އެފްއޭއެމްގެ ޗެކުތަކުގައި ސޮއިކުރުމުގެ ހުއްދަ އެންމެ ފަހުން އެންސީގެ މެންބަރުންނަށް ލިބިއްޖެ

އެފްއޭއެމްގެ ޗެކުތަކުގައި ސޮއިކުރުމުގެ ހުއްދަ ނޯމަލައިޒޭޝަން ކޮމިޓީ (އެންސީ) ގެ މެންބަރުންނަށް އެންމެ ފަހުން ލިބިއްޖެ އެވެ.

އެފްއޭއެމްގެ އެކްޓިން ޖެނެރަލް ސެކްރެޓަރީ މުހައްމަދު ޖައުޝަން ޝަރީފް ވިދާޅުވީ ބީއެމްއެލް އެކައުންޓްތަކުގެ ޗެކްތަކުގައި ސޮއި ކުރުމުގެ ހުއްދަ ނޯމަލައިޒޭޝަން ކޮމިޓީގެ މެންބަރުންނަށް ލިބިފައިވާކަން ވެސް އެ ބޭންކުން އަންގާފައިވާ ކަމަށެވެ. އަދި ބޭންކް އޮފް ސިލޯނުގައި ހުޅުވާފައިވާ އެކައުންޓްތަކުގެ ޗެކްތަކުގައި ސޮއި ކުރުމުގެ އެޕްރޫވް ހޯދަން ވެސް ހުށަހަޅާފައިވާނެ ކަމަށް އޭނާ ވިދާޅުވި އެވެ. އަދި އެކަން ފީފާ އަށް ވެސް އަންގާފައި ވާނެ ކަމަށް އޭނާ ވިދާޅުވި އެވެ.

ފައިސާގެ ގިނަ މައްސަލަތަކެއް ކުރިމަތިވެފައިވާ އެސޯސިއޭޝަނުން މާލީ މުއާމަލާތް އާއްމުގޮތެއްގައި ކުރަނީ ބީއެމްއެލް އާއި ބޭންކް އޮފް ސިލޯނުންނެވެ.

އެފްއޭއެމް ހިންގުމާ، އެންސީން ހަވާލުވިތާ ގިނަ ދުވަސްތަކެއް ވެގެން ދިޔައިރު ވެސް ޗެކްތަކުގައި ސޮއި ކުރުމުގެ ހުއްދަ، އެންސީގެ މެންބަރުންނަށް ލިބުން ލަސްވީ ބޭންކަށް ހުށަހަޅަން ޖެހޭ ބައެއް ލިޔެކިޔުންތައް އެފްއޭއެމްގެ އިދާރާގައި ނެތުމުންކަމަށް ކޮމިޓީން ބުންޏެވެ.

ޗެކްތަކުގައި ސޮއި ކުރުމުގެ ހުއްދަ ހޯދަން ބޭންކަށް ލިޔެކިޔުން ހުށަހެޅި އިރު ވެސް ބައެއް ލިޔެކިޔުންތައް ފުރަތަމަ މަރުހަލާގައި އެއްކޮށް ހަމަކުރެވިފައި ނުވާ ކަމަށް، އެންސީގެ ޗެއާޕާސަން އަހްމަދު ޒުހޫރު ވިދާޅުވި އެވެ.

އޭނާ ވިދާޅުވީ އެފްއޭމް ދުވަހުން ދުވަހަށް ހިނގައިގަތުމަށް ބޭނުންވާ ލިޔެކިޔުންތައް ވެސް އެ އިދާރާގައި ފެންނަން ނެތް ކަމަށެވެ.

އެ ޕްރެސް ކޮންފަރެންސްގައި ޒުހޫރު ވިދާޅުވީ ނޯމަލައިޒޭޝަން ކޮމިޓީން ހަވާލުވި އިރު އެފްއޭއެމްގެ އެއްވެސް އެކައުންޓެއްގައި ފައިސާއެއް ނެތް ކަމަށެވެ.