ނޯމަލައިޒޭޝަން ކޮމިޓީން އެފްއޭއެމަށް އާ ޖެނެރަލް ސެކްރެޓަރީއަކު ހޯދަނީ

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް އާ ޖެނެރަލް ސެކްރެޓަރީއަކު ހޯދުމުގެ މަސައްކަތް، އެ އެސޯސިއޭޝަން ހިންގުން ފީފާ އިން މަތިކޮށްފައިވާ ނޯމަލައިޒޭޝަން ކޮމިޓީން ފަށައިފި އެވެ.

އެސޯސިއޭޝަން ދުވަހުން ދުވަހަށް ހިންގުމުގެ ޒިންމާ އޮންނަ އެ މަގާމު މިހާރު ފުރުއްވަނީ، ކޮރަޕްޝަނާއި މަނީ ލޯންޑަރިންގެ ތުހުމަތުކުރެވި، ފުޓްބޯޅައިން ސަސްޕެންޑްކޮށްފައިވާ އެފްއޭއެމްގެ ކުރީގެ ރައީސް ބައްސާމް އަދީލް ޖަލީލުގެ ދައުރުގެ ފަހުބައިގައި ވެސް އެ މަގާމު ހުންނެވި މުހައްމަދު ޖައުޝަން ޝަރީފް (ޖައު) އެވެ.

ވަރަށް ގިނަ ބަޔަކު އަންނަނީ ބައްސާމް އަޑިގަނޑަކަށް ވައްޓާލާފައި އޮތް އެ އެސޯސިއޭޝަން އަލުން ކޮޅަށް ނަގަން ހަވާލުވި ކޮމިޓީއަކުން، އޭނާގެ ދައުރުގައި ޖެނެރަލް ސެކްރެޓަރީކަން ކުރެއްވި މީހަކު އެ މަގާމުގައި ބެހެއްޓުމުން ފާޑުކިޔަމުންނެވެ.

އިތުބާރުހުރި މަސްދަރަކުން "މިހާރު" އަށް ކަށަވަރުވެފައިވާ ގޮތުގައި ނޯމަލައިޒޭޝަން ކޮމިޓީން މިވަގުތު އަންނަނީ ފީފާގެ ލަފާގެ މަތިން، އާއްމުކޮށް ހުޅުވާލައިގެން ޖެނެރަލް ސެކްރެޓަރީއަކު ހޯދުމުގެ މަސައްކަތް ކުރަމުންނެވެ. ސީދާ ވަކި ބަޔަކު ހޯދައި އޭގެ ތެރެއިން ފުރާނާލައިގެން މީހަކު އައްޔަންކުރުމަށް ވުރެ ފީފާ އިން އެދެނީ، އެކަމަށް ޝައުގުވެރިވާ އެންމެންގެ ތެރެއިން ގާބިލު ކެންޑިޑޭޓަކު ނެގުމަށެވެ.

ސްޕޯޓްސް ލޯޔަރެއްގެ ގޮތުގައި ވެސް މަސައްކަތްކުރައްވާ ޖައުޝަން އޭރު ވިދާޅުވެފައިވަނީ ނޯމަލައިޒޭޝަން ކޮމިޓީގެ ދައުރު ފެށުމުން އިސްތިއުފާ ނުދެއްވައި މަޑުކުރެއްވީ ދީފާ އިންނާއި ކޮމިޓީގެ ޗެއާމަން އަހުމަދު ޒުހޫރާއި މެމްބަރުން ވެސް އެކަމަށް އެދިފައިވާތީ ކަމަށެވެ.

"އެ އެންމެންގެ އެދުމުގެ މަތިން އަދި ފުޓްބޯޅަ އަށް މަސައްކަތްތަކެއް ކޮށްދިނުމުގެ ހެޔޮ ނިޔަތުގައި މި ވަގުތު އަދި އެފްއޭގައި އެބަހުރިން،" ޖައުޝަން ވިދާޅުވެފައިވެ އެވެ.

ޖައުޝަން މަގާމުގައި ބެހެއްޓުމުން އެންމެ ބޮޑަށް ފާޑުވިދާޅުވީ، ބައްސާމްއާ ދެކޮޅަށް އެންމެ ފަހުގެ އިންތިހާބުގައި ނުކުންނެވި ކުރީގެ ފޯވާޑް އަހުމަދު ތޯރިގް (ޓޮމް) އެވެ. ރައްޔިތުންގެ މަޖިލީހުގެ މެމްބަރުކަން ވެސް ކުރައްވާ ޓޮމް ވިދާޅުވީ އެފްއޭއެމް އިން އެންމެ ފަހުން އިއުލާންކުރި ދެ އިންތިހާބުގައި ވެސް އެ އެސޯސިއޭޝަނުގެ އަސާސީ ގަވާއިދާ ހިލާފަށް ހުރިހާކަމެއް ކުރިއަށް ގެންދިޔައީ ޖެނެރަލް ސެކްރެޓަރީއަކަށް ޖައުޝަން ހުރެގެން ކަމަށާއި އެހެންވެ އޭނާ މަގާމުގައި ބެހެއްޓުމަކީ ގޯސް ސިގްނަލެއް ކަމަށެވެ.

"ކޯރަމް ހަމަނުވާ ޖަލްސާތަކުން ފެށިގެން ހެދި ހުރިހާ ހަޑިއެއްގައި (ޖައުޝަން) ވަނީ ބައިވެރިވެވިފައި. ބައްސާމުގެ ޖެނެރަލް ސެކްރެޓަރީ (މަގާމުގައި) ބަހައްޓައިގެން އެފްއޭއެމަށް ކުރެވޭނެ ނޯމަލައިޒިންއެއް އެއް ނުފެނޭ،" ޓޮމް ފޭސްބުކުގައި ލިޔުއްވާފައިވެ އެވެ.

ޖައުޝަން އަކީ، ބައްސާމުގެ ދައުރުގައި ބައެއް ކަންކަމުގައި އެ އެސޯސިއޭޝަނަށް ގާނޫނީ ލަފާ ވެސް ދީފައިވާ ފަރާތެކެވެ. ކޮމިޓީ އަށް ފީފާ އިން ދީފައިވާ މެންޑޭޓަކީ އެތަނުން ގެއްލިފައިވާ ފައިސާގެ ކަންކަން ބެލުމާއި، އިދާރީ ގޮތުން އެ އެސޯސިއޭޝަން ހަމަމަގަށް އެޅުވުމުގެ އިތުރުން އިންތިހާބަކާ ހަމަޔަށް ގެންދިއުމެވެ.

ބައްސާމުގެ ދައުރުގައި އެފްއޭއެމްގެ ޖެނެރަލް ސެކްރެޓަރީކަން އެންމެ ގިނަ ދުވަހު ފުރުއްވީ ހުސެއިން ޖަވާޒެވެ. ނަމަވެސް، ބައްސާމާ ދެކޮޅަށް ކޮރަޕްޝަނާއި، މަނީ ލޯންޑަރިންގެ ތުހުމަތުކުރެވުމާ އެކު، ޖަވާ ވަނީ މިދިޔަ އަހަރުގެ ނޮވެމްބަރު އިސްތިއުފާ ދެއްވައިފަ އެވެ. އޭނާ މިވަގުތު ހުންނެވީ ޔޫތު މިނިސްޓަރުގެ ނާއިބަކަށެވެ.