ހަތަރު ނަންބަރު ޖެޓީ މަރާމާތު ކުރަނީ

ރަސްމީ ބޭނުންތަކަށް ބޭނުންކުރާ މާލޭގެ ހަތަރު ނަންބަރު ޖެޓީ މަރާމާތު ކޮށްދޭނެ ބަޔަކު ހޯދަން މާލޭ ސިޓީ ކައުންސިލުން މިއަދު އިއުލާންކޮށްފި އެވެ.

މާލޭ ސިޓީ ކައުންސިލުން ކުރި އިއުލާނެއްގައި ބުނީ މާލޭގެ އުތުރު ފަރާތުން، ހަތަރު ނަންބަރު ފާލަން މަރާމާތު ކުރުމުގެ މަސައްކަތް އަމިއްލަ ތަކެތީގައި ކޮށްދޭނެ ފަރާތެއް ހޯދުމަށް ބޭނުންވާ ކަމަށެވެ. އަދި އެ މަސައްކަތް ކުރުމަށް ބީލަން ހުށަހެޅުމުގެ ފުރުސަތު މިހާރު ހުޅުވާލާފައިވާ ކަމަށެވެ.

ރައީސް އޮފީހުގެ ކުރިމަތީގައި އޮންނަ ހަތަރު ނަންބަރު ޖެޓީ މަރާމާތު ކުރަނީ ފާލަމުގައި ރެނދުލައި، ދަގަނޑުތަކުގައި ދަބަރު ޖަހައި އަދި ފާލަމުގައި ބޭނުންކޮށްފައި ލަކުޑިތައް ބާވެ، އެ ޖެޓީ ވަރަށް ބޮޑަށް ހަލާކުވެފައި ހުރުމުން ކަމަށް ސިޓީ ކައުންސިލުން ބުންޏެވެ.

މި މަސައްކަތް ހަވާލު ކުރުމުގައި އިސްކަންދޭނީ ވީހާ ވެސް ކުޑަ އަގެއްގައި އަދި ކުރު މުއްދަތެއްގެ ތެރޭގައި އެ މަސައްކަތް ނިންމައިދޭ ބަޔަކަށް ކަމަށް ވެސް އެ އިއުލާނުގައި ބުންޏެވެ.

ސިޓީ ކައުންސިލުން ބުނީ ހަތަރު ނަންބަރު ޖެޓީ މަރާމާތު ކުރުމަށް އަގު ހުށަހެޅުން އޮންނާނީ އަންނަ މަހުގެ ހަތަރު ވަނަ ދުވަހު ކައުންސިލްގެ އިދާރާގައި ކަމަށެވެ.

އަގު ހުށަހެޅުމުގައި ބައިވެރިވެވޭނީ ދިވެހި ކުންފުނިތަކާއި ޕާޓްނާޝިޕްތަކާއި ލޯކަލް އިންވެސްޓްމެންޓް އަދި ވިޔަފާރިކުރުމުގެ ހުއްދަ ލިބިފައިވާ ފަރާތްތަކަށް އެކަނި ކަމަށް ވެސް ސިޓީ ކައުންސިލުން ބުންޏެވެ.

މާލޭ ހަތަރު ނަންބަރު ފާލަމަކީ ދައުލަތާއި ސަރުކާރުގެ އުޅަނދު ފަހަރަށް ހާއްސަ ޖެޓީއެކެވެ. އަދި އެ ޖެޓީގެ ފަޅުގައި އޮންނަނީ ރައީސްގެ ރަސްމީ ލޯންޗްކޮޅާއި ސިފައިންގެ ބައެއް އުޅަނދުތަކެވެ.