ރާއްޖޭގައި ޑިޖިޓަލް އިގުތިސާދެއް ބިނާކުރުމަށް އިންޑިއާ އިސްދައުރެއް އަދާކޮށްދޭން ރައީސް އެދިވަޑައިގެންފި

އެ މަނިކުފާނު ވެރިކަމާ ހަވާލުވެވަޑައިގަތީ ރާއްޖޭގެ އިގުތިސާދަށް ބޮޑެތި ބަދަލުތަކެއް ގެނެސް އިގުތިސާދު ރިފޯމް ކުރުމުގެ ވައުދާއެކު ކަމަށާއި އެ މަސައްކްތަކަށް އިންޑިއާގެ އެހީތެރިކަން ބޭނުންފުޅުވާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

އިންޑިއާ އަށް އެ މަނިކުފާނު މިހާރު ކުރައްވަމުން ގެންދަވާ ފުރަމާނަ ދަތުރުފުޅުގައި ބޭއްވެވި ބިޒްނަސް ފޯރަމްގައި ވިދާޅުވީ، ޓޫރިޒަމް ދާއިރާ ތަރައްގީ ކުރުމުގެ އިތުރުން އިގުތިސާދަށް އާމްދަނީ ވަންނާނެ އެހެން ކަންކަން ތައާރަފު ކުރަން ބޭނުންފުޅުވާ ކަމަށެވެ. އޭގެ ތެރެއިން ރައީސް ފާހަގަކުރެއްވީ ފައިނޭންޝަލް ސާވިސް އާއި މެރިޓައިމް އަދި ޑިޖިޓަލް އިކޮނޮމީ އެވެ.

"އަޅުގަނޑު މިއަދު މި ތަނުގައި ހުރެ ތިޔަ ހުރިހާ ބޭފުޅުންނަށް ހޫނު މަރުހަބާއެއް ދަންނަވައި މި ދައުވަތު އަރުވަނީ ރާއްޖޭގައި ހުރި އިގުތިސާދީ ފުރުސުތައް ހޯދައި އޭގެ ބޭނުން އެންމެ ފުރިހަމަ ގޮތުގައި ހިފުމަށް،" ދިއްލީގައި ރައީސް މުއިއްޒު ހުންނަވާ ހޮޓަލުގައި ބޭއްވި ބިޒްނަސް ފޯރަމްގައި އެ މަނިކުފާ އެދިވަޑައިގަތެވެ.

ރާއްޖެ މިހާރު މިސްރާބު ޖަހާފައި ވަނީ ޑިޖިޓަލް އިކޮނޮމީއެއް ގާއިމް ކުރުމަށް ކަމަށް ވާއިރު، އިންޑިއާއަކީ އެ މަސައްކަތުގައި މުހިންމު ބައިވެރިއަކަށް ވެ، އިސް ދައުރެއް އަދާކޮށްދޭން ރައީސް އެދިވަޑައިގަތެވެ. ސަބަބަކީ އިންޑިއާއަކީ ޑިޖިޓަލް އިކޮނޮމީގައި އެންމެ ކުރީގައި އުޅޭ ގައުމު ކަމަށް ވުން ކަމަށް އެ މަނިކުފާނު ވިދާޅުވި އެވެ.

ރައީސް މުއިއްޒު ވިދާޅުވީ، ޑިޖިޓަލް އިގްތިސާދެއް ބިނާކުރުމުގެ އަމާޒާ އެކު ބޭނުންފުޅުވަނީ މި ޒަމާނަށް ފެތޭ ގޮތަށް ޑިޓަލް ނިޒާމެއްގެ ތެރެއިން ފައިސާގެ މުއާމަލާތު ކުރާނެ ގޮތްތަކެއް ކަމަށެވެ. އެހެންވެ، ރައްކާތެރި ނިޒާމެއް ބޭނުންވާ ކަމަށް އެ މަނިކުފާނު ވިދާޅުވި އެވެ. އެހެންވެ، އިންޑިއާގެ ތަޖުރިބާ އާއި އެހީތެރިކަން އެ ދާއިތާ އިން ބޭނުންވާ ކަމަށް ވިދާޅުވި އެވެ.

ރައީސް ވިދާޅުވީ، ރާއްޖޭގެ ޓޫރިޒަމް ކުރިއަރުވަން އިންޑިއާގެ އެހީތެރިކަން ވަރަށް ބޮޑަށް ބޭނުންވާ ކަމަށާއި އެ މީހުންގެ ބޭނުމާ އެއްވަރަށް ހިދުމަތްތައް ދޭނެ ކަމަށެވެ.

ރައީސްގެ ވާހަކަފުޅުގައި ވިދާޅުވީ، މިހާރު ރާއްޖޭގައި އަމަލުކުރަނީ ފޮރިން އިންވެސްޓްމަންޓުގެ އާ ގާނޫނަކަށް ކަމަށާއި އޭގެ ސަބަބުން އިންވެސްޓަރުންނަށް ރައްކާތެރިކަމާއި ޔަގީންކަން ލިބިދޭނެ ކަމަށެވެ. ހާއްސަކޮށް ޓޫރިޒަމް ދާއިރާގެ ވިޔަފާރިވެރިންނަށް އޮތް ޔަގީންކަމާއި އިތުބާރު އެ މަނިކުފާނު ފާހަގަކުރެއްވި އެވެ.

ރައީސްގެ އިގުތިސާދީ އެޖެންޑާގެ އެންމެ މުހިންމު އެއް ކަންތައް ކަމަށްވާ އިންޓަނޭޝަނަލް ފައިނޭންޝަލް ސެންޓަރު އަންނަ އަހަރު އިފުތިތާހު ކުރައްވާނެކަން ފާހަގަކުރައްވަމުން ވިދާޅުވީ، އޭގެ ބޭނުމަކީ ރާއްޖޭގައި ތަފާތު ވައްތަރުގެ ވިޔަފާރިތަކުގެ ވާދަވެރި މާހައުލެއް އުފައްދައި ކުރިއެރުވޭނެ މަގުތައް ފަހިކުރުން ކަމަށެވެ.

ރައީސް ވިދާޅުވި ގޮތުގައި، މޯލްޑިވްސް ޑިވެލޮޕްމަންޓް ބޭންކުގެ އަމަލީ މަސައްކަތް ވެސް މި އަހަރުގެ ފަހުކޮޅު ފަށައި، ވިޔަފާރީގެ އިތުރު ފުރުސަތުތައް ފަހިވާނެ އެވެ.

އިންޑިއާގެ ވިޔަފާރިވެރިންނާ އެކު ބޭއްވެވި ބައްދަލުވުމުގައި ރައީސް މުއިއްޒު ވަނީ އެ ގައުމުން ރާއްޖޭގެ އެކި ކަންކަމަށް ވެ ދީފައިވާ އަދި މިހާރު ވެސް ދެމުން ގެންދާ އެހީތެރިކަން ފާހަގަކުރައްވައިފަ އެވެ. އަދި ރާއްޖޭގައި ހުރި ވިޔަފާރީގެ ފުރުސަތުތައް ވެސް އިންޑިއާގެ ވިޔަފާރިވެރިންނަށް ތަފުސީލް ކޮށްދެއްވި އެވެ.