އެއްވެސް އެއްބަސްވުމެއްގައި ސިއްރެއް ނޯންނާނެ: ޣައްސާން

މިހާތަނަށް ރައީސް ޑރ. މުހައްމަދު މުއިއްޒު އެކި ގައުމުތަކާ އެކު ހަދާފައިވާ އެއްބަސްވުންތަކުގައި ދިވެހިންގެ ފުރިހަމަ ސިޔާދަތީ ބާރު ގެއްލޭ ފަދަ އެއްވެސް ކަމެއް ކުރައްވާފައި ނުވާ ކަމަށާއި އޭގައި ސިއްރެއް ވެސް ނެތް ކަމަށް ޑިފެންސް މިނިސްޓަރު މުހައްމަދު ޣައްސާން މައުމޫން ވިދާޅުވެއްޖެ އެވެ.

ރައީސް މުއިއްޒާ އެކު އިންޑިއާއަށް ކުރެއްވި ދަތުރުފުޅު ނިންމަވާލައްވަމުން މީޑިއާތަކަށް ދެއްވި އިންޓަވިއެއްގައި ޣައްސާން ވިދާޅުވީ މިއީ ވަރަށް ކާމިޔާބު ދަތުރެއް ކަމަށާއި މި ދަތުރުގެ ތެރެއިން ވަނީ ދިވެހިންނަށް ފައިދާވާނެ އެކި އެއްބަސްވުންތަކުގައި ސޮއިކޮށްފައި ކަމަށެވެ.

އެކަމަކު އެއިން އެއްވެސް އެއްބަސްވުމަކީ ރާއްޖޭގެ މިނިވަންކަމާއި ސިޔާދަތަށް ބުރޫނާރާނެ ގޮތަށް ހަދާފައިވާ އެއްބަސްވުންތަކެއް ކަމަށް ޣައްސާން ވިދާޅުވި އެވެ.

"ދިވެހިރާއްޖޭގެ މިނިވަންކަމާއި ސިޔާދަތާއި އިސްތިގުލާލަށް ޒައްރެއްގެ މިންވަރަށް ވެސް ބުރޫއަރާފާނެ ކަމެއް މި ދަތުރުފުޅުގައި ވެސް އަދި އެހެން ދަތުރުފުޅެއްގައި ވެސް ރައީސް ޑރ. މުހައްމަދު މުއިއްޒު ކުރައްވާފައި ނެތް،" ޣައްސާން ވިދާޅުވި އެވެ.

"އެއްވެސް އެއްބަސްވުމެއްގެ ސަބަބުން ދިވެހިންގެ ފުރިހަމަ ސިޔާދަތީ ބާރު ގެއްލޭ ފަދަ ނޫނީ ނުރައްކާވާ ފަދަ އެެއްވެސް ކަމެއް ރައީސްގެ ސަރުކާރަކުން ކުރައްވާފައި ނެތް،"

ޣައްސާން ވިދާޅުވީ ރާއްޖޭގެ މިނިވަންކަމާއި ސިޔާދަތު ހިމާޔަތްކުރާނީ ދިވެހިން ބޭނުންވާ ގޮތަށް، މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ކަމަށެވެ. އަދި އެމްއެންޑީއެފްގެ ގާބިލުކަން އިތުރުކުރުމަށް ރައީސް މަސައްކަތް ކުރައްވާ ކަމަށާއި މި ދަތުރުގައި ވެސް އެއްބަސްވީ ދިވެހިން އެދޭ ގޮތަށް ދިވެހި އަސްކަރިއްޔާގެ ގާބިލުކަން އިތުރުކުރުމަށް ކަމަށް އޭނާ ވިދާޅުވި އެވެ.

"އެއްވެސް ހާލެއްގައި އަޅުގަނޑުމެންގެ އެއްވެސް ޒިންމާއެއް އެހެން ގައުމަކަށް ހަވާލުކުރާ ކަހަލަ ވާހަކައެއް ދެކެވިފައި ނުވާނެ،" ޣައްސާން ވިދާޅުވި އެވެ.

