ތުރުކީ ސަރުކާރުގެ އެއަރޮސްޕޭސް ކުންފުނީގެ މަރުކަޒަށް ޓެރަރިސްޓް ހަމަލާއެއް، އެތައް ބަޔަކު މަރު

ތުރުކީ އަސްކަރިއްޔާގެ މައި ހިއްސާ އޮންނަ އެ ގައުމުގެ މުހިންމު ކުންފުންޏެއް ކަމަށްވާ ޓާކިޝް އެއަރޮސްޕޭސް އިންޑަސްޓްރީޒް (ޓީއޭއައި) ގެ މައި މަރުކަޒު ބޭރުގައި މިއަދު ދިން ޓެރަރިސްޓު ހަމަލާއެއްގައި ގިނަ ބަޔަކު މަރުވެ އެތައް ބަޔަކު ޒަހަމްވެއްޖެ ކަމަށް އިންޓީރިއާ މިނިސްޓްރީން ބުނެފި އެވެ.

މިހާތަނަށް ތިން މީހަކު މަރުވެ 14 މީހަކު ޒަހަމްވިކަން ކަށަވަރު ވެފައިވާ ކަމަށް ތުރުކީ ސަރުކާރުން ބުންޏެވެ.

"ތުރުކީގެ އެރޯސްޕޭސް އިންޑަސްޓްރީސް އަށް ޓެރަރިސްޓް ހަމަލާއެއް ދީފި... އެތައް ބަޔަކު ޝަހީދުވެ އަދި ޒަހަމްވިކަމީ ބޮޑު ހިތާމައެއް،" އިންޓީރިއާ މިނިސްޓަރު އަލީ ޔަރްލިކާޔާ އެކްސްގައި ލިޔުއްވާފައިވެ އެވެ.

ކުންފުނީގެ މަރުކަޒު ހުންނަ، އަންކާރާގެ އުތުރުން ގާތްގަނޑަކަށް 40 ކިލޯމީޓަރު (25 މޭލު) ދުރުގައި އޮންނަ ކުޑަ އަވަށެއް ކަމަށްވާ ކަހްރާމަންކަޒާންގައި ބޮޑު އަލިފާންގަނޑަކާ އެކު އޮލަ ދުންތައް އަރަމުން ދިޔަތަން އެ ގައުމުގެ މީޑިއާތަކުން ވަނީ އާންމުކޮށްފަ އެވެ.

ބައެއް މީޑިއާތަކުން ބުނި ގޮތުގައި ހަމަލާއަށް ފަހު ބަޔަކު ވަނީ ރަހީނު ވެސް ކޮށްފަ އެވެ. އަދި އެހެން ބައެއް މީޑިއާތަކުން ބުނި ގޮތުގައި އެއްޗެއް ގޮއްވާލުމަށް ފަހު ބަޑީގެ ހަމަލާ ބަދަލުކުރި އަޑު ވެސް އިވެމުން ދިޔަ އެވެ.

މީޑިއާގައި ބުނެފައިވާ ގޮތުގައި ހަމަލާ ދިނީ ތުރުކީ ގަޑިން ހަވީރު 4:00 ހާއިރު އެވެ.

ހަމަލާގެ ޒިންމާ އަދި އެއްވެސް ބަޔަކު އުފުލާފައި ނުވާ ކަމަށާއި ތަހުގީގު މިހާރު ވަނީ ފަށާފައި ކަމަށް ޖަސްޓިސް މިނިސްޓަރު ވިދާޅުވި އެވެ.

ޓީވީ ޗެނަލަކުން ބުނި ގޮތުގައި ހަމަލާ ދިނީ ޓެރަރިސްޓުންގެ ގްރޫޕަކުން ގޮސް ހަތިޔާރާ އެކު އިމާރާތްތަަށް ވަދެގަންނަން މަސައްކަތްކޮށްފަ އެވެ. ގޮއްވާލީ ހަށިގަނޑުގައި ބޮމެއް ހަރުކޮށްގެން އުޅުނު މީހެއް ކަމަށް ބުނެފައިވެ އެވެ.

ޓީއޭއައިގެ ވެބްސައިޓްގައިވާ ގޮތުން ހަތިޔާރު އުފައްދާ މި ބޮޑު ކުންފުނީގައި 15،500 މީހުން ވަޒީފާ އަދާކުރާ އިރު، ފަސް މިލިއަން އަކަމީޓަރުގެ ސަރަހައްދެއް ހިމެނޭ ގޮތަށް ބޮޑު ޕްރޮޑަކްޝަން ސައިޓެއް ހުރެ އެވެ. -- އޭއެފްޕީ