ދީޕިކާ ބަނޑުބޮޑު ކަމަށް ރިޕޯޓްތައް ބުނެފި

ބޮލީވުޑްގެ ތަރި ދީޕިކާ ޕަޑުކޯން ބަލިވެއިން ކަމަށް އިންޑިއާގެ ނޫސްތަކުން ރިޕޯޓްކޮށްފި އެވެ.

އިންޑިއާގެ މެގަޒިންއެއް ކަމަށްވާ "ދަ ވީކް" އިން ދީޕިކާ އަދި އޭނާގެ ފިރިމީހާ ރަންވީރް ސިންގްއާ ގާތް މީހަކާ ހަވާލާދީ ބުނެފައި ވަނީ ދީޕިކާ އިނީ އެ ދެމަފިރިންގެ އަލަތު ދަރިފުޅަށް ބަލިވެ ކަމަށެވެ.

ދީޕިކާގެ ބަނޑަށް ހަ މަސް ވެއްޖެ ކަމަށް ވެސް އެ ނޫހުގައި ބުންޏެވެ.

ނަމަވެސް މި ޚަބަރު އެ ދެމަފިރިން މީޑިއާއަށް ކަށަވަރުކޮށެއް ނުދެ އެވެ.

ދީޕިކާ ބަނޑުބޮޑު ކަމަށް ފުރަތަމަ އަޑު ފެތުރުނީ މިދިޔަ އާދިއްތަ ދުވަހު ބޭއްވި އިނގިރޭސިވިލާތުގެ އެންމެ ޝަރަފުވެރި ފިލްމް އަދި ޓީވީ އެވޯޑް ބާފްޓާއަށް ދީޕިކާ ދިޔައިރު އޭނާ ލައިގެން ހުރި ސާޅިން، ބަނޑު ވަރަށް ބޮޑަށް ފޮރުވާފައި ހުރުމުންނެވެ.

މިދިޔަ މަހު ދީޕިކާ ވޯގް އިންޑިއާ އަށް ދިން އިންޓަވިއުއެއްގައި ވެސް ވަނީ ކުދިން ހޯދުމާ ގުޅޭ ގޮތުން ވާހަކަދައްކައިފަ އެވެ. އެ ދެމަފިރިން ކުއްޖަކު ހޯދަން ވިސްނާތޯ އެ އިންޓަވިއުގައި ސުވާލު ކުރި އެވެ.

"އާނ ޔަގީން. ރަންވީރް ވެސް، އަހަރެން ވެސް ކުޑަކުދިންގެ ދެކެ ވަރަށް ލޯބިވޭ. އަހަރެމެންނަށް ކުއްޖަކު ލިބޭނެ ދުވަހެއްގެ އިންތިޒާރުގައި މި ތިބީ،" ދީޕިކާ ބުންޏެވެ.

ރަންވީރް އާއި ދީޕިކާ ކައިވެނިކުރީ ނޮވެމްބަރު 14، 2018 ގަ އެވެ. އެ މީހުން ކައިވެނި ކުރީ ލޯބީގެ ގޮތުން ގުޅިގެން އުޅޭތާ ހަ އަހަރުވީ ފަހުންނެވެ.