ޓީޖީއެސްޓީ ބޮޑުކުރުމުގެ ބިލްގެ ބަހުސް ނިންމައި، ކޮމިޓީއަށް

ޓޫރިޒަމް ދާއިރާ އިން ނަގާ ޓެކްސް، ޖީއެސްޓީ އަންނަ އަހަރު 17 ޕަސެންޓަށް ބޮޑުކުރަން ސަރުކާރުގެ ފަރާތުން ހުށަހަޅާފައިވާ ބިލުގެ އިބްތިދާއީ ބަހުސް ނިންމައި އެ ބިލް ދިރާސާ ކުރުމަށްޓަކައި ކޮމިޓީ އަށް ފޮނުވައިފި އެވެ.

މުދަލާއި ހިދުމަތުގެ އަގުން ޓެކްސް ނެގުމުގެ އިސްލާހުގެ ގާނޫނަށް ހުށަހެޅުއްވީ ސަރުކާރުގެ ފަރާތުން މާފަންނު ހުޅަނގު ދާއިރާގެ ޕީއެންސީގެ މެންބަރު މުހައްމަދު މުސްތަފާ އެވެ.

ބިލުގައިވާ ގޮތުން މިހާރު ނަގަމުން އަންނަ ގޮތަށް 16 ޕަސެންޓުގައި ޓީޖީއެސްޓީ ނަގާނީ އަންނަ އަހަރު މެއި މަހުގެ ނިޔަލަށެވެ. އެކަމަކު އަންނަ އަހަރުގެ ޖޫން މަހުން ފެށިގެން ޓީޖީއެސްޓީ 17 ޕަސެންޓުގައި ނަގަން ފަށާނެ ކަމަށް އެ އިސްލާހުގައި ވެ އެވެ. އެއާ އެކު، ދައުލަތަށް އިތުރަށް 200 މިލިއަން ރުފިޔާ ލިބޭނެ އެވެ.

ބިލު ބަލައިގަތުމަށް މަޖިލީހުގައި މިއަދު ނެގި ވޯޓުގައި ބިލު ބަލައިގަތުމަށް ފެންނަ ކަމަށް 52 މެންބަރުން ވޯޓު ދެއްވި އެވެ. ނުފެންނަ ކަމަށް ހަތް މެންބަރަކު ވޯޓު ދެއްވި އެވެ.

ޓެކްސް ބިލަކަށް ވާތީ އެ ބިލް ދިރާސާ ކުރާނީ މުޅި މަޖިލީހުގެ ކޮމިޓީންނެވެ. މިއަދުގެ ޖަލްސާގެ ރިޔާސަތުގައި އިންނެވި މަޖިލީހުގެ ނައިބު ރައީސް އަހުމަދު ނާޒިމް ވިދާޅުވީ މަޖިލީހުގެ މާދަމާގެ ޖަލްސާގެ އެޖެންޑާގެ މަސައްކަތް ނިމިއްޖެ ނަމަ މާދަމާ ކޮމިޓީ ބާއްވަން ގަސްދު ކުރައްވާ ކަމަށެވެ.

މި ބިލުގެ ބަހުސް މިއަދު ކުރިއަށް ގެންގޮސްފައިވާއިރު، ސަރުކާރުގެ ގިނަ މެންބަރުން ވަނީ ޓެކްސް ބޮޑު ކުރުމަކީ މުހިންމު ފިޔަވަޅެއްގެ ގޮތުގައި ސިފަ ކުރައްވައިފަ އެވެ. ނަމަވެސް އިިދިކޮޅު މެންބަރުން ވަނީ ޓެކްސް ބޮޑު ނުކުރާނެ ކަމަށް ސަރުކާރުން މީގެ ކުރިން ބުނެފައިވާތީ އެކަމަށް ފާޑުކިޔައިފަ އެވެ.

މި ބިލުގެ އިތުރުން ގްރީން ޓެކްސް އާއި އެއާޕޯޓް ޗާޖު ބޮޑު ކުރުމަށް ވެސް ސަރުކާރުން ވަނީ މަޖިލީހަށް ފޮނުވައިފަ އެވެ. މި ދެ ބިލުގެ ބަހުސް ވެސް މިއަދު ކުރިއަށް ގެންގޮސްފައިވެ އެވެ.

ސަރުކާރުން މީގެ ކުރިން ބުނެފައި ވަނީ ޖީއެސްޓީގެ ޓެކްސް ބޭސް ފުޅާކުރުމުގެ މަސައްކަތް ކުރާނެ ކަމަށާއި ނަމަވެސް ޖީއެސްޓީ އާއި ޓީޖީއެސްޓީ ބޮޑު ނުކުރާނެ ކަމަށެވެ.