އައްޑޫގެ ޓޫރިޒަމް ބްރޭންޑުކޮށް އިފްތިތާހުކުރަނީ

އައްޑޫގެ ޓޫރިޒަމް ކުރިއަރުވައި ޕްރޮމޯޓްކުރުމުގެ މަގުސަދުގައި "އައްޑޫ ޓޫރިޒަމް ބްރޭންޑް" އަންނަ ހުކުރު ދުވަހުގެ ރޭ ބާއްވާ ހާއްސަ އިވެންޓެއްގައި އިފްތިތާހުކުރުމަށް ނިންމައިފި އެވެ.

އައްޑޫ ސިޓީ ކައުންސިލުން މިއަދު ބޭއްވި ޕްރެސް ކޮންފަރެންސެއްގައި ޑެޕިއުޓީ މޭޔަރު މުހައްމަދު ޝުއާއު ވިދާޅުވީ، އައްޑޫގެ ޓޫރިޒަމް ޕްރޮމޯޓް ކުރުމުގެ ބޭނުމަށް ބްރޭންޑިންގެ މަސައްކަތް ކުރަމުން އަންނަތާ މިހާރު ދުވަސްތަކެއް ވެއްޖެ ކަމަށެވެ.

އޭނާ ވިދާޅުވީ އައްޑޫގެ ޓޫރިޒަމް ބްރޭންޑް ކުރުމުގެ މަސައްކަތް ކޮށްދޭނެ ބަޔަކު ހޯދަން ބީލަމުގެ އުސޫލުން ހުޅުވައިލި ފުރުސަތުގައި ބީލަން ކާމިޔާބުކުރީ ބްރޭންޑް ޑިވެލޮޕްމަންޓްގެ މަސައްކަތް ކޮށްދޭ ކުންފުންޏެއް ކަމަށްވާ އެންކްރިއާ ޕްރައިވެޓް ލިމިޑެޓުން ކަމަށެވެ. އެ މަސައްކަތް މިދިޔަ ޖުލައި މަހު އެ ކުންފުންޏާ ހަވާލުކޮށް، މިހާރު ގާތްގަނޑަކަށް ނިމިފައިވާ ކަމަށް ވެސް އޭނާ ވިދާޅުވި އެވެ.

އެ ކުންފުނިން ތައްޔާރުކޮށްދިން އައްޑޫގެ ޓޫރިޒަމް ބްރޭންޑް ރަސްމީކޮށް އިފްތިތާހުކުރަނީ އަންނަ ހުކުރު ދުވަހުގެ ރޭ ކެނަރީފް ރިސޯޓުގައި ބާއްވާ އިވެންޓުގަ އެވެ.

ޝުއާއު ވިދާޅުވި ގޮތުގައި، އެ ކުންފުނިން ވަނީ އައްޑޫގެ ޓޫރިޒަމް ޑެސްޓިނޭޝަން މާކެޓް ކުރުމަށް ބޭނުންވާ މެޓީރިއަލްސް ވެސް ޑިޒައިންކޮށް، ތައްޔާރުކޮށްދީފަ އެވެ.

"މިއީ އައްޑޫގެ ޓޫރިޒަމް ދާއިރާގައި މަސައްކަތްކުރާ ހުރިހާ ފަރާތްތައް، ރިސޯޓުތަކާއި ގެސްޓް ހައުސްތަކާއި އެ ނޫން ފަރާތްތައް ގުޅިގެން، އައްޑޫގެ ޓޫރިޒަމް އެހެން ހަރަފުތަކަށް ގެންދިއުމަށް ކުރެވުނު މުހިންމު މަސައްކަތެއް،" އޭނާ ވިދާޅުވި އެވެ.

ޝުއާއު ވިދާޅުވީ އައްޑޫގައި ޓޫރިޒަމްގެ ތަފާތު މަޝްރޫއުތައް ހިންގަން ވެސް ސިޓީ ކައުންސިލުން ރާވާފައިވާ ކަމަށެވެ. އޭގެ ތެރޭގައި، އައްޑޫގައި ޓޫރިޒަމް ޒޯންތައް ހެދުމާއި އިންޓަގްރޭޓެޑް ޓޫރިޒަމަށް ހަންކެޑެ ތަރައްގީ ކުރުމާއި ޓޫރިޒަމަށް ހާއްސަ ކޮށްގެން ހިއްކާފައިވާ ރަށްތަކުގައި އައްސޭރި ޓޫރިޒަމް ފެށުން ވެސް ހިމެނޭ ކަމަށް އޭނާ ވިދާޅުވި އެވެ.

މި ހުރިހާ ޕްލޭންތަކެއް ތަފުސީލް ހުކުރު ދުވަހުގެ ރޭ ބާއްވާ އިވެންޓުގައި ހިއްސާކުރާނެ ކަމަށް އޭނާ ވިދާޅުވި އެވެ.

އައްޑޫގައި ތިން ރިސޯޓު އޮންނައިރު، އޭގެ ތެރެއިން މި ވަގުތު ހިންގަނީ ދެ ތަނެކެވެ. އެއީ، ކެނަރީފާއި ސައުތު ޕާމް ރިސޯޓެވެ. އައްޑޫގެ ރިސޯޓްތަކުގެ ތެރެއިން ޝަންގްރިއްލާ ވިލިނގިލި ރިސޯޓް އެންޑް ސްޕާ ބަންދުކޮށްފައި އޮންނަތާ މިހާރު ހަތަރު ވަރަކަށް އަހަރު ވެއްޖެ އެވެ. އެ ރިސޯޓު އަލުން ހުޅުވުމުގެ މަސައްކަތް އަންނަނީ ކުރަމުންނެވެ. އަދި، އައްޑޫގައި ވަރަށް ގިނަ ގެސްޓް ހައުސްތައް ވެސް ހިންގަ އެވެ.