ފާރު ތަޅާލި މައްސަލާގައި ސިޓީ ކައުންސިލުން ބަދަލު ދޭން ޖެހޭ: ހުކުމް

މާލޭގެ ގެއެއްގައި މީހުން ވަދެ ނުކުމެ ނޫޅެވޭ ގޮތަށް ރޭނި ފާޜެއްގެ މައްސަލާގައި އެ ގޭގެ ވެރިފާރަށް ލިބުނު ގެއްލުމުގެ ބަދަލު މާލެ ސިޓީ ކައުންސިލުން ދޭން ޖެހޭ ކަމަށް ސިވިލް ކޯޓުން މިއަދު ހުކުމް ކޮށްފި އެވެ.

ހ. ހުދުފިނިފެންމާގޭގެ ފާރެއް ސިޓީ ކައުންސިލުން ތަޅާލީ އެ ގެއާ އިންވެގެން ހުރި ގޭގެ މީހުންނަށް ވަދެ ނުކުމެ ނޫޅެވޭ ގޮތަށް ސިޓީ ކައުންސިލްގެ ހުއްދައާ އެކު، އެ ތަނުގައި ހުރި އެހެން ގެއެއްގެ ބަޔަކު ފާރެއް ރޭނުމުންނެވެ. ކައުންސިލްގެ ހުއްދައާ އެކު، ފާރު ރާނާފައިވަނީ އެ ތަނުގައި އޮންނަ ގޯޅިއެއްގަ އެވެ. ނަމަވެސް އެ ފާރު ރޭނުމާ އެކު، ހުދުފިނިފެންމާގެއާގެއާ އިންވެގެން ތިބި ގޭގެ މީހުން ގޭގެ ތެރޭގައި ތާށިވެފައިވާތީ ކައުންސިލުން ނިންމީ ހުދުފިނިފެންމާގޭގެ ފާރު ތަޅާލުމަށެވެ.

އެ މައްސަލާގައި ހުދުފިނިފެންމާގޭގެ ވެރިޔާ ހަސަން ޝާކިރު ސިޓީ ކައުންސިލާ ދެކޮޅަށް ދައުވާކުރީ ހުދުފިނިފެންމާގެއާ އިންވެގެން ހުރި ގޭގައި ތިބި މީހުން ވަދެ ނުކުމެވޭނެ ގޮތެއް ނޯންނާނެކަން އެނގި ތިބެ ހުދުފިނިފެންމާގެއާގޭގެ މީހުންނަށް ގޯޅީގައި ފާރެއް ރޭނުމުގެ ހުއްދަ ދިނުމަށް ފަހު، ހުދުފިނިފެންމާގޭގެ ފާރެއް ތަޅާލަން ކައުންސިލުން ނިންމީ ގާނޫނާ ހިލާފަށް ކަމަށް ކަނޑައަޅައި ދިނުމަށެވެ. އެ މައްސަލަ ނިމެންދެން، ކުރިން އޮތް ގޮތަށް އެތަން ބޭއްވުމުގެ އަމުރަކަށް ވެސް ޝާކިރުގެ ފަރާތުން އެދުނެވެ. އެ އަމުރު ކޯޓުން ނެރެދިނެވެ.

މި މައްސަލާގައި ސިވިލް ކޯޓުން މިއަދު އިއްވި ހުކުމްގައި ކަނޑައަޅާފައިވަނީ ސިޓީ ކައުންސިލްގެ މުވައްޒަފުން ވަދެ ފާރު ތާޅާލުމުގެ ސަބަބުން ޝާކިރަށް ލިބުނު ގެއްލުމުގެ ޒިންމާ ކައުންސިލުން ނަގަން ޖެހޭނެ ކަމަށެވެ. ގެއްލުމުގެ ބަދަލު ހޯދަން ޝާކިރުގެ ފަރާތުން މައްސަލަ ހުށަހަޅައިފި ނަމަ އެ މައްސަލަ ކޯޓުން ބަލާނެ ކަމަށް ހުކުމްގައި ވެ އެވެ.

ޝަރީއަތުގައި މާލެ ސިޓީ ކައުންސިލަށް ދައުވާއަށް ޖަވާބުދާރީވުމަށް އެންގި ނަމަވެސް، އެ ކައުންސިލުން މި މައްސަލާގައި ދިން މުއްދަތުގައި ދިފާއެއް ހުށަހަޅާފައެއް ނުވެ އެވެ. ކައުންސިލްގެ ސިސްޓަމަށް ދިމާވި މައްސަލައަކުން ދިފާއު ހުށަހެޅުނީ ވަގުތު ހަމަވި ފަހުން ކަމަށް ބުނެ އިތުރު ފުރުސަތު ދޭން ކައުންސިލުން އެދުނަސް ޝަރީއަތުން ނިންމީ ކައުންސިލްގެ ޣައިރު ހާޒިރުގައި މައްސަލަ ކުރިއަށް ގެންދާށެވެ.