ފުޓްބޯޅަ ހަލާކު ކުރަނީ ރެފްރީން: ނެސްޓާ

މޮންޒާ (ނޮވެމްބަރު 3) - ފުޓްބޯޅައަކީ ޒަމާނުއްސުރެން ކޮންޓެކްޓް ސްޕޯޓެއް ކަމަށާއި ނަމަވެސް މިހާރުގެ ރެފްރީން މިކަމަށް ހޭނިފައި ނެތުމުން ކުޅިވަރު ހަލާކުވަމުން އަންނަ ކަމަށް އިޓަލީގެ މަގުބޫލު ޑިފެންޑަރު އަލެސަންދްރޯ ނެސްޓާ ބުނެފި އެވެ.

އިޓަލީ ލީގުގެ މޮންޒާގެ ކޯޗުކަމުގައި ހުރި ނެސްޓާ މިހެން ބުނީ، ރޭ އަމިއްލަ ދަނޑުގައި، އޭނާ ކުރިން ކުޅުނު ކްލަބް، އޭސީ މިލާނާ ދެކޮޅަށް ކުޅެ 1-0 އިން ބަލިވި މެޗަށް ފަހު އެވެ.

މޮންޒާ އިން ވަނީ މެޗުގައި ގޯލު ޖަހަން ގިނަ ފުރުސަތުތަކެއް ހޯދައިފަ އެވެ. މެޗުގެ ކުރީކޮޅު ޑެނީ މޮޓާ ކާވާލިއޯ އެޓީމަށް ގޯލެއް ޖަހައިދިން ނަމަވެސް، ބިލްޑް-އަޕް ގައި ވަރޭން ބޮންޑޯ، މިލާންގެ ތިއޯ ހެނާންޑޭޒް އަށް ފައުލް ކުރި ކަމަށް ބަލައި ރެފްރީ އެ ގޯލު ބަލައެއް ނުގަނެ އެވެ. އަދި ފުރަތަމަ ހާފު ނިމެނިކޮށް ޓިއްޖާނީ ރެއިންޑާސް ޖަހައިދިން ގޯލުން މެޗު ކާމިޔާބު ކުރީ މިލާނެވެ.

"އަހަރެމެން ވަރަށް ރުޅި އައިސް މި ތިބެނީ. އެކަމަކު މި ކުޅުންތެރިންނާ މެދު ފަހުރުވެރިވޭ. އެޓަލާންޓާ އާއި މިލާނާ ދެކޮޅަށް ވެސް ވަރަށް މޮޅު ކުޅުމެއް ކުޅެފި. މިރޭ ފުރަތަމަ ހާފުގައި ވެސް ހަތަރު ގޯލު ޖަހާނެ ފުރުސަތު ލިބުނު، އޭގެ ތެރެއިން އެކަތީގަ ގޯލު ޖެހި، އެކަމު ބަލައި ނުގަތީ،" މެޗަށް ފަހު ނެސްޓާ ބުންޏެވެ.

"އަހަރެން ދެކޭގޮތުގައި އެމީހުން [ރެފްރީން] އެ ފުޓްބޯޅަ ހަލާކު ކުރަނީ. މެޗު އޮފިޝިއޭޓް ކުރުމުގައި ކުރިން ގެންގުޅުނު އުސޫލަށް ރުޖޫއަވާން ޖެހޭ. އެއީ ކިހިނަކުން ފައުލް ވާނެ ހާލަތެއް؟ އެޓަލާންޓާ މެޗަށް ފަހު ރެފްރީން މޮންޒާ ކިބައިން މާފަށް އެދިފައި ވަނީ. އެކަމަކު މާފަށް އެދުނަސް އަހަރެމެން އަތުން ގެއްލިދާ ޕޮއިންޓްތަކަށް ނިމުމެއް ނާދޭ."

ނެސްޓާ ބުނީ ފުޓްބޯޅައަކީ މާ ބޮޑަށް އުނދަގޫ ކުޅިވަރަކަށް ރެފްރީން ހަދާފައިވާ އެވެ.

"ފުޓްބޯޅައަކީ ކުރިން މާ ގޮތް ބޮޑު ކުޅިވަރެއް ނޫން. ފުޓްބޯޅައަކީ ކޮންޓެކްޓް ސްޕޯޓެއް. އެކަމަކު މިހާރު ކުޑަކޮށް ޖެހިލާއިރަށް އޮންނަނީ ގޯސް ވެފަ. ފައިގެ ބޮޑުވާއިނގިލިން އެބަ އޮފްސައިޑް ވޭ. ބޯޅަ އަތުލާއިރު ވެސް ދެ އަތް ފުރަގަހުގަ ނޫން ގޮތަކަށް ހުރެއްޖެއްޔާ އެއީ އިދިކޮޅު ޓީމަށް ޕެނަލްޓީއެއް،" ހިތްހަމަނުޖެހިފައި ހުރެ ނެސްޓާ ބުންޏެވެ.

"އަހަރެން ގަބޫލުކުރަނީ ރެފްރީން މި ކުޅިވަރަށް ހޭނެން ޖެހޭ ހެން. އޭގެ އިދިކޮޅަކަށް ނޫން ކަންކަން ވާންވީ. ގަވާއިދުތަކަށް ބަދަލު ގެންނަން ވާނީ ކުޅިވަރުގެ އަސްލު ނުގެއްލޭ ގޮތަށް."

މި މޮޅާ އެކު އޭސީ މިލާން އޮތީ 10 މެޗުން ހޯދި 17 ޕޮއިންޓާ އެކު ހަތްވަނައިގަ އެވެ. އަށާރަ ވަނައިގައި އޮތް މޮންޒާ އަށް ވަނީ އަށް ޕޮއިންޓް ލިބިފަ އެވެ.

އިޓާޅިއަން ސެރީ އޭގެ އެއްވަނައިގައި އޮތީ 10 މެޗުން 25 ޕޮއިންޓް ހޯދާފައިވާ ނަޕޯލީ އެވެ. ދެވަނައިގައި އޮތް އިންޓަ މިލާނަށް 21 ޕޮއިންޓެވެ. ތިންވަނައިގައި އޮތް ޔުވެންޓަސް ވަނީ 11 މެޗު ކުޅެގެން 21 ޕޮއިންޓް ހޯދައިފަ އެވެ. އެޓަލާންޓާ އާއި ފިއޮރެންޓީނާ އަދި ލާޒިއޯ އަށް ވެސް ވަނީ 10 މެޗުން 19 ޕޮއިންޓް ލިބިފަ އެވެ.