ފޭކް ސްލިޕެއް ފޮނުވައިގެން 28،000ރ. އަތުލި މައްސަލައެއްގައި މީހަކު ހައްޔަރުކޮށްފި

ޑޮލަރު ވިއްކުމަށް ކަމަށް ބުނެ ފޭކް ސްލިޕެއް ފޮނުވައިގެން 28،000ރ. އަތުލި މީހަކު ހައްޔަރުކޮށްފި އެވެ.

އެ މައްސަލާގައި ހައްޔަރު ކޮށްފައިވަނީ ޒައިދާން މުހައްމަދު ހާޝިމް ނަމަކަށް ކިޔާ އުމުރުން 27 އަހަރުގެ ދިވެހި ފިރިހެނެކެވެ. ކްރިމިނަލް ކޯޓުން އޭނާ ބަންދުކުރަން އިއްޔެ ނެރުނު އަމުރުގައިވަނީ އޭނާ ކުށްކުރި ކަމަށް ތުހުމަތު ކުރެވޭ މިންވަރަށް ފުލުހުން ހެކި ހުށަހަޅާފައިވާ ކަމަށެވެ.

ކޯޓުގެ އަމުރުގައިވަނީ ޑޮލަރު ވިއްކުމަށް ކަމަށް ބުނެ ސައްހަ ނޫން ސްލިޕެއް ފޮނުވައިގެން 28،000ރ. މަކަރާއި ހީލަތުން ހޯދާފައިވާ ކަމަށް ތުހުމަތުވާ ކަމަށާއި އަދި އޭގެ ތެރެއިން ބައެއް ފައިސާ އަނބުރާ ރައްދު ކޮށްފައިވާ ކަމަށް އެ އަމުރުގައި ބުނެފައިވެ އެވެ.

އެ މައްސަލާގައި ފައިސާ ގެއްލުނު ފަރާތުން ޒައިދާންގެ އާއިލާއާ ވާހަކަ ދެއްކި ކަމަށާއި އަދި އެ އާއިލާއިން އެ ފައިސާ އަނބުރާ ދައްކަން އެއްބަސްވެފައިވާ ކަމަށް ވެސް އެ އަމުރުގައި ބުނެފައިވެ އެވެ.

އެ މައްސަލާގައި ކޯޓުން ވަނީ އޭނާ 15 ދުވަހަށް ބަންދު ކުރަން ނިންމައިފަ އެވެ.

އޮޅުވާލައިގެން ގިނަ އަދަދެއްގެ ފައިސާ މީހުންގެ އަތުލުމުގެ މައްސަލަތަކުގައި މީގެކުރިން ވެސް މީހުން ހައްޔަރު ކޮށްފައިވެ އެވެ.