އެފްއޭއެމަށް ޖެނެރަލް ސެކްރެޓަރީއަކު ހޯދަން އިއުލާނުކޮށްފި

އެފްއޭއެމް އަށް ދާއިމީ ފުލްޓައިމް ޖެނެރަލް ސެކްރެޓަރީއަކު ހޯދުމަށް އެ އެސޯސިއޭޝަން މިހާރު ހިންގަމުން އަންނަ ނޯމަލައިޒޭޝަން ކޮމިޓީން އިއުލާންކޮށްފި އެވެ.

އެސޯސިއޭޝަން ދުވަހުން ދުވަހަށް ހިންގުމުގެ ޒިންމާ އޮންނަ އެ މަގާމު މިހާރު ފުރުއްވަނީ، ކޮރަޕްޝަނާއި މަނީ ލޯންޑަރިންގެ ތުހުމަތުކުރެވި، ފުޓްބޯޅައިން ސަސްޕެންޑްކޮށްފައިވާ އެފްއޭއެމްގެ ކުރީގެ ރައީސް ބައްސާމް އަދީލް ޖަލީލުގެ ދައުރުގެ ފަހުބައިގައި ވެސް އެ މަގާމު ހުންނެވި މުހައްމަދު ޖައުޝަން ޝަރީފް (ޖައު) އެވެ.

ވަރަށް ގިނަ ބަޔަކު އަންނަނީ ބައްސާމް އަޑިގަނޑަކަށް ވައްޓާލާފައި އޮތް އެ އެސޯސިއޭޝަން އަލުން ކޮޅަށް ނަގަން ހަވާލުވި ކޮމިޓީއަކުން، އޭނާގެ ދައުރުގައި ޖެނެރަލް ސެކްރެޓަރީކަން ކުރެއްވި މީހަކު އެ މަގާމުގައި ބެހެއްޓުމުން ފާޑުކިޔަމުންނެވެ.

ފީފާ އިން އެފްއޭއެމް އަށް ލަފާދީފައިވަނީ އާ ޖެނެރަލް ސެކްރެޓަރީއަކު ހޯދާ ނަމަ ސީދާ ވަކި ބަޔަކު ހޯދައި އޭގެ ތެރެއިން ފުރާނާލައިގެން މީހަކު އައްޔަނުކުރުމުގެ ބަދަލުގައި އެކަމަށް ޝައުގުވެރިވާ އެންމެންގެ ތެރެއިން ގާބިލު ކެންޑިޑޭޓަކު ނެގުމަށެވެ.

އެ ލަފާގެ މަތިން ނޯމަލައިޒޭޝަން ކޮމިޓީން ޖެނެރަލް ސެކްރެޓަރީއަކު ހޯދަން އިއުލާންކުރީ ދިވެހި ސަރުކާރުގެ ގެޒެޓްސްގަ އެވެ. އެ އިއުލާނުގައިވާ ގޮތުން އެފްއޭއެމްގެ މެނޭޖްމަންޓަށް ހިންގުމުގެ ދާއިރާ އެހީތެރިވެދިނުމަށް ހޯދާ އެ މުވައްޒަފަށް މައިގަނޑު ފަސް މެންޑޭޓެއް އޮންނާނެ އެވެ. އެއީ ސްޓްރެޓެޖިކަލް ކަންކަން ތަންފީޒުކުރުމާއި، އިދާރީ ގޮތުން ހިންގުމާއި، ބައިނަލްއަގްވާމީ ފަރާތްތަކާ ގުޅުވައިދިނުމާއި، ސްޓޭކްހޯލްޑަރުންނާ އެފްއޭއެމް ގުޅުވައިދިނުމާއި ހިއުމަން ރިސޯސަސް ހިންގުމެވެ.

