ކުށްކުރާ މީހުން މަރަން ގްރޫޕެއް ގެންގުޅުނު ކަމަށް ފިލިޕިންސްގެ ކުރީގެ ރައީސް އެއްބަސްވެއްޖެ

ފިލިޕީންސްގެ އެންމެ ބޮޑު އެއް ސިޓީގެ މޭޔަރުކަމުގައި ހުންނެވިއިރު، ކުށްކުރުން ހުއްޓުވުމަށް "ޑެތު ސްކޮޑެއް" ގެންގުޅުނު ކަމަށް ފިލިޕީންސްގެ ކުރީގެ ރައީސް ރޮޑްރިގޯ ޑުޓާޓޭ އިއުތިރާފުވެއްޖެ އެވެ.

މަސްތުވާތަކެއްޗާ ދެކޮޅަށް އޭނާ ކުރި "ހަނގުރާމަ" އާ ގުޅޭ ގޮތުން މިހާރު ފަށާފައިވާ ތަހުގީގަށް ދިން ފުރަތަމަ ބަޔާނުގައި، އުމުރުން 79 އަހަރުގެ ޑުޓާޓޭ ވިދާޅުވީ އެ ސްކޮޑަކީ ގޭންގު މީހުންގެ ހިމަނައިގެން ހިންގި ސްކޮޑެއް ކަމަށެވެ.

"މި މީހާ މަރާލާށޭ، އެހެން ނޫނީ ކަލޭ މަރާލާނަން" ކަމަށް ބުނެ އެ ސްކޮޑަށް އެންގުންތައް އަންފާފައި ވާނެ ކަމަށް ޑުޓާޓޭ ވިދާޅުވި އެވެ.

ޑުޓާޓޭ 2016 ވަނަ އަހަރު ބޮޑު ތަފާތަކުން ރައީސްކަން ކާމިޔާބު ކުރެއްވީ އޭނާ މޭޔަރުކަން ކުރެއްވި ދާވާއޯ ސިޓީގައި ޖަރީމާތަކާ ދެކޮޅަށް އޭނާ ކުރެއްވި މަސައްކަތް ގައުމީ ފެންވަރުގައި ކުރައްވާނެ ކަމަށް ވެ ވަޑައިގަތް ވައުދާ އެކުގަ އެވެ. ވެރިން ލިބިވަޑައިގަތުމާ އެކު އޭނާ ވަނީ މަސްތުވާތަކެތީގެ ވިޔަފާރީގައި އުޅޭ މީހުންނާއި ގޭންގުތަކާ ދެކޮޅަށް ހަރުކަށި އޮޕަރޭޝަނެއް ފަށައި އެތައް ހާސް ބަޔަކު މަރާލައިފަ އެވެ.

މިކަން އިންޓަނޭޝަނަލް ކްރިމިނަލް ކޯޓުން ވެސް ދަނީ ބަލަމުންނެވެ.

ސެނެޓުގައި ހޯމަ ދުވަހު ބޭއްވި އަޑުއެހުމުގައި ޑުޓާޓޭ ވިދާޅުވީ، ތުހުމަތު ކުރެވޭ މީހުންނާ ކުރިމަތިލާއިރު އެ މީހުން ގަދަ ދައްކައި ފުލުހުންނާ ކުރިމަތިލާނެ ގޮތަށް ކަންތައް ކުރުމަށް އޮފިސަރުންނަށް "ހިތްވަރު" ދެއްވި ކަމަށެވެ. އެހެން ހަދަނީ ތުހުމަތުކުރެވޭ މީހުން މަރާލުމަށް ފަހު އެކަމުގެ ދިފާއެއް އުފެއްދުމަށް ކަމަށް ވިދާޅުވި އެވެ.

"އަޅުގަނޑުގެ ސިޔާސަތުތަކާ މެދު ސުވާލު ނުއުފައްދަވާ. ސަބަބަކީ އަޅުގަނޑު މާފަށް އެދޭކަށް، ބަހަނާއެއް ދައްކާކަށް ބޭނުމެއް ނޫން. އަޅުގަނޑު ކުރީ ކުރަން ޖެހުނު. ބަޔަކު ގަބޫލުކުރިޔަސް ނުކުރިޔަސް އެއީ ގައުމަށްޓަކައި ކުރި މަސައްކަތް،" ޑުޓާޓޭގެ ފުރަތަމަ ބަޔާނުގައި ވިދާޅުވި އެވެ.

"މަސްތުވާތަކެއްޗާ އަޅުގަނޑު ވަރަށް ދެކޮޅު. އެކަމާ ސުވާލުކުރަން ނުހަދާތި."

ނަމަވެސް ތުހުމަތު ކުރެވޭ މީހުން މެރުމުގެ ހުއްދަ ފުލުހުންގެ އިސްވެރިންނަށް ދިން ކަމަށް ބުނާ ވާހަކަ އޭނާ ދޮގުކުރެއްވި އެވެ. އޭނާ ވިދާޅުވީ "ޑެތު ސްކޮޑް" ހިންގީ ގޭންގު މީހުން ބޭނުންކޮށްގެން ކަމަށާއި އެއީ ފުލުހުން ނޫން ކަމަށެވެ.

"މިހާރު އަޅުގަނޑަށް އިއުތިރާފް ވެވިދާނެ އެގޮތް ބޭނުން ކަމަށްވާ ނަމަ. ހަތް މީހުންގެ މައްޗަށް އެކުލެވޭ ޑްތު ސްކޮޑެއް ގެންގުޅުނިން. އެކަމަކު އެއީ ފުލުހުންނެއް ނޫން، ގޭންގްސްޓާރުން،" އޭނާ ވިދާޅުވި އެވެ.

ޑުޓާޓޭ ވިދާޅުވީ އޭނާގެ ވެރިކަން ނިމުމާ އެކު ކުށްވެރިންގެ ގްރޫޕްތަކުން އަކުން ކުށުގެ އަމަލުތައް ފެށި ކަމަށެވެ.

ފިލިޕީންސް ސަރުކާރުން އަންދާޒާކުރާ ގޮތުގައި ޑުޓާޓޭ މަސްތުވާތަކެއްޗާ ދެކޮޅަށް ހިންގި ހަރަކާތްތަކުގައި ފުލުހުންނާއި ގޮތް ނޭނގޭ ބަޔަކު ދިން އެކި ހަމަލާތަކުގައި 6،252 އަށް ވުރެ ގިނަ މީހުން މަރާލާފައިވެ އެވެ. އިންސާނީ ހައްގުތަކަށް މަސައްކަތް ކުރާ ޖަމާއަތްތަކުން ބުނަނީ އެ އަދަދު މިއަށްވުރެ އެތައް ހާހެއް އިތުރުވާނެ ކަމަށެވެ.