އިންޑިއާގެ ލޯން އެހީގައި ހުޅުމާލޭގައި ހެދި 700 ހައުސިން ޔުނިޓް ހަވާލުކޮށްފި

އިންޑިއާގެ އެގްޒިމް ބޭންކުގެ ލޯން އެހީގައި ހުޅުމާލޭގައި އިމާރާތްކޮށްފައިވާ 700 ހައުސިން ޔުނިޓް ނިންމައި އެ ގައުމުގެ ސަރުކާރުން މިއަދު ހަވާލުކޮށްފި އެވެ.

މި ހައުސިން ޔުނިޓްތައް ނިންމައި ދިވެހި ސަރުކާރާ ހަވާލުކުރީ، ރައީސް ޑރ. މުހައްމަދު މުއިއްޒު އިންޑިއާއަށް ކުރައްވާ ރަސްމީ ދަތުރުފުޅުގައި ބޮޑުވަޒީރު ނަރެންދުރަ މޯދީއާ އެކު ބޭއްވެވި ބައްދަލުވުމަށް ފަހު އެވެ.

އިންޑިއާގެ އެގްޒިމް ބޭންކުން ދިން 227 މިލިއަން ޑޮލަރު (3.5 ބިލިއަން ރުފިޔާ)ގެ ލޯނު އެހީގައި ހުޅުމާލޭގައި 4،000 ހައުސިން ޔުނިޓު އަޅަން ހަވާލުކުރީ ކުރީގެ ސަރުކާރުގަ އެވެ. އެއީ، ހުޅުމާލޭގައި ކޭޕީއައިއެލް (ކުރީގެ ޖޭއެމްސީ ކުންފުނިން) އިން ހަދާ 16 ޓަވަރު އަދި އެންބީސީސީން ހަދާ 16 ޓަވަރެވެ.

ފަހިދިރިއުޅުން ކޯޕަރޭޝަންގެ މެނޭޖިން ޑިރެކްޓަރު ހަމްދާން ޝަކީލް "މިހާރު"އަށް ވިދާޅުވީ އިންޑިއާގެ ސަރުކާރުން އެ ފްލެޓުތައް ހަވާލުކޮށްފައި ވަނީ ފިނިޝިންގެ ހުރިހާ މަސައްކަތެއް ނިންމުމަށް ފަހު ކަމަށެވެ.

ޓަވަރުތަކަށް ބޭނުންވާ އިތުރު 10 ލިފްޓް މިދިޔަ މަހު ވަނީ ގެނެސްފައިވެ އެވެ. އެއާއެކު، ލިފްޓުތަކުގެ އަދަދު 30 އަށް އަރާނެ އެވެ.

މި މަޝްރޫއުގައި ދެން ހުރި ފްލެޓުތައް ހަދަނީ 17-18 ބުރީގެ 32 ޓަވަރުގަ އެވެ. ކޮންމެ ފްލޯއެއްގައި އަށް އެޕާޓްމެންޓް ހުންނާނެ އެވެ. އޭގެ ތެރޭގައި ދެ ކޮޓަރީގެ 1،200 ފްލެޓާއި ތިން ކޮޓަރީގެ 2،800 ފްލެޓް ހިމެނެ އެވެ.

ހައުސިން މިނިސްޓަރު ޑރ. އަލީ ހައިދަރު ވިދާޅުވެފައިވާ ގޮތުގައި އެ 4،000 ފްލެޓްގެ މަސައްކަތް އެއްކޮށް ނިންމާލެވެނީ އަންނަ އަހަރު މެދުތެރެއަށެވެ. އެނގިފައިވާ ގޮތުގައި، އެ ފްލެޓްތަކަށް މީހުންނަށް ވަދެވޭވަރު ވާނީ އަންނަ އަހަރު ޖުލައި ނުވަތަ އޮގަސްޓް މަހު އެވެ.

ގެދޮރުވެރިޔާ ސްކީމްގެ ދަށުން ފްލެޓް ލިބޭނެ ކަމަށް ކުރިން އިއުލާންކޮށްފައިވާ ލިސްޓު ރިވިއު ކުރުމަށް ފަހު، ފައިނަލް ލިސްޓު އަންނަ މަހު އާންމުކުރާނެ ކަމަށް ހައުސިން މިނިސްޓަރު ހައިދަރު ވަނީ މިދިޔަ ޖުލައި މަހު ވިދާޅުވެފަ އެވެ.