ރާދިކާ ބަލިވެއިންކަން ހާމަކުރީ ތަފާތު ގޮތަކަށް

ބޮލީވުޑްގެ އެކްޓްރެސް ރާދިކާ އާޕްތޭ އަލަތު ދަރިފުޅަށް ބަލިވެއިންކަން ވަރަށް ތަފާތު ގޮތަކަށް ހާމަކޮށްފި އެވެ.

ރާދިކާ އާންމުންނަށް ނުފެންނަތާ ވަރަށް ގިނަ ދުވަސްވި ފަހުން މިދިޔަ ބުދަ ދުވަހު ވަނީ، ލަންޑަނުގައި މިހާރު ކުރިއަށް ގެންދާ ބީއެފްއައި ލަންޑަން ފިލްމް ފެސްޓިވަލަށް ގޮސްފަ އެވެ. ރާދިކާ އެ ތަނަށް ދިޔައީ އޭނާގެ އާ ފިލްމު "ސިސްޓާ މިޑްނައިޓް" އެ ފެސްޓިވަލުގައި ސްކްރީންކުރާތީ އެވެ.

ފިލްމް ފެސްޓިވަލުގެ ރެޑްކާޕެޓަށް އޭނާ އެރުމާ އެކު ގިނަ ބަޔަކަށް ހައިރާން ކަމެއް ލިބުނެވެ. އޭނާ ބަލިވެއިންކަން އާންމުންނަށް އެނގުނީ އެ ހިސާބުންނެވެ. ރާދިކާ ހުރީ އޭނާގެ "ބޭބީ ބަންޕް" ފާހަގަވާނެ ގޮތަށް ކަޅުކުލައިގެ އޮފް ޝޯލްޑާ މިނީ ޑްރެސްއެއްގަ އެވެ.

ރާދިކާ މިހާރު ވަނީ އޭނާ އިންސްޓަގްރާމްގައި ވެސް ރެޑްކާޕެޓްގެ ފޮޓޯތައް ހިއްސާކޮށްފަ އެވެ. އެކަމަކު، އޭނާ ބަލިވެއިނުމާ ގުޅޭ އެއްވެސް ވާހަކައެއް އަދި ނުދައްކަ އެވެ.

ރާދިކާ އުޅެނީ އިނގިރޭސި ވަޔަލިނިސްޓް އަދި މިއުޒިކް ކޮމްޕޯސާ ބެނެޑިކްޓް ޓޭލާއާ ކައިވެނިކޮށްގެންނެވެ. އެ ކައިވެންޏަށް 12 އަހަރުވީ އިރު، އެ ދެމީހުންނަކީ ވެސް ވަރަށް ޕްރައިވެޓް ލައިފްއެއް އުޅޭ ދެ ފަންނާނުންނެވެ. އަމިއްލަ ދިރިއުޅުމުގެ ކަންކަން ފޭނުންނާ ވަރަށް މަދުން ނޫނީ ހިއްސާ ނުކުރެ އެވެ.

އެ ދެމީހުން ބައްދަލުވީ 2011 ވަނަ އަހަރު ރާދިކާ ނެށުމުގެ ކޯހެއް ހަދަން ލަންޑަނުގައި އުޅުނު ދުވަސްވަރު އެވެ.

ރާދިކާ އެންމެ ފަހުން ފެނުނީ ސްރީރާމް ރަގަވަން ޑައިރެކްޓްކޮށް މި އަހަރު ކުރީކޮޅުގައި ގެނެސްދިން "މެރީ ކްރިސްމަސް"ގައި ކުޅުނު ހާއްސަ ރޯލަކުންނެވެ. އެ ފިލްމުގެ ލީޑު ރޯލްތައް ކުޅުނީ ކެޓްރީނާ ކައިފް އާއި ވިޖޭ ސެތުޕަތީ އެވެ. އޭގެ އިތުރުން، ރާދިކާ ވަނީ ވައިއާރްއެފް އެންޓަޓެއިންމަންޓްގެ "އައްކާ" ސީރީޒްގައި ވެސް މަސައްކަތްކޮށްފަ އެވެ. އެއީ އަންނަ އަހަރު ގެނެސްދޭ ސީރީޒެކެވެ.

ބީއެފްއައި ލަންޑަން ފިލްމް ފެސްޓިވަލުގައި ސްކްރީންކުރި، ރާދިކާ ލީޑު ރޯލު ކުޅޭ "ސިސްޓާ މިޑްނައިޓް" އަކީ އަލަށް ކައިވެނިކޮށްގެން އުޅޭ އަންހެނަކަށް ދިމާވާ އާދަޔާ ހިލާފު ހާދިސާތަކެއް ދައްކާނެ ފިލްމެކެވެ. އެ ފިލްމު ޑައިރެކްޓުކުރީ ކަރަން ކަންދަހާރީ އެވެ. މިދިޔަ މެއި މަހު ބޭއްވި ކާންސް ފިލްމް ފެސްޓިވަލްގައި ވެސް އެ ފިލްމު ސްކްރީންކޮށްފައިވެ އެވެ.

އެ ފިލްމު ސިނަމާތަކުގައި ދައްކަން ފަށަނީ އަންނަ އަހަރު މާޗު 15 ގަ އެވެ.