ރާއްޖެ އަށް ނޮވެމްބަރު 1-15 އަށް އެތެރެކުރާ ވޭޕުން ނަގާ ޑިއުޓީ ބޮޑުކުރަން އިސްލާހެއް ހުށަހަޅައިފި

އަންނަ ނޮވެމްބަރު 1 އިން 15 ގެ ނިޔަލަށް ރާއްޖެ އަށް އެތެރެކުރާ ވޭޕުން ޑިއުޓީ ބޮޑުކުރުމަށް ސަރުކާރުގެ ފަރާތުން ގާނޫނަށް އިސްލާހެއް ހުށަހަޅައިފި އެވެ.

އެ މުއްދަތުގައި ރާއްޖެ އަށް އެތެރެކުރާ ވޭޕްގެ ޑިއުޓީ ބޮޑުކުރަން ސަރުކާރުން ނިންމިއިރު ނޮވެމްބަރު 15 އިން ފެށިގެން ރާއްޖެ އަށް ވޭޕް އެތެރެކުރުން މަނާކުރުމަށް އަދި ޑިސެމްބަރު 15 އިން ފެށިގެން ވޭޕް ވިއްކުމާއި ބޭނުންކުރުން މަނާކުރާނެކަން ރައީސް ޑރ. މުހައްމަދު މުއިއްޒު ވަނީ އިއުލާން ކުރައްވައިފަ އެވެ. އެހެންވެ، އެކަމަށްޓަކައި އަޅަންޖެހޭ ފިޔަވަޅުތައް އަޅަން ކަމާ ބެހޭ އިދާރާތަކަށް އެ މަނިކުފާނު ވަނީ މި މަހުގެ 14 ގައި އަންގަވައިފަ އެވެ.

ނޮވެމްބަރު 1 އިން 15 އާ ހަމައަށް ރާއްޖެ އެތެރެކުރާ ވޭޕުން ނަގާ ޑިއުޓީ ބޮޑުކުރަން ސަރުކާރުގެ ފަރާތުން ގާނޫނަށް އިސްލާހު ހުށަހަޅުއްވަނީ މައްޗަންގޮޅި އުތުރު ދާއިރާގެ ޕީއެންސީ މެމްބަރު އިބްރާހިމް މުހައްމަދެވެ.

އެ އިސްލާހު ގެނައުމަށް ހުށަހެޅުއްވީ ދުންފަތް ކޮންޓްރޯލްކުރުމާ ބެހޭ ގާނޫނުގެ ދަށުން އިލެކްޓްރޯނިކް ސިނގިރޭޓާއި ވޭޕް ކުރުމަށް ބޭނުންކުރާ އެފަދަ އާލާތްތައް ރާއްޖެ އަށް އެތެރެކުރުން މަނާކުރާ ތާރީހާ ހަމައަށް ހިނގާ މުއްދަތުގައި ރާއްޖެ އަށް ގެންނަ އެފަދަ ތަކެތިން ނަގާ އިމްޕޯޓް ޑިއުޓީގެ މިންވަރު އިތުރުކުރުމަށެވެ.

އިމްޕޯޓު ޑިއުޓީ އާއި ރޯޔަލްޓީ ރެވެނިއު މާފުކުރެވޭނެ ހާލަތްތަކަށް އިސްލާހު ގެނައުމަށް ވެސް މި ބިލުގައި ހިމަނާފައިވެ އެވެ.

އެ ބިލްގައި ބުނެފައި ވަނީ ރޯކުރުމަކާ ނުލާ ހޫނުކޮށްގެން ބޭނުންކުރެވޭ ގޮތަށް އުފައްދާފައިވާ ހުންނަ ދުންފަތުގެ އުފެއްދުންތަކުން 50 ޕަސެންޓާއި ސްޓިކާ އަކުން 8 ރުފިޔާ ނެގުމަށެވެ. ދުންފަތުގެ އިސްތިއުމާލުކުރުމަށް ބޭނުންކުރާ އާލަތްތަކަށް އަޅާ ފްލޭވާ އާއި ކެމިކަލުން 8 ރުފިޔާ ނަގަން ވެސް އިސްލާހުގައި ވެ އެވެ.

