ޖަރުމަނުގައި މަރުވި ދިވެހި މީހާ އަށް ތުހުމަތުވަނީ އޭނާގެ އަންހެނުން މަރާލި ކަމަށް

ޖަރުމަނުގައި މަރުވި ދިވެހި މީހާ އަށް ތުހުމަތުވަނީ އޭނާގެ އަނބިމީހާ މަރާލިކަން ކަމަށް އެނގިއްޖެ އެވެ.

ޖަރުމަނުގައި މަރުވި ދިވެއްސަކީ ނ. މަނަދޫ، އާދަމް ނަސީރު ކިޔާ 44 އަހަރުގެ މީހެކެވެ.

ޖަރުމަނުގެ ބައެއް ނޫސްތަކުން ރިޕޯޓްކޮށްފައިވާ ގޮތުގައި އެ ހާދިސާ ހިނގީ މިދިޔަ މަހުގެ 24 ގަ އެވެ.

އެ ދެމަފިރިން ދިރިއުޅުނީ ޖަރުމަނުގެ ސިޓީއެއް ކަމަށްވާ ޔާނަތަލްގައި ހުންނަ ގެއެއްގަ އެވެ. އުމުރުން 44 އަހަރުގެ ޖަރުމަނުގެ އަންހެން މީހާގެ ފުރާނަ ނެތް ހަށިގަނޑު ފެނުނީ އެ ދެމަފިރިން ދިރިއުޅޭ ގެއަށް ދިޔަ އަންހެން މީހާގެ އާއިލާގެ ބަޔަކަށެވެ.

މަރުވެފައި އޮތް އެ އަންހެން މީހާ ކައިރީގައި ދިވެހި މީހާ ވެސް އޮތް ކަމަށާއި އޭނާ އަަށް ވެސް ވަރަށް ބޮޑަށް އަނިޔާވެފައި އޮތް ކަމަށް ރިޕޯޓްތައް ބުންޏެވެ.

ޖަރުމަނުގެ ނޫހެއް ކަމަށްވާ "ޓެގް ޓުވެންޓީފޯ"ގައި ބުނީ ފުލުހުންގެ ތަހުގީގަށް އެނގުނު ގޮތުގައި، އަންހެން މީހާ މަރާލި ދުވަހު، އެ ދެމަފިރިންގެ ދެމެދުގައި ވަރަށް ބޮޑު ޒުވާބެއް ހިނގި އެވެ.

ޖަރުމަނުގެ ފުލުހުން ތުހުމަތުކުރާ ގޮތުގައި، އެ ޒުވާބުގެ ތެރެއިން ދިވެހި މީހާ، އޭނާގެ އަނބިމީހާ އަށް އަނިޔާކޮށް މަރާލީ އެވެ. އޭގެ ފަހުން ދިވެހި މީހާ އޭނާ އަމިއްލަ ނަފުސަށް ވެސް އަނިޔާކުރީ ކަމަށް ފުލުހުން ތުހުމަތުކުރެ އެވެ. ފަހުން ދިވެހި ފިރިހެން މީހާ މަރުވީ އަމިއްލަ އަށް ހަށިގަނޑަށް ދިން އަނިޔާތަކުގައި ކަމަށް ފުލުހުން ބުންޏެވެ.

"ޓެގް ޓުވެންޓީފޯ" އިން ބުނިގޮތުގައި، އަންހެންމީހާ އަށް އަނިޔާކޮށް މަރާލި ދުވަހު ދިވެހި ފިރިހެން މީހާ ހޮސްޕިޓަލަށް ގެންގޮސް ފަރުވާ ވެސް ދީފައިވެ އެވެ.

އެ މައްސަލަ ޖަރުމަނުގެ ފުލުހުން ތަހުގީގުކުރަނީ ހޯމިސައިޑް ކޭސްއެއްގެ ގޮތުގައި ކަމަށް ވެސް ނޫސްތަކުން ބުންޏެވެ.

ދެމަފިރިންގެ މެދުގައި ހިނގި އެ މާރާމާރީގެ މަގުސަދު ދެނެގަތުމަށް ފުލުހުން އެ މައްސަލަ ތަހުގީގުކުރަމުން އަންނަ ކަމަށް ވެސް ބުންޏެވެ.

އާދަމް ނަސީރު މަރުވިކަން، ޖަރުމަނުގައި ހުންނަ ދިވެހި އެމްބަސީ އަށް އެންގީ މީގެ ހަތް ވަރަކަށް ދުވަސް ކުރިން ކަމަށް ވެ އެވެ. އެމްބަސީން އާދަމް ނަސީރުގެ އާއިލާ އަށް އެކަން އެންގީ މިދިޔަ ބުދަ ދުވަހުކަން ވަނީ އެނގިފަ އެވެ.

އާދަމް ނަސީރަކީ މީގެ 10 ވަރަކަށް އަހަރު ކުރިން ފެށިގެން ޖަރުމަނުގެ މީހަކާ އިނދެގެން އެ ގައުމުގައި އުޅެމުން އައި މީހެކެވެ. އެ ކައިވެންޏަށް ތިން ކުދިން ލިބިފައިވާ ކަމަށް ވެސް އެނގިފައިވެ އެވެ.

އެ މައްސަލާގައި ރާއްޖޭގެ ފޮރިން މިނިސްޓްރީގެ ބަހެއް އަދި ނުލިބެ އެވެ.