ޖިހާދުގެ މައްސަލަ ނުބަލަން ހައި ކޯޓުން ނިންމައިފި

ކުރީގެ ނައިބު ރައީސް އަބްދުﷲ ޖިހާދު ދިރިއުޅުއްވާ އެޑްރެސް ސާފުކުރުމަށް ފަހު، މައްސަލަ އަލުން ހުށަހަޅަން ދިން މުއްދަތުގެ ތެރޭގައި ޕްރޮސިކިއުޓާ ޖެނެރަލްގެ އޮފީހުން އެކަން ކޮށްފައި ނުވާތީ، އެ މައްސަލަ ބަލައިނުގަންނަން ހައި ކޯޓުން މިއަދު ނިންމައިފި އެވެ.

ޖިހާދުގެ މައްޗަށް ދައުލަތުން ކުރި ދައުވާ ކުރިއަށް ނުގެންދެވޭނެ ކަމަށް ކްރިމިނަލް ކޯޓުން ނިންމި ނިންމުން އިސްތިއުނާފުކުރަން ދައުލަތުން ހައި ކޯޓަށް ހުށަހެޅި މައްސަލަ އަނބުރާ ފޮނުވާލަން ހައި ކޯޓުން ކުރިން ނިންމީ ޖިހާދު މިހާރު ދިރިއުޅުއްވާ އެޑްރެސް ސާފު ނުވުމުންނެވެ. އޭނާ ދިރިއުޅުއްވާ އެޑްރެސް ކަމަށް ޕީޖީ އޮފީހުން ކޯޓަށް ފޮނުވި އެޑްރެހުގައި ޖިހާދު ދިރިނޫޅުއްވާ ކަމަށް އެ ގެއަށް ޗިޓް ހަވާލުކުރަން ދިޔުމުން ވަނީ ބުނެފަ އެވެ.

އެހެންވެ، ހައި ކޯޓުން އޭރު ވަނީ ޖިހާދަށް ޗިޓް ފޮނުވޭނެ އިންތިޒާމް ހަމަޖެއްސުމަށް ފަހު، އަލުން މައްސަލަ ހުށަހަޅަން ޕީޖީ އޮފީހުން ބޭނުންވާ ނަމަ އެ ފުރުސަތު އޮތް ކަމަށް ބުނެ މައްސަލަ އަނބުރާ ފޮނުވާލައިފަ އެވެ.

އެ ފަހަރު ޖިހާދަށް ޗިޓް ރައްދު ނުކުރެވުނީ އޭނާ ރާއްޖޭގައި ނޫޅުއްވާތީ އެވެ. ނަމަވެސް، އޭނާ މިހާރު ހުންނެވީ ރާއްޖޭގަ އެވެ.

ޕީޖީ އޮފީހުގެ މީޑިއާ އޮފިޝަލް ކުރިން ވިދާޅުވި ގޮތުގައި، ޖިހާދު ރާއްޖެ ވަޑައިގަތްކަމުގެ ލިޔުންތަކާ އެކު ހައި ކޯޓަށް އެ މައްސަލަ ހުށަހެޅީ މި މަހުގެ 15 ވަނަ ދުވަހު އެވެ.

ނަމަވެސް، ހައި ކޯޓުން މިއަދު ނިންމި ނިންމުމުގައި ބުނީ އެ މައްސަލަ އަލުން ހުށަހަޅަން ޕީޖީއަށް ދިން މުއްދަތު މި މަހުގެ 13 ވަނަ ދުވަހަށް ހަމަވެފައިވާ ކަމަށެވެ. އެކަމަކު، ޕީޖީން އެ މައްސަލަ ކޯޓަށް އަލުން ހުށަހެޅީ ދިން މުއްދަތު ފަހަނައަޅާ ދިޔަތާ ދެ ދުވަސް ފަހުން މި މަހުގެ 15 ވަނަ ދުވަހު ކަމަށް ހައި ކޯޓުގެ ނިންމުމުގައި ބުންޏެވެ.

އެހެންވެ، އެ މައްސަލަ ބަލައިނުގަންނަން ހައި ކޯޓުން ވަނީ ނިންމައިފަ އެވެ.

މޯލްޑިވްސް އިންޓަނޭޝަނަލް ފައިނޭޝަލް ސާވިސް އޮތޯރިޓީގެ ޗެއާމަންގެ މަގާމުގައި މިހާރު ހުންނެވި ޖިހާދުގެ މައްޗަށް ދައުލަތުން ދައުވާކުރީ 2013 ވަނަ އަހަރު ފިނޭންސް މިނިސްޓަރަކަށް ހުންނެވިއިރު، ފުށިދިއްގަރުފަޅުގެ އެއްބަސްވުމުގައި ސަރުކާރުގެ ފަރާތުން ސޮއިކުރެއްވުމުގައި ދައުލަތަށް ފައިދާނުވާ ގޮތަށް އަމަލުކުރެއްވި ކަމަށް ބުނެ އެވެ. އެ މައްސަލާގައި ޖިހާދުގެ މައްޗަށް ކުރީ ދައުލަތަށް ފައިދާވާން އޮތް ކަމެއްގައި އެ ނޫން ގޮތަކަށް އަމަލު ކުރުމުގެ ދައުވާ އެވެ.

އެ މައްސަލަ ކްރިމިނަލް ކޯޓުން ކުރިއަށް ނުގެންދެވޭނެ ކަމަށް ނިންމީ ތަހުގީގުގައި ގޯސްތަކެއް ހަދާފައި ވާތީ ކަމަށް ބުނެ އެވެ. ޕީޖީ އޮފީހުން ބުނި ގޮތުގައި، އެ މައްސަލަ ހައި ކޯޓުގައި އިސްތިއުނާފްކުރީ ކްރިމިނަލް ކޯޓުގެ ނިންމުން ބިނާކުރި އަސާސެއް ނެތުމާއި އެކަށީގެންވާ މިންވަރަށް ސަބަބު ބަޔާންކޮށްފައި ނެތުމުންނެވެ.

އެހެންވެ، ޕީޖީން ހައި ކޯޓުގައި އެދުނީ އެ މައްސަލަ ދަށު ކޯޓުން އަލުން ބަލަން އަމުރުކޮށް ދިނުމަށެވެ.