މިނިސްޓަރު ވިދާޅުވި ގޮތުގައި ރައީސް އާއި އިންޑިއާގެ ބޮޑުވަޒީރު ނަރެންދުރަ މޯދީއާ އެކު ދެއްވި ބަސްތީގަތުމުގައި ވެސް ހާމަކުރެއްވި ޑޮކިއުމަންޓަކީ ވާހަކަ ދެކެވުނު އަދި އެއްބަސްވެވުނު ކަންތައްތަކެވެ. އަދި މި ސަރުކާރުން އެއްވެސް ސިއްރެއް ދިވެހި ރައްޔިތުންގެ ކިބައިން ނުހިފަހައްޓާނެ ކަމަށް ޣައްސާން ވިދާޅުވި އެވެ.

ޣައްސާން ވިދާޅުވި ގޮތުގައި އިންޑިއާއަކީ ރާއްޖެއާ ޒަމާނުއްސުރެ ގާތް ގުޅުމެއް ބާއްވައި ގައުމަކަށްވާތީ މިފަހަރު ފެނިގެން މިދިޔައީ ޑިޕްލޮމެޓިކް ރީތި އުސޫލުގެ ދަށުން އިންޑިއާ އާ ވާހަކަ ދައްކައިގެން ދިވެހިންނަށް އެންމެ ރަނގަޅު ގޮތް ހޯދައިދެއްވި މަންޒަރެވެ.

"މިހާރު އަސްކަރީ ދާއިރާއިން ހިނގާ ހުރިހާ ކަމެއްގައި ބާރު އޮންނާނީ ދިވެހިންގެ އަތުގައި. ބޭރުގެ އެެއްވެސް ނުފޫޒެއް އަސްކަރީ ގޮތުން ދިފާއީ ގޮތުން ނުފޯރުވޭނެ،"

މި ސަރުކާރުން އިންޑިއާ ސިފައިން ފޮނުވާލި މައްސަލައަށް އިޝާރާތް ކުރައްވަމުން ޣައްސާން ވިދާޅުވީ މިވަގުތު ރާއްޖޭގައި ތިބީ އިންޑިއާގެ ސިވިލިއަނުން ކަމަށާއި އެމީހުން ވެސް ތިބޭނީ ދެ ގައުމުގެ ދެމެދުގައި ބަދަލުކުރެވިފައި ލެޓާ އޮފް އެކްޗޭންޖުގައިވާ މުއްދަތަށް ކަމަށެވެ. އެކަމަކު އެ މުއްދަތު އޭނާ ވިދާޅެއް ނުވެ އެވެ.

ޣައްސާން ވަނީ ރައީސްގެ މި ދަތުރުފުޅާ މެދު ވަރަށް ފަހުރުވެރިވާ ކަމަށާއި މިހާރު ދިވެހިން މަސައްކަތް ކުރާނީ އެކުވެރިންނާ އެކު ނަމަވެސް އެއްވެސް ބަޔަކަށް ބަރޯސާވެގެން ނޫން ކަމަށް ވިދާޅުވެފަ އެެވެ.

އެކަމުގެ މިސާލެއްގެ ގޮތުގައި އޭނާ ވިދާޅުވީ ރާއްޖެ އާއި އިންޑިއާއާ ދެމެދު އެއްބަސްވި ރާއްޖޭގެ ހައިޑްރްގްރަފީ ސާވޭ ހެދުމުގެ އެއްބަސްވުން އާ ނުކުރަން މި ސަރުކާރުން ނިންމުމެވެ. މިހާރު އެއްވެސް ގައުމަކާ އެކު ހައިޑްރްގްރަފީ އެއްބަސްވުން ނެތް ކަމަށް އޭނާ ވިދާޅުވި އެވެ.

ޣައްސާން ވިދާޅުވި ގޮތުގައި ސަރުކާރުން މަސައްކަތްކުރަނީ ދިވެހި ސިފައިން ލައްވައި އެ މަސައްކަތް ކުރުވާށެވެ. އަދި މިއަހަރުގެ ތެރޭގައި އެ މަސައްކަތް ފެށުމަށް އެކަމަށް ބޭނުންވާ ސާމާނު ހޯދުމުގެ މަސައްކަތް ކުރާ ކަމަށާއި ދިވެހި ސިފައިންގެ ތެރޭގައި ވެސް އެ ދާއިރާއިން ކިޔަވާފައިވާ ބޭފުޅުން އެބަ ތިއްބެވި ކަމަށް އޭނާ ވިދާޅުވި އެވެ.