ފަސް އަހަރު ކުރިން އައްޑޫން ދޫކުރި 1،700 ގޯތި ފަޅަށް އޮތުމުން ފިޔަވަޅު އަޅާނެ ކަމުގެ އިންޒާރު

މީގެ ފަސް އަހަރު ކުރިން އައްޑޫން ދޫކޮށްފައިވާ 1،700 އަށް ވުރެ ގިނަ ގޯތި ފަޅަށް އޮތުމުން ފިޔަވަޅު އަޅާނެ ކަމުގެ އިންޒާރު އައްޑޫ ސިޓީ ކައުންސިލުން މިއަދު ދީފި އެވެ.

އައްޑޫ ސިޓީ ކައުންސިލުން ނެރުނު އިއުލާނެއްގައި ބުނީ އައްޑޫގެ އަވަށްތަކުން ދިރިއުޅުމަށް ދޫކޮށްފައިވާ ގޯތިތަކުގެ ތެރެއިން، ގޯތި ދޫކުރެވުނު މުއްދަތުން ފެށިގެން ފަސް އަހަރު ދުވަސްވީއިރު ވެސް އެ ތަންތަނުގައި ދިރިއުޅެން ފަށާފައި ނުވާ ގޯތިތަކާއި ދިރިއުޅުމަށް ފަހު ފަޅުކޮށްފައިވާ ގިނަ އަދަދެއްގެ ގޯތިތައް ހުރުމުން އެ އިދާރާއަށް ރައްޔިތުންގެ ޝަކުވާ ލިބެމުންދާ ކަމަށެވެ.

ގޯތިތަކުގައި އެއްވެސް މަސައްކަތެއް ނުކޮށް އަދި ދިރިއުޅެން ފަށާފައި ނުވުމުގެ ސަބަބުން އެކިއެކި ނޭދެވޭ އަމަލުތައް އެތަންތަނުގައި ހިންގައި އޭގެ ސަބަބުން އިޖުތިމާއީ އެތައް މައްސަލަތަކެއް ވެސް ކުރިމަތިވަމުންދާ ކަމަށް އެ އިއުލާނުގައި ބުންޏެވެ.

ބައެއް ގޯތިތަކުގައި މަދިރި އާއި މީދާ ކަހަލަ ސޫފާސޫފި އާލާވެ، އެ ސަރަހައްދުތަކުގައި ދިރިއުޅޭ އެހެން މީހުންނަށް އުނދަގޫވެ، އާންމު ސިއްހަތަށް ނުރައްކާވާ ކަމުގެ ޝަކުވާ ވެސް ލިބެމުންދާ ކަމަށް ސިޓީ ކައުންސިލުން ބުންޏެވެ.

ސިޓީ ކައުންސިލުން ބުނި ގޮތުގައި، އެ ގޯތިތައް ހަވާލުކުރެވުނު ފަހުން، ބައެއް ގޯތިތަކުގެ ރަޖިސްޓަރީ ހެއްދުމަށް ވެސް ހުށަހަޅާފައި ނުވެ އެވެ.

އައްޑޫގައި ފަޅަށް ހުރި ގޯތިތަކުގެ އަދަދު

• ހިތަދޫން 802 ގޯތި

• މަރަދޫން 106 ގޯތި

• މަރަދޫފޭދޫން 23 ގޯތި

• ފޭދޫން 160 ގޯތި

• ހުޅުދޫން 512 ގޯތި

• މީދޫން 109 ގޯތި

ބަންޑާރަ ގޯއްޗެއް ދޫކުރާ މުއްދަތުން ފެށިގެން ފަސް އަހަރު ދުވަހުގެ ތެރޭގައި އެ ގޯއްޗެއްގައި ދިރިއުޅެން ފަށާފައިނުވާ ނަމަ އެ ގޯއްޗެއް އެ މީހެއްގެ ކިބައިން ނެގުމުގެ ބާރު ގާނޫނުން ދައުލަތަށް ލިބިގެންވާކަން ސިޓީ ކައުންސިލްގެ އިއުލާނުގައި ވަނީ ހަނދާންކޮށްދީފަ އެވެ. އަދި ގޯތި ހަވާލުކުރާ ތާރީހުން ފެށިގެން 30 ދުވަހުގެ ތެރޭގައި ގޯތީގެ ދާއިމީ ރަޖިސްޓަރީ ހެއްދުމަށް ގޯތީގެ ވެރިފަރާތުން ހުށަހަޅަން ޖެހޭނެ ކަން ވެސް ހަނދާންކޮށްދިނެވެ.