އެ އިއުލާނުގައި ބުނެފައިވާ ގޮތުން މި މަގާމަށް ހޮވަން ބޭނުންވަނީ ބިޒްނަސް އެޑްމިނިސްޓްރޭޝަން، މެނޭޖްމަންޓް، ގަވަނަންސް، ގާނޫނު ނުވަތަ ގުޅޭ އެފަދަ ދާއިރާއަކުން އިން އެޑްވާންސް ޑިގްރީއެއް އޮތް މީހެކެވެ. އަދި އެޑްމިނިސްޓްރޭޝަން ނުވަތަ މެނޭޖްމަންޓުގެ ދާއިރާއިން މަދުވެގެން 5 އަހަރު ދުވަހުގެ ތަޖުރިބާ ލިބިފައިވުމަކީ ވެސް ޝަރުތެކެވެ. ކުޅިވަރު ނުވަތަ ފުޓްބޯޅަ ހިންގުމުގެ ދާއިރާއިން ފާހެއް އޮތުމާއި، ފީފާ ނުވަތަ އޭއެފްސީ ފަދަ ބައިނަލްއަގްވާމީ ފުޓްބޯޅަ އިދާރާތަކާ ނުވަތަ ގައުމީ އެސޯސިއޭޝަންތަކާއި ކްލަބްތަކާ އެކު ކުރިން މަސައްކަތްކޮށްފައިވާ ނަމަ އިސްކަންދޭނެ ކަމަށް އިއުލާނުގައިވެ އެވެ.

އިއުލާނުގައި، މި މަގާމަށް ދޭނެ ސީދާ މުސާރައެއް ބުނެފައެއް ނެތެވެ. އޮތީ ދެ ފަރާތުން ވާހަކަދައްކައިގެން މުސާރައެއް ކަނޑައަޅާނެ ކަމަށެވެ.

ކުރިމަތިލުމަށް ދީފައިވާ މުއްދަތަކީ މި މަހުގެ 14 ވަނަ ދުވަހުގެ މެންދުރު 12:00 ޖެހުމާ ހަމަޔަށެވެ.

ކުރިން ބެލެވިފައި އޮތީ ނޯމަލައިޒޭޝަން ކޮމިޓީން އެފްއޭއެމްއާ ހަވާލުވެ ފުރަތަމަ ވެސް ހޯދާނީ އާ ޖެނެރަލް ސެކްރެޓަރީއެއް ކަމަށެވެ. ނަމަވެސް، ފެނިގެން ދިޔައީ އެ ކޮމިޓީން ޖައުޝަންއާ އެކު ކުރިއަށް ދިޔަ ތަނެވެ. ސްޕޯޓްސް ލޯޔަރެއްގެ ގޮތުގައި ވެސް މަސައްކަތްކުރައްވާ ޖައުޝަން އޭރު ވިދާޅުވެފައިވަނީ ނޯމަލައިޒޭޝަން ކޮމިޓީގެ ދައުރު ފެށުމުން އިސްތިއުފާ ނުދެއްވައި މަޑުކުރެއްވީ ދީފާ އިންނާއި ކޮމިޓީގެ ޗެއާމަން އަހުމަދު ޒުހޫރާއި މެމްބަރުން ވެސް އެކަމަށް އެދިފައިވާތީ ކަމަށެވެ.

ޖައުޝަން މަގާމުގައި ބެހެއްޓުމުން އެންމެ ބޮޑަށް ފާޑުވިދާޅުވީ، ބައްސާމްއާ ދެކޮޅަށް އެންމެ ފަހުގެ އިންތިހާބުގައި ނުކުންނެވި ކުރީގެ ފޯވާޑް އަހުމަދު ތޯރިގް (ޓޮމް) އެވެ. ރައްޔިތުންގެ މަޖިލީހުގެ މެމްބަރުކަން ވެސް ކުރައްވާ ޓޮމް ވިދާޅުވީ އެފްއޭއެމް އިން އެންމެ ފަހުން އިއުލާންކުރި ދެ އިންތިހާބުގައި ވެސް އެ އެސޯސިއޭޝަނުގެ އަސާސީ ގަވާއިދާ ހިލާފަށް ހުރިހާކަމެއް ކުރިއަށް ގެންދިޔައީ ޖެނެރަލް ސެކްރެޓަރީއަކަށް ޖައުޝަން ހުރެގެން ކަމަށާއި އެހެންވެ އޭނާ މަގާމުގައި ބެހެއްޓުމަކީ ގޯސް ސިގްނަލެއް ކަމަށެވެ.