ވިނީގެ ހެޓްރިކުން ރެއާލް ފަހަތުން އަރައި ބޮޑު މޮޅެއް ހޯދައިފި

ވިނީޝިއަސް ޖޫނިއާގެ ހެޓްރިކާ އެކު ޗެމްޕިއަން ރެއާލް މެޑްރިޑުން ރޭ ޔުއެފާ ޗެމްޕިއަންސް ލީގުގައި ބޮރޫޝިއާ ޑޯޓްމަންޑް އަތުން ފަހަތުން އަރައި 5-2 އިން މޮޅުވެއްޖެ އެވެ.

ރެއާލުގެ ސެންޓިއާގޯ ބެރްނެބުއޭ ސްޓޭޑިއަމުގައި ކުޅުނު މި މެޗުގައި އެ ޓީމުގެ ތަރިއަކަށްވި ބްރެޒިލް ފޯވާޑް ވިނީ އަކީ އަންނަ ހޯމަ ދުވަހުގެރޭ މި އަހަރުގެ ބެލޮންޑިއޯ އެވޯޑް އުފުލާލާނެ ކަމަށް ވެސް ޔަގީންކުރެވޭ ކުޅުންތެރިޔާ އެވެ.

މިދިޔަ ސީޒަނުގެ ޗެމްޕިއަންސް ލީގުގެ ފައިނަލުގައި ވާދަކުރި މި ދެ ޓީމުގެ މެޗުގެ ފުރަތަމަ ހާފުގައި ޑޯޓްމަންޑުން ދެ ގޯލުގެ ލީޑެއް ނެގުމާ އެކު އެ ޓީމުން، ރެއާލް އަތުން ފައިނަލުގެ ބަދަލު ހިފާނެ ކަމަށް ބެލެވުނެވެ. ރެއާލުގެ ކުރީގެ ކުޅުންތެރިޔާ ނޫރީ ސާހިން ކޯޗުކޮށްދޭ ޑޯޓްމަންޑަށް މި ދެ ގޯލު ޖަހައިދިނީ ޑޮނީއެލް މަލެން އާއި ޖެމީ ބިނޯއީ-ގިޓެންސް އެވެ.

ދެ ވަނަ ހާފުގައި ރެއާލަށް މެޗުގެ ތެރެއަށް އަލުން ވަދެވުނީ 60 ވަނަ މިނެޓުގައި ޑިފެންޑަރު އެންޓޯނިއޯ ރުޑިގާ ޖެހި ގޯލުންނެވެ. އޭގެ ދެ މިނެޓު ފަހުން ވިނީ ގޯލު ޖަހައި ނަތީޖާ ހަމަހަމަކުރި އެވެ. ރެއާލަށް ފުރަތަމަ ފަހަރަށް ލީޑު ލިބުނީ 83 ވަނަ މިނެޓުގައި ލޫކަސް ވަސްކުއޭޒް ޖެހި ގޯލުންނެވެ. އެ ޓީމުގެ ތަފާތު ބޮޑުކޮށްލި ދެ ގޯލު ވިނީ ކާމިޔާބުކުރީ 86 ވަނަ މިނެޓާއި އިތުރު ވަގުތުގެ ތެރޭގަ އެވެ.

މެޗަށް ފަހު ވިނީ ބުނީ އަމިއްލަ ދަނޑުގައި، އަމިއްލަ ސަޕޯޓަރުންގެ ކުރިމަތީގައި ކުޅޭއިރު ބޭނުންވާ ނަތީޖާ ނެރެވޭނެ ކަމުގެ އިތުބާރު އޮންނަ ކަމަށެވެ.

"އަހަރެމެން ފުރަތަމަ ހާފަށް ފަހު ޗޭންޖިން ރޫމަށް ގޮސް ތިބީ މަޑުމަޑުން ކޯޗު ދައްކާ ވާހަކަ އަޑުއަހަން. އަހަރެމެން ބުނީ ހަމަ އެންމެ ވާހަކައެއް. އެއީ ފުރަތަމަ ގޯލު ޖެހިއްޖެއްޔާ ފަހަތުން އަރައި މޮޅުވެވޭނެޔޭ،" ވިނީ ބުންޏެވެ.

ރެއާލުގެ ކޯޗު ކާލޯ އަންޗެލޮޓީ ބުނީ އެ ޓީމުގެ ފެންވަރާއި، ގާބިލުކަން ދެ ވަނަ ހާފުގައި ފެނުނު ކަމަށާއި ދެން ކުރަންވީ ކަމަކީ ކޮންމެ މެޗެއް ވެސް އެގޮތަށް ފެށުން ކަމަށާއި، އިދިކޮޅު ޓީމު ލަނޑު ޖަހަންދެން ނުކުޅެ ތިބުމަކީ ހެދޭ ގޯހެއް ކަމަށެވެ.

އާ ފޯމެޓަކަށް ކުޅޭ ޗެމްޕިއަންސް ލީގުގެ ތާވަލުގައި ރެއާލް އޮތީ ހަ ޕޮއިންޓާ އެކު، ނުވަ ވަނައިގަ އެވެ. އެއް ވަނައިގައި ނުވަ ޕޮއިންޓާ އެކު އޮތީ އިންގްލެންޑުގެ އެސްޓަން ވިލާ އެވެ. އެ ޓީމު ވަނީ ރޭ އިޓަލީގެ ބޮލޯނިއާ އަތުން 2-0 އިން މޮޅުވެފަ އެވެ. ދެ ވަނައިގައި ހަތް ޕޮއިންޓާ އެކު އޮތީ ރޭ ސާބިއާގެ ރެޑްސްޓާ ބެލްގްރޭޑް އަތުން 5-1 އިން މޮޅުވި ފްރާންސްގެ މޮނާކޯ އެވެ.

ޕޯޗުގަލްގެ ސްޕޯޓިން ލިޒްބަން އާއި އިންގްލެންޑުގެ އާސެނަލް ވެސް ވަނީ ރޭގެ މެޗުތަކުން މޮޅުވެ ހަތް ޕޮއިންޓް ހަމަކޮށްފަ އެވެ. އެކަމަކު ލަނޑުގެ ތަފާތުން ސްޕޯޓިން ތިން ވަނައިގައި އޮތްއިރު އާސެނަލް އޮތީ ހަތަރު ވަނައިގަ އެވެ. ސްޕޯޓިން މޮޅުވީ ރަށުން ބޭރުގައި އޮސްޓްރިއާގެ ސްޓަމް ގްރަޒް އަތުން 2-0 އިންނެވެ. އާސެނަލް މޮޅުވީ އަމިއްލަ ދަނޑުގައި ޔޫކްރޭނުގެ ޝަކްތާ ޑޮނެސްކް އަތުން 1-0 އިންނެވެ. މެޗުގެ ހަމައެކަނި ގޯލަކީ 29 ވަނަ މިނެޓުގައި ޝަކްތާގެ ގޯލްކީޕަރު ޑިމިޓްރޯ ރިޒްނިކް އަތުން ބައިކޮޅަށް ވަން ލަނޑެކެވެ.