މި އިސްލާހުތަކުގެ ސަބަބުން ދައުލަތަށް އިތުރު ހަރަދެއް ކުރަން ނުޖެހޭނެ ކަމަށާއި އެކަމަކު ބަދަލު ގެނެސްފި ނަމަ، އިމްޕޯޓު ޑިއުޓީގެ ގޮތުގައި އަންނަ އަހަރު ލިބޭ އާމްދަނީ 1.5 މިލިއަން ރުފިޔާ އަށް އިތުރުކުރެވޭނެ ކަމަށް އަންދާޒާ ކުރެވޭ ކަމަށް ބިލުގައިވެ އެވެ.

އެ ބިލާ ގުޅިގެން އެޓާނީ ޖެނަރަލް އަހުމަދު އުޝާމް ވިދާޅުވީ، ރައީސް ޑރ. މުހައްމަދު މުއިއްޒު ނިންމަވާފައި ވަނީ ނޮވެމްބަރު އެއްވަނަ ދުވަހުން ފެށިގެން ޑިއުޓީ ބޮޑުކުރަން ކަމަށެވެ. އަދި ނޮވެމްބަރު 15 އިން ފެށިގެން ވޭޕްކުރުމަށް ބޭނުންކުރާ ތަކެތި ރާއްޖެ އެތެރެކުރުން މަނާކުރުމަށް ކަމަށެވެ.

"ގާނޫނަށް ހުށަހަޅާފައިވާ އިސްލާހަކީ 1 ނޮވެމްބަރުން ފެށިގެން 15 ނޮވެމްބަރު 2024 މި މުއްދަތުގެ ތެރޭގައި އެތެރެކުރާ ވޭޕްކުރުމަށް ބޭނުންކުރާ ތަކެތީގެ ޑިއުޓީ ބޮޑުކުރުމަށް ހުށަހަޅާފައިވާ އިސްލާހެއް،" އެކްސްގައި ކުރެއްވި ޓްވީޓުގައި އުޝާމް ވިދާޅުވި އެވެ.

ރާއްޖޭގައި ވޭޕް މަނާކުރުމަކީ ފަހުގެ ތާރީހެއްގައި ރާއްޖޭގައި ދުންފަތާ ދެކޮޅަށް ސަރުކާރުން އަޅާ އެންމެ ހަރުކަށި ފިޔަވަޅެވެ.

ދުންފަތުގެ ބާވަތްތަކުން ނަގާ އިމްޕޯޓް ޑިއުޓީ އަންނަ މަހުން ފެށިގެން 8 ރުފިޔާ އަށް ބޮޑުކޮށް އަދި އާންމު ތަންތަނުގައި ދުންފަތުގެ އިސްތިއުމާލު ކުރުން ހުއްޓުވުމަށް ފިޔަވަޅުތައް ވަރުގަދަ ކުރަން ވެސް ރައީސް މުއިއްޒު ވަނީ ނިންމަވައިފަ އެވެ. އޭގެ ތެރޭގައި ސިނގިރޭޓާއި ބިޑިއަށް ނަގާ އިމްޕޯޓް ޑިއުޓީގެ ސްޕެސިފިކް ރޭޓް ތިން ރުފިޔާ އިން އަށް ރުފިޔާއަށް ބޮޑުކުރުން ހިމެނެ އެވެ.

އާންމު ސިއްހަތަށް ބޮޑު ގެއްލުމެއް ލިބޭތީ ރާއްޖެއަށް ވޭޕް އެތެރެކުރުން މަނާކުރަން ރައީސް ނިންމެވިއިރު އެގޮތަށް ނިންމައިދޭން، އެ މަނިކުފާނުގެ އަރިހުގައި ގައިންގަޔަށް ނާރާ ބަލިތަކާ ދެކޮޅަށް މަސައްކަތްކުރާ އެންސީޑީ އެލަޔަންސުންނާއި ޑޮކްޓަރުންނާއި ނަރުހުންގެ ޖަމިއްޔާ އަދި ކުޅިވަރު އެސޯސިއޭޝަންތަކުން ވެސް އެދިފައި ވެ އެވެ.

ދުންފަތާ ދެކޮޅަށް ހަރުކަށި ފިޔަވަޅުތަކެއް ރައީސް މުއިއްޒު އެޅުއްވިއިރު ޑަބްލިއުއެޗްއޯއިން އަންދާޒާކުރާ ގޮތުގައި ހަތަރު ލައްކަ މީހުން ވެސް ހަމަނުވާ މި ކުޑަ އާބާދީގައި ސީދާ ދުންފަތުގެ އިސްތިއުމާލުކުރުމުން ޖެހޭ ބަލިތަކުން ކޮންމެ އަހަރަކު 150 މީހުން މަރުވެ އެވެ.