ކޮމަންވެލްތު ބައްދަލުވުމަށް ނައިބު ރައީސް ސަމޯއާގައި

ކޮމަންވެލްތުގެ ގައުމުތަކުގެ އިސްވެރިންގެ 27 ވަނަ ބައްދަލުވުމުގައި ބައިވެރިވެވަޑައިގަތުމަށް ނައިބު ރައީސް ހުސެއިން މުހައްމަދު ލަތީފް ސަމޯއާއަށް މިއަދު ވަޑައިގެންފި އެވެ.

އޯޝެނިއާގެ ގައުމެއް ކަމަށްވާ ސަމޯއާއަށް ވަޑައިގަތުމަށް ނައިބު ރައީސް ދަތުރުފުޅު ފެށްޓެވީ މިދިޔަ އާދިއްތަ ދުވަހު އެވެ. އެމަނިކުފާނު މިއަދު ވަނީ ސަމޯއާގެ ވެރިރަށް އަޕިއާއަށް ވަޑައިގެންފަ އެވެ. މި ދަތުރުފުޅުގައި ނައިބު ރައީސްގެ އަރިހުގައި ސަރުކާރުގެ އިސް ބޭފުޅުންގެ ވަފުދެއް ބައިވެރިވެވަޑައިގަންނަވަ އެވެ.

ރައީސް އޮފީހުން މިއަދު ބުނީ ނައިބު ރައީސް ސަމޯއާއަށް ވަޑައިގަތުމުން އަޕިއާގެ ފަލެއޯލޯ އިންޓަނޭޝަނަލް އެއާޕޯޓުން އެ މަނިކުފާނަށް މަރުހަބާ ދެންނެވީ ސަމޯއާން މިނިސްޓަ ފޯ ޕޮލިސް އެންޑް ޕްރިޒަންސް އޮނަރަބަލް ފައުލޯ ހެރީ ޖެފްރީ ޝުސްޓާ އާއި ރާއްޖެއިން އިނގިރޭސިވިލާތަށް ކަނޑައަޅުއްވާފައި ހުންނަވާ ސަފީރު ޑރ. އިރުތިޝާމް އާދަމް ކަމަށެވެ.

ނައިބު ރައީސްގެ މި ދަތުރުފުޅުގައި، ކްލައިމެޓް އެކްޝަނާއި ކްލައިމެޓް ފައިނޭންސް ފަދަ ބައިނަލްއަގްވާމީ މުހިންމު ކަންކަމާ ބެހޭ މަތީ ފަންތީގެ މަޝްވަރާތަކާއި ކޮމަންވެލްތު ބިޒްނަސް ފޯރަމްގައި ވެސް އެ މަނިކުފާނު ބައިވެރިވެވަޑައިގަތުމަށް ހަމަޖައްސަވާފައިވާ ކަމަށް ރައީސް އޮފީހުން ބުންޏެވެ.

ބައިނަލްއަގްވާމީ ގޮތުން ރާއްޖޭގެ ބައިވެރިވުން އިތުރަށް ހަރުދަނާ ކުރުމަށާއި ދުނިޔެއަށް ކުރިމަތިވެފައިވާ ގޮންޖެހުންތަކުން އަރައިގަތުމަށް އެހީތެރިވުމުގެ ގޮތުން ދުނިޔޭގެ ލީޑަރުންނާ އެކު ބައިލެޓްރަލް ބައްދަލުވުންތައް ބާއްވާނެ ކަމަށް ރައީސް އޮފީހުން ބުންޏެވެ.

"ރައީސުލްޖުމްހޫރިއްޔާގެ ނައިބުގެ މި ދަތުރުފުޅުގައި މި މަހުގެ 25 ވާ ހުކުރު ދުވަހު ބޭއްވުމަށް ހަމަޖެހިފައިވާ ޗޯގްމްގެ އެގްޒެކެޓިވް ސެޝަންތަކުގައި ރާއްޖޭގެ ގައުމީ ބަޔާން އިއްވެވުމަށް ވަނީ ހަމަޖެހިފަ އެވެ،" ރައީސް އޮފީހުން ބުންޏެވެ.

ރައީސް އޮފީހުން ބުނިގޮތުގައި ރައީސް ޑރ. މުހައްމަދު މުއިއްޒުގެ އިސްނެންގެވުމުގެ މަތިން، ބައިނަލްއަގްވާމީ މައިދާނުގައި ރާއްޖެއިން އިސްކޮށް ހަރަކާތްތެރިވެ، ބައިނަލްއަގްވާމީ މުހިންމު ބައިވެރިންނާ އެކު ގުޅުން ބަދަހި ކުރުމަށް މި ސަރުކާރުން އަބަދުވެސް މަސައްކަތް ކުރާނެ އެވެ.

ކޮމަންވެލްތުގެ ގައުމުތަކުގެ އިސްވެރިންގެ 27 ވަނަ ބައްދަލުވުން ކުރިއަށް ގެންދަނީ އަންނަ ހުކުރު އަދި ހޮނިހިރު ދުވަހު އެވެ. އެ ބައްދަލުވުމުގެ ސައިޑް އިވެންޓުތައް އިއްޔެ ވަނީ ފަށައިފަ އެވެ.