އަންނަ އަހަރުގެ ބަޖެޓު ހުށަހެޅުން ބުރާސްފަތި ދުވަހު

އަންނަ އަހަރަށް ލަފާކުރާ ދައުލަތުގެ ބަޖެޓު އަންނަ ބުރާސްފަތި ދުވަހު ހުށަހަޅާނެ ކަމަށް ފިނޭންސް މިނިސްޓްރީން ބުނެފި އެވެ.

ބަޖެޓު ހުށަހެޅުމަށް ތައްޔާރުވެފައިވާ އިރު މިދިޔަ ބުރާސްފަތި ދުވަހު ސަރުކާރުން ވަނީ މިއަހަރުގެ ބަޖެޓަށް 5.1 ބިލިއަން ރުފިޔާ އިތުރުކުރަން ސަޕްލިމެންޓްރީ ބަޖެޓެއް ހުށަހަޅައިފަ އެވެ. ސަޕްލިމެންޓްރީ ބަޖެޓާ ގުޅޭ ގޮތުން މާދަމާގެ ނިޔަލަށް ކޮމިޓީގައި ދިރާސާކުރުމަށް ފަހު އަލުން މަޖިލީހަށް ފޮނުވަން ބަޖެޓު ކޮމިޓީން ވަނީ ނިންމާފަ އެވެ.

ސަޕްލިމެންޓްރީ ބަޖެޓާ އެކު މިއަހަރުގެ ބަޖެޓު 55 ބިލިއަން ރުފިޔާއަށް އަރާނެ އެވެ. އަންނަ އަހަރަށް ލަފާކުރާ ބަޖެޓު ވެސް ހުންނާނެ ކަމަށް ބެލެވެނީ 55 ބިލިއަނާއި 65 ބިލިއަން ރުފިޔާއާ ދެމެދުގަ އެވެ.

މާލިއްޔަތު ގާނޫނު ބުނާ ގޮތުން އޮކްޓޯބަރުގެ ނިޔަލަށް މަޖިލީހަށް ބަޖެޓު ހުށަހަޅަން ޖެހެ އެވެ. އާ ސަރުކާރުގެ ބަޖެޓު ފިނޭންސަށް ފޮނުވީ މިިދިޔަ އޮކްޓޯބަރު މަހުގެ 31 ވަނަ ދުވަހެވެ.

ގާނޫނުއަސާސީގައިވާ ގޮތުން ކޮންމެ އަހަރެއް ފެށުމުގެ ކުރިން އެ އަހަރަކަށް ދައުލަތުން ހިނގާނެ ކަމަށް ލަފާ ކުރެވޭ ހަރަދާއި ދައުލަތަށް ލިބޭނެ ކަމަށް ލަފާކުރާ އާމްދަނީގެ ހިސާބު ހިމެނޭ ބަޖެޓެއް ހުށަހަޅަންވާނެ އެވެ.