ކޮމިއުނިޓީ ތެރޭގައި ބައިތިއްބައިގެން ޑްރަގު ފަރުވާދިނުމުން އެދެވޭ ނަތީޖާ ނެރެވޭނެ ކަމަށް ތަޖުރިބާއިން ނުދައްކާ: ރާޝިދު

ރާއްޖޭގައި މަސްތުވާތަކެއްޗަށް ދެވި ހިފާފައިވާ މީހުން މުޖުތަމައުގެ ތެރެއަށް ދޫކޮށްލައިގެން ފަރުވާދިނުމަކީ އެންމެ އެކަށީގެންވާ ނަތީޖާ ނެރެވޭނެ ކަމެއް ކަމަށް ގަބޫލު ނުކުރައްވާ ކަމަށް ނޭޝަނަލް ޑްރަގު އެޖެންސީ (އެންޑީއޭ) ގެ އެކްޓިން ސީއީއޯ މުހައްމަދު ރާޝިދު ވިދާޅުވެއްޖެ އެވެ.

މަސްތުވާތަކެއްޗާއި ދެކޮޅަށް ކުރަމުން އަންނަ މަސައްކަތްތައް މީޑިއާ ހިއްސާކުރަން އިއްޔެ ބޭއްވި ޕްރެސް ކޮންފަރެންސްގައި ރާޝިދު ވިދާޅުވީ ރެސިޑެންޝަލް ޕްރޮގްރާމުގެ ތެރެއަށް ވަނުމަށް ޑްރަގު ކޯޓުން ހުކުމްކޮށް، ވަންނަން ޖާގަ ނުލިބޭ މީހަކު ނުހުންނާނެ ކަމަށެވެ.

"ރެސިޑެންޝަލް ނުވަތަ ބައިތިއްބައިގެން ފަރުވާދޭން ޖެހޭ މީހުންގެ ތެރެއިން ފަރުވާ އަށް ހުކުމް ކޮށްފައިވާ މީހުންގެ ތެރޭގައި ގާތްގަނޑަކަށް މިހާރު ތިބީ މެޑިކަލް ހެދުން ނުވަތަ އޭނާގެ އިންޑިކޭޓިވް އެސެސްމަންޓް ހެދުން ކަހަލަ ބައެއް ކަންކަމާ ހެދި މަޑުޖެހިލާފައި މަދު އަދެދެއް. އެހެން ނޫނީ އެންމެންނަށް ފަރުވާގެ ފުރުސަތު ލިބިފައި އޮތީ،" އިސްކަންދަރު ކޮށީގައި ބޭއްވި ޕްރެސް ކޮންފަރެންސްގައި ރާޝިދު ވިދާޅުވި އެވެ.

މަސްތުވާތަކެތި ބޭނުންކުރާ މީހުންގެ އެސެސްމަންޓް ހެދުމަށް ފަހު، އެމީހުންނަށް ފަރުވާ ދޭންޖެހެނީ ކޮމިއުނިޓީގައި ބަހައްޓައިގެން ނަމަ އެ ފުރުސަތު ދޭނެ ކަމަށް ރާޝިދު ވިދާޅުވި އެވެ.

އޭނާ ވިދާޅުވި ގޮތުގައި ދުނިޔޭގައި އެންމެ ބެސްޓް ޕްރެކްޓިސްއަކީ އެފަދަ މީހުން އާއިލާގެ ތެރޭގައި ބައިތިއްބައިގެން ފަރުވާދިނުމެވެ. އެފަދަ ހާލަތެއް ނެތް ނަމަ، ސެމީ ރެސިޑެންޝަލް ޕްރޮގްރާމެއް ގެންދިއުން ކަމަށާއި އެ އަށް ވުރެ ވެސް ކުއްޖާގެ ހާލަތު ގޯސް ނަމަ ތަނެއްގައި ބަންދުކޮށްގެން ފަރުވާ ދިނުން ކަމަށް ރާޝިދު ވިދާޅުވި އެވެ.

އެކަމަކު ރާއްޖޭގައި ހާލަތު ވަރަށް ތަފާތުކަން ފާހަގަކުރައްވައި އޭނާ ވިދާޅުވީ ކުދިކުދި ރަށްރަށުގައި އެންމެން ދަންނަ ތަނެއްގައި ބައިތިއްބައިގެން ފަރުވާދިނުމަކީ އެންމެ ރަނގަޅު ނަތީޖާ ނެރެވިދާނެ ކަމެއް ކަމަށް ތަޖުރިބާ ނުކުރެވޭ ކަމަށެވެ.

އޭނާ ވިދާޅުވީ މުޖުތަމައުގެ ތެރޭގައި އެ ކުދިންނަށް އެހީތެރިކަން ފޯރުކޮށްދޭނެ ބަޔަކު ނެތް ކަމަށެވެ.

"މި އުޅެނީ އަޅުގަނޑުމެންގެ ދަރިން ގެއަށް ވެސް ނުވައްދައިގެން. ކޮމިއުނިޓީގައި މިވަގުތު ނެތް އެނޭބަލްވެފައި އަޅުގަނޑުމެން މި ދެންނެވި ހާލަތުގައި ތިބި ކުދިންނަށް ކުއްލި ކަންކަމުގައި ފަރުވާ ހޯދާނެ މަރުކަޒުތަކެއް، ސެންޓަރުތަކެއް ނުވަތަ ރައްޓެހިންތަކެއް،" ރާޝިދު ވިދާޅުވި އެވެ.

