ސިޓީ ދޫކޮށް އިންގްލެންޑްގެ ވަޒީފާއަށް، ގާޑިއޯލާ ބުނީ ހަމަ ކޮންމެ ގޮތެއްވެސް ވެދާނެ

މެންޗެސްޓާ (އޮކްޓޯބަރު 15) – އިންގްލެންޑްގެ ގައުމީ ޓީމުގެ ކޯޗުގެ މަގާމަށް ދިއުމަކީ ހަމަ ވެދާނެ ގޮތެއް ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފި އެވެ.

ސިޓީއާ އެކު ގާޑިއޯލާ ހަދާފައިވާ އެއްބަސްވުން މި ސީޒަނުގެ ނިޔަލަށް ހަމަވާނެ އެވެ. ސިޓީގައި މަޑުކުރުމާ މެދު މިހާތަނަށް ކަށަވަރު ޖަވާބެއް ގާޑިއޯލާ ދީފައެއް ނުވެ އެވެ.

ބާސެލޯނާ އާއި ބެޔާން މިޔުނިކުގައި ވެސް ކާމިޔާބު ހޯދި ކޯޗު، ކުރިން ބުނެފައި ވަނީ ގައުމީ ޓީމަކަށް ކޯޗުކޮށް ދިނުމަކީ އޭނާ ކުރަން ބޭނުންވާ މަސައްކަތެއް ކަމަށެވެ. ސްޕެއިންގެ ކުރީގެ ކޯޗު ވިންސެންޓޭ ޑެލްބޮސްކޭ 2016 ގައި އެ މަގާމު ދޫކޮށްލުމުން އެ ވަޒީފާއާ ގާޑިއޯލާ ގުޅުވައި މީޑިއާތަކުން އެދުވަސްވަރު ވާހަކަ ފެތުރި އެވެ.

މި އަހަރުގެ ޔޫރޯ އަށް ފަހު ގެރެތު ސައުތުގޭޓް އިނގިރޭސި ކޯޗުކަން ދޫކޮށްލުމުން އެ މަގާމަށް ދާއިމީ ކޯޗަކު އަދި އައްޔަނެއް ނުކުރެ އެވެ. އެ މަގާމަށް ވެސް ގާޑިއޯލާއާ ގުޅުވައި މީޑިއާއިން ވާހަކަ ފަތުރަ އެވެ. އެކަމަކު ގާޑިއޯލާ ބުނީ އިންގްލެންޑްގެ ވަޒީފާއަށް އޭނާ ދާން ނޫޅޭ ކަމަށެވެ. ނަމަވެސް ކުރިމަގުގައި ކޮންމެ ގޮތެއް ވެސް ވެދާނެ ކަމަށް އޭނާ ބުންޏެވެ.

"އަހަރެން ޔަގީންކޮށްދީފާނަން ސިޓީގައި މަޑުކުރުމާ މެދު ނުވަތަ ދޫކޮށްލުމާ މެދު އަހަރެން ގޮތް ނިންމައިފައިން. އަހަރެން ފަހުން ބުނާނަން. އަހަންނަކަށް ނޭނގެ ވާނެ ގޮތެއް. އެކަމަކު ދިރިއުޅުމުގައި ހަމަ ކޮންމެ ގޮތެއް ވެސް ވެދާނެ،" އިޓަލީގެ ޓީވީ ޝޯ އަކަށް ދިން އިންޓަވިއުގައި ގާޑިއޯލާ ބުންޏެވެ.

އިންގްލެންޑް ޓީމުގެ ވަގުތީ ކޯޗަކީ ލީ ކާސްލީ އެވެ. ދާއިމީ ކޯޗަކު ހަމަޖެއްސުމުގައި އެކި ކޯޗުންނަށް އިނގިރޭސި އެފްއޭއިން ދަނީ ބަލަމުންނެވެ. އޭގެ ތެރޭގައި ޗެލްސީގެ ކުރީގެ ދެ ކޯޗުން ކަމަށްވާ ތޯމަސް ޓޫހުލް އާއި ގްރަހަމް ޕޮޓާ ހިމެނެ އެވެ. ޓޫހުލް ވަނީ ކުރިން ޖަރުމަނުގެ ގައުމީ ޓީމުގެ ކޯޗުކަން ވެސް ކޮށްފަ އެވެ.