އެ މުއްދަތުގައި ރަޖިސްޓަރީކުރުމަށް ހުށަހަޅާފައި ނުވާ ނަމަ ޖޫރިމަނާ ކުރެވޭނެ ކަމަށާއި އެގޮތުގެ މަތިން އަމަލު ނުކުރާ ނަމަ ގޯތި ލިބުނު މީހުންނަށް ދޫކޮށްފައިވާ ވަގުތީ ރަޖިސްޓަރީ އަދި ގޯތި ހަވާލުކުރެވުނު ކަމުގެ ލިޔުން ބާތިލުކުރުމުގެ އިހްތިޔާރު ކައުންސިލަށް ލިބިގެންވާ ކަމަށް އައްޑޫ ސިޓީ ކައުންސިލްގެ އިއުލާނުގައި ބުންޏެވެ.

އައްޑޫ ސިޓީ ކައުންސިލުން ވަނީ ފިޔަވަޅު އެޅުމުގެ ކުރިން ގޯތިތަކުގެ ވެރިފަރާތްތަކުން އަމަލުކުރަންވީ ގޮތުގެ އިރުޝާދު ދީފަ އެވެ. އެއީ؛

• ރަޖިސްޓަރީނުކޮށް ހުރި ގޯތިތައް މިއަދުން ފެށިގެން 30 ދުވަސްތެރޭގައި ރަޖިސްޓްރީކުރުމަށް ހުށަހެޅުން.

• ގޯއްޗާއި ގޯތި ވަށައިގެންވާ މަގުތައް މިއަދުން ފެށިގެން 30 ދުވަސްތެރޭގައި ސާފުކޮށް ބެލެހެއްޓުން.

• މިއަދުން ފެށިގެން 6 މަސް ދުވަސް ތެރޭގައި ގޯތީގައި އިންފާރު ރޭނުން.

• މިއަދުން ފެށިގެން އެއް އަހަރު ދުވަހުގެ ތެރޭގައި އިމާރާތްކުރުމުގެ މަސައްކަތް ފެށުން.

"މި އެންގުމާ އެއްގޮތަށް އަމަލުނުކުރާ ފަރާތްތަކާ މެދު ގާނޫނާއި ގަވާއިދުގައިވާ ގޮތުގެ މަތިން ފިޔަވަޅު އަޅާނެކަން އާންމުކޮށް އަންގާ އިއުލާންކުރަމެވެ،" އައްޑޫ ސިޓީ ކައުންސިލުން ބުންޏެވެ.

އައްޑޫން ގޯތި ދޫކުރަން މިދިޔަ އަހަރު ވެސް އިއުލާންކުރި އެވެ. އެ ގޯތިތަކަށް ޝަރުތު ހަމަވި 3،972 މީހުންނަށް ގޯތި ދޭން އައްޑޫ ސިޓީ ކައުންސިލުން ވަނީ ނިންމައިފަ އެވެ. އޭގެ ތެރެއިން ބައެއް ގޯތިތަކުގެ ގުރު ނެގި ނަމަވެސް، އެ މަސައްކަތުގެ ބޮޑު ބައި އަދިވެސް އޮތީ ހުއްޓިފަ އެވެ. އަދި އޭގެ ތެރެއިން އެއްވެސް ގޯއްޗެއް ހަވާލެއް ވެސް ނުކުރެ އެވެ.

ކުރީގެ ސަރުކާރުން ވަނީ އައްޑޫން ގޯތި ދިނުމަށް އެކި އަވަށްތަކުގެ ބިން ވެސް ހިއްކައިފަ އެވެ.