އެ ސަބަބާ ހުރެ، ރާޝިދު ވިދާޅުވީ ކުދިންގެ ގައިގައި ރަނގަޅު އާދަތައް އަށަގެންނެވުމަށް އެ މީހުން ވަކި މުއްދަތަކަށް ތަނެއްގައި ބަންދުކޮށްގެން އެހީ ފޯރުކޮށްދިނުން މުހިއްމު ކަމަށެވެ.

"އެހެންވެ އަޅުގަނޑުމެންނަށް ކޮންމެވެސް ވަރަކަށް އެބަ މަޖުބޫރުވޭ، އަޅުގަނޑުމެންގެ ބެލުމުގެ ދަށުގައި ކޮންމެވެސް މުއްދަތަކަށް ބަހައްޓައިގެން ހެނދުނު ވަކި ގަޑިއެއްގައި ތެދުވެ، ރޭގަނޑު ވަކި ގަޑިއެއްގައި ނިދާ ގަޑިންގަޑި އަށް ފަރުވާތެރިކަމާ އެކު ކަންކަންކޮށް އޭނާގެ ގައިގައި ހުރި ނުރަނގަޅު އާދަތަކުން ދުރުކުރަން މަސައްކަތްކުރުން،" އޭނާ ވިދާޅުވި އެވެ.

ރާޝިދު ވިދާޅުވި ގޮތުގައި މިވަގުތު ވެސް ކޮމިއުނިޓީ ތެރޭގައި 300-400 އާ ދެމެދުގެ މީހުން އެބަ ތިއްބެވެ. އެކަމަކު އޭގެ ތެރެއިން ގިނަ މީހުންނަކީ އެންޑީއޭ އިން އެ މީހުންނަށް ކުރިއަށް ގެންދާ ނަފްސާނީ ދުޔަހެޔޮ ކަމުގެ ކްލާސްތަކަށް އަންނަ ބައެއް ނޫން ކަމަށް ވިދާޅުވި އެވެ. އެހެންވެ، އެކަން މަޖުބޫރުވާނެ ގޮތަކަށް ކޮމިއުނިޓީ ފަރުވާއަަށް ބަދަލުތަކެއް ގެނައުމުގެ މަސައްކަތް ކުރައްވާ ކަމަށް ވިދާޅުވި އެވެ.

"އެހެންވީމާ މިފަދަ ހާލަތްތައް އަޅުގަނޑުމެންނަށް ތަކުރާރުކޮށް ތަޖުރިބާ ކުރަން ޖެހުނީމަ މިހާރު އަޅުގަނޑުމެން ކޮމިއުނިޓީގައި ތިބޭ މީހުންނަށް ވެސް ތަފާތު ގޮތަކަށް ޕްރޮގްރާމު ބައްޓަން ކުރަމުން މިދަނީ،" އިސްކަންދަރުކޮށީގައި ބޭއްވި މީޑިއާ ބްރީފިންގައި ރާޝިދު ވިދާޅުވި އެވެ.

އޭނާ ވިދާޅުވި ގޮތުގައި މި ފަހުން މަސްތުވާތަކެތި ބޭނުންކުރާ މީހުންގެ މެދުގައި ސިންތެޓިކް ޑްރަގު އިތުރުވެ، އޭގެ ސަބަބުން އެ މީހުންގެ މެދުގައި ނަފްސާނީ ބަލި ވަނީ ބޮޑުވެފަ އެވެ.

އެކަމުގެ ސަބަބުން ފަރުވާދިނުމުގެ ނިޒާމަށް ގޮންޖެހުމެއް އެބަ އޮތް ކަމަށާއި އެންޑީއޭގެ ފަރުވާ ބައްޓަންކޮށްފައި އޮތީ މަސްތުން ސަލާމަތްކުރުމަށް ކަމަށް ރާޝިދު ވިދާޅުވި އެވެ. އެކަމަކު ނަފްސާނީ މައްސަލަ ބޮޑުވުމުން ފުރަތަމަ ފަށަން ޖެހެނީ އެ ފަރުވާ ކަމަށް އޭނާ ވިދާޅުވެ އެވެ.

"މިއީ އަޅުގަނޑުމެން އިކުއިޕްޓް ވެފައިވާ ހާލަތެއް ނޫން. މިއީ ވަރަށް ބޮޑު ޗެލެންޖެއް،"

އެންޑީއޭ އިން ފަރުވާދެނީ ރެސިޑެންޝަލް އާއި ނޮން ރެސިޑެންޝަލް ފަރުވާ އެވެ. އޭގެ ތެރެއިން ރެސިޑެންޝަލް ފަރުވާގެ ތެރޭގައި ހިމެނެނީ ކ. ހިންމަފުށީގައި ހުންނަ ތެރަޕިއުޓިކް ކޮމިއުނިޓީ ރިހެބިލިޓޭޝަން ސެންޓަރާއި ރެސިޑެންޝަލް ޑީޓޮކްސް އާއި ސެމީ ރެސިޑެންޝަލް ފެސިލިޓީ އާއި ރިމާންޑް ސެންޓަރެކެވެ. އައްޑު އާއި ފުވައްމުލަކާއި ގދ. ތިނަދޫގައި ވެސް ޑީޓޮކްސް ފެސިލިޓީއެއް ހުރެ އެވެ.

މުޅި ރާއްޖޭގައި ޑްރަގު ފަރުވާ ދިނުމަށް ހަދާފައިވާ ތަންތަނުގެ ބެޑް ކެޕޭސިޓީއަކީ 350 އެވެ.