މަސްވެރިންނަށް ދޭން ޖެހޭ ހުރިހާ ފައިސާއެއް މާދަމާގެ ނިޔަލަށް ދޫކުރާނެ: ޝިޔާމް

މިފްކޯ އަށް މަސް ކިރުވި މަސްވެރިންނަށް ދޭން ޖެހޭ ހުރިހާ ފައިސާއެއް މާދަމާގެ ނިޔަލަށް ދީ، އެންމެ ފަހުގެ ބެކްލޮގް އެއްކޮށް ކްލިއާ ކުރާނެ ކަމަށް ފިޝަރީޒް މިނިސްޓަރު އަހުމަދު ޝިޔާމް މިއަދު ވިދާޅުވެއްޖެ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރަކު ކުރެއްވި ސުވާލަކަށް ޖަވާބު ދެއްވަމުން ޝިޔާމް ވިދާޅުވީ، މިހާރު މަސްވެރިންނަށް ނުދެއްކި ބާކީ ހުރީ 16 މިލިއަން ރުފިޔާ ކަމަށެވެ.

ޝިޔާމް ވިދާޅުވީ، މި ފައިސާ ފިނޭންސް މިނިސްޓްރީން މިފްކޯ އަށް ޖަމާކުރުމުގެ މަސައްކަތް މިހާރު ކުރަމުން އަންނަ ކަމަށާއި މަސްވެރިންނަށް މާދަމާ ޖަމާކުރުމުގެ މަސައްކަތް ކުރާނެ ކަމަށެވެ.

"މާދަމާ މަސްވެރިންނާ ހިސާބަށް މިހާރު ހުރި ބެކްލޮގް އެއްކޮށް [ކްލިއާ ވާނެ]، ނޫނީ މިހާރު މަސްވެރިންނަށް ނުދެވި އިން ފައިސާއެއް ވެއްޖިއްޔާ، މަސް ކިރާފައި މަސް ގަނެފައި ނުދެވިފައި އިން ފައިސާއެއް ވެއްޖިއްޔާ މާދަމާއަށް ހިސާބަށް ލިބިގެން ދާނެ،" މިނިސްޓަރު ވިދާޅުވި އެވެ.

މަސްވެރިން ބާނާ މަސް ގަތުމަށް ފަހު 48 ގަޑިއިރުގެ ތެރޭގައި ފައިސާ ދިނުމަކީ ރައީސް ޑރ. މުހައްމަދު މުއިއްޒުގެ ވައުދެކެވެ. ސަރުކާރުން ބުނެފައި ވަނީ ކަންކަން ހަމަޔަކަށް އެޅުމުން އެކަން އެ ގޮތަށް ކުރުމުގެ މަގުފަހިވާނެ ކަމަށެވެ.

މި ސަރުކާރު އައިރު މަސްވެރިންނަށް ކުރީގެ ސަރުކާރުން ގިނަ އަދަދެއްގެ ފައިސާ ނުދީ ހުރުމުން ފައިސާ ދިނުމުގައި ބޮޑެތި ގޮންޖެހުންތައް ކުރިމަތިވި އެވެ. އެ ގޮންޖެހުންތަކާ އެކު، ސަރުކާރުން ވަނީ މަސްވެރިންގެ ގިނަ އަދަދެއްގެ ފައިސާ ދޫކޮށްފަ އެވެ.

ފައިސާ ލިބުން ލަސްވާ ކަމަށް ބުނެ، މަސްވެރިން ދަނީ ދޭތެރެެދޭތެރެއިން މުޒާހަރާ ކުރަމުންނެވެ. މިދިޔަ މަހު ތެރޭގައި ގއ. ދެއްވަދު އަށާއި ގދ. ދާންދު އަށް ދިޔަ ފިޝަރީޒް މިނިސްޓްރީގެ ޓީމަކަށް އެ ރަށްރަށުގެ ބައެއް މަސްވެރިން ވަނީ ހުރަސްއަޅައިފަ އެވެ. އެ ޓީމުން އެ ރަށްތަކަށް ދިޔައީ މަސްދޯނިތަކުގައި މަސް ފިނި ކުރާ އާރްއޯ ޕްލާންޓް އެޅުމަށް ދޫކުރާ ލޯނާ ގުޅޭ މައުލޫމާތު ދިނުމަށެވެ.