ޝްރައްދާ މީހަކާ ޑޭޓްކުރާކަން ޔަގީންކޮށްދީފި

ބޮލީވުޑްގެ އެކްޓްރެސް ޝްރައްދާ ކަޕޫރް މީހަކާ ޑޭޓްކުރާކަން އޭނާ ޔަގީންކޮށްދީފި އެވެ.

ޝްރައްދާ މިހާރު އަންނަނީ އޭނާގެ އެންމެފަހުގެ ފިލްމު "ސްތުރީ 2"ގެ ބޮޑު ކާމިޔާބީ ފާހަގަކުރަމުންނެވެ. އެ ފިލްމަކީ ބޮލީވުޑްގެ މި އަހަރުގެ އެންމެ ކާމިޔާބު ފިލްމު ވެސް މެ އެވެ.

ޝްރައްދާއަކީ އާންމުކޮށް އޭނާގެ އަމިއްލަ ދިރިއުޅުމާ ބެހޭ ގޮތުން މާ ގިނައިން މީޑިއާގައި ވާހަކަދައްކާ ފަންނާނެއް ނޫނެވެ. ނަމަވެސް، މީގެ ދުވަސްކޮޅެއް ކުރިން ވަނީ ފިލްމު ރައިޓަރު ރާހުލް މޯދީއާ އޭނާ ރައްޓެހިވެގެން އުޅޭ ކަމަށް ބުނާ އަޑުތަކެއް ފެތުރިފަ އެވެ.

ސެލެބްރިޓީންގެ ހަބަރުތައް ގެނެސްދޭ "ކޮސްމޮޕޮލިޓަން"އަށް އިއްޔެ ދިން އިންޓަވިއުއެއްގައި ޝްރައްދާ ވަނީ އޭނާ މީހަކާ ރައްޓެހިވެގެން އުޅޭކަން ޔަގީންކޮށްދީފަ އެވެ. އެކަމަކު، އެއީ ކާކު ކަމެއް ނުބުނެ އެވެ.

އެ އިންޓަވިއުގައި ޝްރައްދާ ބުނީ އޭނާގެ ޕާޓްނަރާ އެކު ވަގުތު ހޭދަކުރަން ވަރަށް ލޯބިކުރާ ކަމަށެވެ.

"އަހަރެން ވަރަށް ލޯބިވޭ އަހަރެންގެ ޕާޓްނަރާ އެކު ވަގުތު ހޭދަކުރަން، އަދި އޭނާއާ އެކު ކަންތައްތައް ކުރަން. މިސާލަކަށް ފިލްމެއް ބެލުން، ނުވަތަ ޑިނާއަކަށް ދިއުން، ނުވަތަ ދަތުރުކުރުން ކަހަލަ ކަންކަން. އާންމު ގޮތެއްގައި އަހަންނަކީ އެހެން މީހުންނާ އެކު ވަގުތު ހޭދަކުރަން ލޯބިކުރާ މީހެއް. ނުވަތަ ކަމެއް ނުކޮށް ހަމަ އެކުގައި ތިބެލަން ވެސް ލޯބިކުރަން،" ޝްރައްދާ ބުންޏެވެ.

ޝްރައްދާ އާއި އޭނާ މަޝްހޫރުވި ފިލްމު "އާޝިގީ 2"ގައި އޭނާއާ އެކު ލީޑު ރޯލު ކުޅުނު އެކްޓަރު އަދިތުޔަ ރޯއީ ކަޕޫރްއާ ރައްޓެހިވެގެން އުޅޭ ކަމަށް ބުނާ އަޑުތަކެއް ވެސް މީގެ ކުރިން ފެތުރުނެވެ. އެކަމަކު، އެ ދެމީހުން ވެސް އެކަން ކަށަވަރުކޮށް ނުދެ އެވެ.

ޝްރައްދާ މިހާރު ރައްޓެހިވެގެން އުޅޭ ކަމަށް ބުނާ ރާހުލްއަކީ އޭނާ މިދިޔަ އަހަރު ކުޅުނު ފިލްމު "ތޫ ޖޫޓީ މޭ މައްކާރު"ގެ ވެސް ރައިޓަރެވެ. އެ ދެމީހުން ރައްޓެހިވި ކަމަށް ވެސް ބުނަނީ އެ ފިލްމު ކުޅުނު ދުވަސްވަރު ކަމަށެވެ.