ނިސްޓެލްރޫއީ ހުރީ ޔުނައިޓެޑުގައި މަޑުކުރަން ބޭނުންވެފައި

އޭނާގެ ހިދުމަތް މެންޗެސްޓާ ޔުނައިޓެޑުން ބޭނުންވާހާ ހިނދަކު އެހީތެރިވާނެ ކަމަށް އެ ޓީމުގެ ވަގުތީ ކޯޗު ރުޑް ވެން ނިސްޓެލްރޫއީ ބުނެފި އެވެ.

ޔުނައިޓެޑުން އެރިކް ޓެން ހަގް ވަކިކުރުމުން ހުސްވެފައިވާ ކޯޗުގެ މަގާމު ވަގުތީ ގޮތުން ފުރަމުން އަންނަ ނިސްޓެލްރޫއީގެ އިރުޝާދުގެ ދަށުން އެ ޓީމު ކުޅުނު ފުރަތަމަ މެޗުން ރޭ އިނގިރޭސި ލީގު ކަޕުގައި ލެސްޓާ ސިޓީ އަތުން 5-2 އިން ވަނީ މޮޅުވެފަ އެވެ.

ޔުނައިޓެޑުން އަންނަނީ އެ ޓީމުގެ ދާއިމީ ކޯޗަކަށް ޕޯޗުގަލްގެ ސްޕޯޓިންގެ ކޯޗު ރުބެން އަމޯރިމް ގެންނަން މަސައްކަތްކުރަމުންނެވެ. އެކަމަކު އޭނާ އަށް އެންމެ އަވަހަށް ވެސް އެ ޓީމާ ހަވާލުވެވޭނެ ކަމަށް ބެލެވެނީ އަންނަ މަހުގެ ފަހުކޮޅެވެ. އެހެންވެ ކުރީގެ ފޯވާޑް ނިސްޓެލްރޫއީ އަށް ޔުނައިޓެޑުގައި އަދި އިތުރު ދުވަސްކޮޅެއްގައި ހުރެވޭނެ އެވެ.

"އަހަރެން މި ކްލަބަށް އެނބުރި އައީ އެސިސްޓަންޓެއްގެ ގޮތުގައި އެހީވާން. މި ކްލަބުން އަހަރެންގެ އެހީތެރިކަން ބޭނުންވާ ހިނދެއްގައި ދެމި ހުންނާނަން. ކުރިމަގުގައި ވެސް އެހެން ގޮތަކުން އެހީވާން އެދުނަސް ތައްޔާރާށް ހުންނާނީ،" އޭނާ ބުންޏެވެ.

އަމޯރިމް ޔުނައިޓެޑާ ހަވާލުވުމަށް ފަހު ގެންނާނީ އޭނާގެ އެސިސްޓަންޓުގެ ގޮތުގައި ސްޕޯޓިންގައި މިހާރު މަސައްކަތްކުރަމުން އަންނަ ކޯޗުންނެވެ. އެހެންވެ އެސިސްޓަންޓް ކޯޗެއްގެ ގޮތުގައި ނިސްޓެލްރޫއީ އަށް ކުރިމަގުގައި ދެމި ހުރެވޭނެ ކަމަކަށް ނުބެލެވެ އެވެ.

ޔުނައިޓެޑުގެ އޯލްޑް ޓްރެފޯޑުގައި ރޭ ކުޅުނު މެޗުގެ އެ ޓީމުގެ ފަސް ގޯލުގެ ތެރެއިން ދެ ގޯލު ޖެހީ ޓެން ހަގްގެ ކޯޗުކަމުގައި ފޯމުން ކަޓާފައި ހުރި ކަސެމިރޯ އެވެ. އަނެއް ތިން ގޯލުގެ ތެރެއިން ދެ ގޯލު ކެޕްޓަން ބްރޫނޯ ފެނާންޑޭޒް ޖެހިއިރު އަލެހަންދްރޯ ގަނާޗޯ ވެސް ލަނޑެއް ޖެހި އެވެ.

ނިސްޓެލްރޫއީގެ ކޯޗުކަމުގައި ޔުނައިޓެޑަށް ކުރިއަށް ހުރި މެޗުތަކުގެ ތެރޭގައި ޗެލްސީއާ ދެކޮޅަށް އާދީއްތަ ދުވަހުގެރޭ ކުޅޭ މެޗު ފާހަގަކުރެވެ އެވެ.