ޕާޓީތައް 100،000ރ. އިން ޖޫރިމަނާ ކުރެވޭ ގޮތް ހަދައި، ޕްރައިމަރީއާ ގުޅޭ މާއްދާއެއް އުވާލަނީ

ސިޔާސީ ޕާޓީތަކުގެ ގާނޫނާ ހިލާފުވެއްޖެ ނަމަ އެ އަމަލެއް ހިންގި މީހާ ޖޫރިމަނާ ކުރުމުގެ އިތުރުން ޕާޓީ 100،000 ރުފިޔާ އިން ޖޫރިމަނާ ކުރެވޭ ގޮތަށް ސަރުކާރުގެ ފަރާތުން ރައްޔިތުންގެ މަޖިލީހަށް އިސްލާހު ހުށަހަޅައިފި އެވެ.

ދިއްދޫ ދާއިރާގެ ޕީއެންސީގެ މެންބަރު އަބްދުއްލަތީފް މުހައްމަދުގެ އިސްލާހުގައި ގާނޫނުގެ 49 ވަނަ މާއްދާ ބަދަލު ކުރަން ވަނީ ހުށަހަޅުއްވައިފަ އެވެ. އިސްލާހުގައިވާ ގޮތުން ގާނޫނާ ހިލާފުވާ މީހަކު 30،000 ރުފިޔާ އިން 75،000 ރުފިޔާއާ ދެމެދުގެ އަދަދަށް ޖޫރިމަނާ ކުރެވޭނެ އެވެ.

އެ އަމަލެއް ހިންގި ފަރާތެއް ނިސްބަތްވާ ޕާޓީއެއް 100،000 ރުފިޔާ އިން ޖޫރިމަނާ ކުރެވޭނެ ކަމަށް އިސްލާހުގައިވެ އެވެ. މީގެ ކުރިން ޕާޓީ ޖޫރިމަނާ ކުރެވޭނެ ގޮތަށް މާއްދާގައި ބަޔާން ކޮށްފައެއް ނުވެ އެވެ.

ސިޔާސީ ޕާޓީތަކުގެ ގާނޫނުގެ 49 ވަނަ މާއްދާގައި މިހާރު އޮތް ގޮތް:

- ޕާޓީއެއްގެ މެންބަރު ކަމަށް ގަވާއިދާ ހިލާފަށް މީހެއްގެ ނަން ހުށަހަޅައިފި ނަމަ އެކަން ކުރި ފަރާތެއް 5,000ރ. 10,000 (ރުފިޔާއާ ދެމެދުގެ އަދަދަކުން ޖޫރިމަނާކުރުން)

- ގާނޫނުގެ އެހެން މާއްދާއަކާ ހިލާފުވާ ފަރާތެއް 30,000 ރުފިޔާ އާއި 75,000 ރުފިޔާއާ ދެމެދުގެ އަދަދަކުން ޖޫރިމަނާކުރުން.

މީގެ އިތުރުން ޕާޓީތަކަށް ދައުލަތުގެ ބަޖެޓުން ފައިސާ ދޫކުރާ އުސޫލު ބަދަލު ކުރަން ވެސް ވަނީ ހުށަހަޅައިފަ އެވެ. މިހާރު ގާނޫނުގައި ބުނެފައިވަނީ ޕާޓީތަކަށް ދޫކުރެވޭ ފައިސާއަކީ، ދައުލަތުގެ އަހަރީ ބަޖެޓުގެ 0.1 ޕަސެންޓަށް ވާން ޖެހޭނެ ކަމަށެވެ.

އިސްލާހު ކުރަން ހުށަހަޅާފައިވަނީ ދައުލަތުގެ އަހަރީ ބަޖެޓްގެ ޕަސެންޓް ދައުލަތުގެ އަހަރީ ބަޖެޓްގައި އެ އަހަރަކަށް ލަފާ ކުރާ އާމްދަނީގެ 0.1 ޕަސެންޓާއި 0.2 ޕަސެންޓާ ދެމެދުގެ އަދަދަކަށް ބަދަލު ކުރާށެވެ.

މެންބަރު ލަތީފް ހުށަހެޅުއްވި އިސްލާހުގައި ގާނޫނުގެ 10 ވަނަ މާއްދާ އުވާލަން ވަނީ ނިންމައިފަ އެވެ. އެއީ ކުރީގެ ރައީސް އަބްދުﷲ ޔާމީންގެ ވެރިކަމުގައި ގާނޫނަށް އިތުރު ކުރި މާއްދާއެކެވެ.

ގާނޫނުގެ އެ މާއްދާގައި މިހާރު އޮންނަނީ:

- ސިޔާސީ ޕާޓީއެއްގެ ޕްރައިމަރީގައި ވާދަކޮށްފައިވާ ކެންޑިޑޭޓަކު އެހެން ހައިސިއްޔަތަކުން އިންތިހާބުތަކުގައި ވާދަ ނުކުރުން.

- ސިޔާސީ ޕާޓީއެއްގައި ރަޖިސްޓަރީ ކޮށްފައިވާ މެންބަރަކު، ގާނޫނުއަސާސީން ނުވަތަ ގާނޫނަކުން ބާރު ލިބިގެން ބާއްވާ އެއްވެސް އިންތިހާބެއްގައި ސިޔާސީ ޕާޓީގެ ޓިކެޓް ހޯދުމަށް އެ ޕާޓީގެ ޕްރައިމަރީގައި ވާދަކޮށްފައިވާ މެންބަރަކު، އެ އިންތިހާބެއްގައި އެހެން އެއްވެސް ހައިސިއްޔަތަކުން ވާދަކޮށްގެން ނުވާނެ

- ސިޔާސީ ޕާޓީގެ ޓިކެޓް ހޯދުމަށްޓަކައި ސިޔާސީ ޕާޓީއެއްގެ ޕްރައިމަރީގައި ވާދަކޮށްފައިވާ މެންބަރަކު، އެ އިންތިހާބުގައި އެހެން އެއްވެސް ހައިސިއްޔަތަކުން ކެންޑިޑޭޓެއްގެ ގޮތުގައި ކުރިމަތިލުމަށް އިލެކްޝަންސް ކޮމިށަނަށް ހުށަހަޅައިފި ނަމަ އެ ކޮމިޝަނުން އެ މީހެއްގެ ކެންޑިޑެސީ ބާތިލު ކުރަންވާނެ.

ގާނޫނުގެ މި މާއްދާ ބާތިލް ކުރުމުން، ޕާޓީތަކުގެ ޕްރައިމަރީ ވާދަކުރުމަށް ފަހު އެހެން ހައިސިއްޔަތަކުން އިންތިހާބަށް ނުކުތުމަށް އޮތް ހުރަސް އުވޭނެ އެވެ.