އަމީން 27 އަހަރަށް ޖަލަށްލި މައްސަލައިގެ އަޑުއެހުންތައް ސިއްރު ނުކުރަން ހައި ކޯޓުން ނިންމައިފި

އިސްލާމިކް ސްޓޭޓް (އައިއެސް) ގެ ފަރާތުން ރާއްޖޭގައި އިސްކޮށް ހަރަކާތްތެރިވި ކަމަށް ތުހުމަތުވާ މުހައްމަދު އަމީން 27 އަހަރަށް ޖަލަށްލި މައްސަލައިގެ އަޑުއެހުންތައް ސިއްރު ނުކޮށް ކުރިއަށް ގެންދަން ހައި ކޯޓުން މިއަދު ނިންމައިފި އެވެ.

ޏ. ފުވައްމުލަކު ކަރިއްޔާވިލާ އަމީންގެ މައްޗަށް ޓެރަރިޒަމްގެ ދައުވާ ދައުލަތުން ކުރީ އައިއެސް ޖަމާއަތާ ގުޅިގެން އުޅުމާއި ބޭރު ގައުމުތަކުގައި ހިނގާ ދާޚިލީ ހަނގުރާމަތަކަށް ދިވެހިން ފޮނުވި ކަމަށް ބުނެ އެވެ. އެ މައްސަލާގައި އޭނާ 27 އަހަރަށް ޖަލަށްލާން ކްރިމިނަލް ކޯޓުން މިދިޔަ އަހަރު އޮތީ ހުކުމްކޮށްފަ އެވެ.

އެ މައްސަލައިގެ އަޑުއެހުންތައް ކްރިމިނަލް ކޯޓުން ކުރިއަށް ގެންދިޔައީ ސިއްރުކޮށްގެންނެވެ.

އެ މައްސަލަ އަމީންގެ ފަރާތުން އިސްތިއުނާފް ކުރުމުން މިއަދު ބޭއްވި އަޑުއެހުމުގައި އަމީންގެ ވަކީލް ހަމްޒާ ލަތީފް ވިދާޅުވީ އެ މައްސަލަ އާންމުކޮށް ހުޅުވާލައިގެން ކުރިއަށް ގެންގޮސްފި ނަމަ ގައުމީ ސަލާމަތާ ގުޅޭ އިންޓެލިޖެންސް ބައެއް މައުލޫމާތު ހާމަވެދާނެ ކަމަށެވެ. އަދި އަޑުއެހުންތައް އާންމުކޮށް ހުޅުވާލުމުން އަމީންގެ ހައްގުތަކަށް އުނިކަން އަންނަ ގޮތަށް ސޯޝަލް މީޑިއާ އާއި ބައެއް މީޑިއާތަކުން މައުލޫމާތު އާންމު ކުރަމުންދާ ކަމަށް ހަމްޒާ ވިދާޅުވި އެވެ.

ޝަރީއަތް ސިއްރުކުރަން ދައުލަތުން ވެސް ދެކޮޅެއް ނަހަދަ އެވެ.

ނަމަވެސް ފަނޑިޔާރުންގެ ބެންޗުން ނިންމެވީ މިވަގުތު އާންމުކޮށް ހުޅުވާލައިގެން ޝަރީއަތް ކުރިއަށް ގެންދިއުމަށެވެ.

އެ މައްސަލަ ހައި ކޯޓުން ބައްލަވަނީ ފަނޑިޔާރު މުހައްމަދު ފައިސަލާއި އިސް ފަނޑިޔާރު ހުސައިން ޝަހީދު އަދި ފަނޑިޔާރު މުހައްމަދު ޝަނީޒެވެ. ބެންޗުގެ ރިޔާސަތަކީ ފަނޑިޔާރު ފައިސަލެވެ.

އަމީނަކީ 2007 ވަނަ އަހަރު ސަލްޓަންޕާކްގައި ދިން ބޮމުގެ ހަމަލާގައި ބައިވެރިވުމުގެ ތުހުމަތު ވެސް ކުރެވުނު މީހެކެވެ. އެ މައްސަލާގައި ރާއްޖެއިން ބޭރުގައި ހުއްޓާ އޭނާ 2012 ވަނަ އަހަރު ހައްޔަރު ކޮށްގެން ގެނައި ނަމަވެސް އޭނާ ފަހުން ވަނީ ދޫކޮށްލައިފަ އެވެ.

އަމީނަކީ އެމެރިކާއިން ނެރުނު ޓެރަރިސްޓުންގެ ލިސްޓުގައި ވެސް ހިމެނުނު މީހެކެވެ.