޕީއެންސީގެ މެންބަރު އަބްދުއްލަތީފް މުހައްމަދު ހުށަހެޅުއްވި އެ އިސްލާހުގައި، ޕާޓީތަކަށް ދައުލަތުން ފައިސާ ދޭ އުސޫލު ބަދަލުކުރަން ހުށަހަޅާފައިވަނީ ޖުމްލަ އަހަރީ ބަޖެޓުގެ 0.1 ޕަސެންޓް ދިނުމުގެ ބަދަލުގައި ބަޖެޓްގައި ލަފާކުރާ އާމްދަނީގެ 0.1 ޕަސެންޓާއި 0.2 ޕަސެންޓާ ދެމެދުގެ އަދަދަކަށް ދޭ ގޮތަށް ބަދަލު ކުރުމަށެވެ. އެހެންވެ، މި ބަދަލާއެކު ޕާޓީތަކަށް ދައުލަތުން ކޮންމެ އަހަރަކު ދޭ ފައިސާގެ އަދަދު ވަރަށް ބޮޑަށް މަދުވާނެ އެވެ.

މީގެ އިތުރުން ޕާޓީތަކުގެ ގާނޫނާ ހިލާފުވާ މީހުން ޖޫރިމަނާކުރާ އަދަދު 30،000ރ. އިން 75،000ރ. އާ ދެމެދަށް ބޮޑުކުރަން ވެސް އެ ބިލުގައި ވަނީ ހުށަހަޅައިފަ އެވެ. ނަމަވެސް މިހާރު ގާނޫނު އޮންނަ ގޮތުން ޖޫރިމަނާ ކުރެވޭނީ 5،000ރ. އާއި 10،000ރ. އާ ދެމެދުގެ އަދަދަކުންނެވެ.

މީގެ އިތުރުން ގާނޫނާ ހިލާފްވާ މީހާ ނިސްބަތްވި ސިޔާސީ ޕާޓީ 100،000ރ. އިން ޖޫރިމަނާ ކުރެވޭނެ ކަމަށް އިސްލާހުގައިވެ އެވެ. މީގެ ކުރިން ޕާޓީތައް ޖޫރިމަނާ ކުރެވޭނެ ގޮތަށް އެ ގާނޫނުގައި ބަޔާން ކޮށްފައެއް ނުވެ އެވެ.

އެ އިސްލާހުގައި ގާނޫނުގެ 10 ވަނަ މާއްދާ އުވާލަން ވަނީ ހުށަހަޅައިފަ އެވެ. އެއީ ކުރީގެ ރައީސް އަބްދުﷲ ޔާމީންގެ ވެރިކަމުގައި އެ ގާނޫނަށް އިތުރު ކުރި މާއްދާއެކެވެ.

ގާނޫނުގެ އެ މާއްދާގައި މިހާރު އޮންނަނީ:

- ސިޔާސީ ޕާޓީއެއްގެ ޕްރައިމަރީގައި ވާދަކޮށްފައިވާ ކެންޑިޑޭޓަކު އެހެން ހައިސިއްޔަތަކުން އިންތިހާބުތަކުގައި ވާދަ ނުކުރުން.

- ސިޔާސީ ޕާޓީގެ ޓިކެޓް ހޯދުމަށްޓަކައި ސިޔާސީ ޕާޓީއެއްގެ ޕްރައިމަރީގައި ވާދަކޮށްފައިވާ މެންބަރަކު، އެ އިންތިހާބުގައި އެހެން އެއްވެސް ހައިސިއްޔަތަކުން ކެންޑިޑޭޓެއްގެ ގޮތުގައި ކުރިމަތިލުމަށް އިލެކްޝަންސް ކޮމިޝަނަށް ހުށަހަޅައިފިނަމަ އެ ކޮމިޝަނުން އެ މީހެއްގެ ކެންޑިޑެސީ ބާތިލު ކުރަންވާނެ.

ގާނޫނުގެ މި މާއްދާ ބާތިލް ކުރުމުން، ޕާޓީތަކުގެ ޕްރައިމަރީގައި ވާދަކުރުމަށް ފަހު އެހެން ހައިސިއްޔަތަކުން އިންތިހާބަށް ނުކުތުމަށް އޮތް ހުރަސް އުވޭނެ އެވެ.